Wenlock Hospital: 50 ಹಾಸಿಗೆಗಳ ತೀವ್ರ ನಿಗಾ ಘಟಕಕ್ಕೆ ಇಂದು ಶಿಲಾನ್ಯಾಸ

ಮಂಗಳೂರು: ಪಿಎಂ-ಎಬಿಎಚ್‌ಐಎಂ (ಪ್ರಧಾನ ಮಂತ್ರಿ ಆಯುಷ್ಮಾನ್‌ ಭಾರತ್‌ ಹೆಲ್ತ್‌ ಇನ್‌ಫ್ರಾಸ್ಟ್ರಕ್ಚರ್‌ ಮಿಷನ್‌ ) ಕಾರ್ಯಕ್ರಮದಡಿ 50 ಹಾಸಿಗೆಗಳ ತೀವ್ರ ನಿಗಾ ಘಟಕ ಕಟ್ಟಡಕ್ಕೆ ಅ.29ರಂದು ಬೆಳಗ್ಗೆ 11.30 ಕ್ಕೆ ಐಎಂಎ ಭವನ, ಅತ್ತಾವರ, (ಜಿಲ್ಲಾ ವೆನ್‌ಲಾಕ್‌ ಆಸ್ಪತ್ರೆಯ ನೂತನ ಶಸ್ತ್ರಚಿಕಿತ್ಸಾ ವಿಭಾಗದ ಮುಂಭಾಗ)ದಲ್ಲಿ ಶಿಲಾನ್ಯಾಸ ನಡೆಯಲಿದೆ.

ಮಧ್ಯಾಹ್ನ 1.08 ಗಂಟೆಗೆ ಸರಿಯಾಗಿ ಹೊಸದಿಲ್ಲಿಯಿಂದ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ವೀಡಿಯೋ ಕಾನ್ಫರೆನ್ಸ್‌ ಮೂಲಕ ಶಿಲಾನ್ಯಾಸ ವನ್ನು ನೆರವೇರಿಸುವರು. ಸಂಸದ‌ ಕ್ಯಾ| ಬ್ರಿಜೇಶ್‌ ಚೌಟ ಅಧ್ಯಕ್ಷತೆ ವಹಿಸಲಿರುವರು. ತೀವ್ರ ನಿಗಾ ಘಟಕ ಕಟ್ಟಡವು ಒಟ್ಟು 5,460 ಚ.ಮೀ. ವಿಸ್ತೀರ್ಣ ಹೊಂದಿದ್ದು, ನೆಲಮಹಡಿ ಸಹಿತ ಒಟ್ಟು 3 ಅಂತಸ್ತು ಗಳನ್ನು ಒಳಗೊಂಡಿದೆ.

ಈ ಯೋಜನೆಯು ಕೇಂದ್ರ ಸರಕಾರ ಹಾಗೂ ರಾಜ್ಯ ಸರಕಾರದ ಜಂಟಿ ಆಶ್ರಯ ದಲ್ಲಿ ನಡೆಯಲಿದ್ದು, ಒಟ್ಟು 24 ಕೋ. ರೂ.ವೆಚ್ಚದಲ್ಲಿ ನಿರ್ಮಾಣವಾಗಲಿದೆ.
ಈ ಕಟ್ಟಡವು ಎಚ್‌ಯುಡಿ-6 ಬೆಡ್‌/ಐಸಿಯು-10 ಬೆಡ್‌, ಐಸೊಲೇಶನ್‌ ವಾರ್ಡ್‌- 24 ಬೆಡ್‌, ಐಸೊಲೇಶನ್‌ ರೂಮ್‌ -2, ಡಯಾಲಿಸಿಸ್‌- 2 ಬೆಡ್‌, ಎಂಸಿಎಚ್‌ -2 ಬೆಡ್‌, ಎಮರ್ಜೆನ್ಸಿ -5 ಬೆಡ್‌, ಶಸ್ತ್ರಚಿಕಿತ್ಸಾ ಕೊಠಡಿ -2 ಒಳಗೊಂಡಿದೆ ಎಂದು ವೆನ್ಲಾಕ್‌ ಅಧೀಕ್ಷಕರ ಪ್ರಕಟನೆ ತಿಳಿಸಿದೆ.