ಜನದಟ್ಟಣೆ ಕಡಿಮೆ ಮಾಡಲು ಪಶ್ಚಿಮ ರೈಲ್ವೇಯಿಂದ ಪ್ಲ್ಯಾಟ್‌ಫಾರ್ಮ್ ಟಿಕೆಟ್‌ ಬೆಲೆ ಏರಿಕೆ

ಮುಂಬಯಿ: ಕೊರೊನಾ ವೈರಸ್‌ ಭೀತಿಯ ನಡುವೆ ಮಧ್ಯ ರೈಲ್ವೇ ಮತ್ತು ಪಶ್ಚಿಮ ರೈಲ್ವೇಯು ಪ್ಲ್ಯಾಟ್‌ಫಾರ್ಮ್ ಟಿಕೆಟ್‌ನ ಬೆಲೆಯನ್ನು 10 ರೂ.ನಿಂದ 50 ರೂ.ಗೆ ಏರಿಸಿರುವುದಾಗಿ ಮಂಗಳವಾರ ಘೋಷಣೆ ಮಾಡಿವೆ. ನಿಲ್ದಾಣದ ಗಾತ್ರವನ್ನು ಆಧರಿಸಿ ಬೆಲೆ ಬದಲಾಗಲಿದೆ, ಆದರೆ ಮುಂಬಯಿಯ ಛತ್ರಪತಿ ಶಿವಾಜಿ ಮಹಾರಾಜ್‌ ಟರ್ಮಿನಸ್‌ನಂತಹ (ಸಿಎಸ್‌ಎಂಟಿ) ದೊಡ್ಡ ನಿಲ್ದಾಣಗಳಲ್ಲಿ ಇದು 50 ರೂ. ಆಗಿರಲಿದೆ ಎಂದು ಮಧ್ಯ ರೈಲ್ವೇಯ ವಕ್ತಾರರು ತಿಳಿಸಿದ್ದಾರೆ. ಕೊರೊನಾ ವೈರಸ್‌ ಸೋಂಕಿನ ಭೀತಿಯನ್ನು ಗಮನದಲ್ಲಿಟ್ಟುಕೊಂಡು ನಿಲ್ದಾಣಗಳಲ್ಲಿ ಅನಗತ್ಯ ಜನಸಂದಣಿಯನ್ನು ತಪ್ಪಿಸುವುದು ಇದರ ಉದ್ದೇಶವಾಗಿದೆ ಎಂದವರು ಹೇಳಿದ್ದಾರೆ.