ಉಭಯ ಸದನದ ಸದಸ್ಯರ ಕ್ಷೇಮ ಕುಶಲ

ಬೆಂಗಳೂರು: ವಿಧಾನಸೌಧ ವಜ್ರ ಮಹೋತ್ಸವ ಅಂಗವಾಗಿ ವಿಶೇಷ ಜಂಟಿ ಅಧಿವೇಶನ ನಡೆದ ವಿಧಾನಸಭೆ ಸಭಾಂಗಣ ಹೂವಿನ ಅಲಂಕಾರದಿಂದ ಕಂಗೊಳಿಸುತ್ತಿತ್ತು. ಜಂಟಿ ಅಧಿವೇಶನಕ್ಕೆ ಆಗಮಿಸಿದ್ದ ಉಭಯ ಸದನಗಳ ಸದಸ್ಯರಲ್ಲಿ ಕೆಲವರು ವಿಶೇಷ ಉಡುಪು ಧರಿಸಿ ಗಮನ ಸೆಳೆದರು.

ಸಿ.ಎಂ.ಇಬ್ರಾಹಿಂ, ಸಿ.ಪಿ.ಯೋಗೀಶ್ವರ್‌ ಕೋಟ್‌ ಧರಿಸಿ ಬಂದಿದ್ದರು. ಇಬ್ರಾಹಿಂ ಅವರು ಸದನಕ್ಕೆ ಆಗಮಿಸುತ್ತಲೇ ಜೆಡಿಎಸ್‌, ಕಾಂಗ್ರೆಸ್‌, ಬಿಜೆಪಿ ಸದಸ್ಯರು ಅವರನ್ನು ಸುತ್ತುವರೆದರು. ಹಾಸ್ಯ ಮಾಡುತ್ತಾ, ವಚನಗಳನ್ನು ಹೇಳುತ್ತಾ ತಮ್ಮ ಎಂದಿನ ಶೈಲಿಯಲ್ಲಿ ಪ್ರಸಕ್ತ ರಾಜಕಾರಣ ವಿಶ್ಲೇಷಣೆಯೂ ನಡೆಯಿತು. ಸಿ.ಎಂ.ಇಬ್ರಾಹಿಂ, ಮಾಧ್ಯಮದವರನ್ನು “ಆಪದ್ಭಾಂದವರಿಗೆ ನಮಸ್ಕಾರ. ನಾವು
ಗಣೇಶ ಮತ್ತು ಶನೇಶ್ಚರ ಪೂಜೆ ಮಾಡುವವರು’ ಎಂದು ಚಟಾಕಿ ಹಾರಿಸಿದರು. ಅದೇ ವೇಳೆ ಭದ್ರಾವತಿ ಶಾಸಕ ಎಂ.ಜೆ ಅಪ್ಪಾಜಿ ಸಭಾಂಗಣ ಪ್ರವೇಶಿಸಿದಾಗ, “ಇವರು ಒಂದು ರೀತಿ ನಮಗೆ ತೀರಾ ಆಪ್ತರು’ ಎಂದು ಹಾಸ್ಯ ಮಾಡಿದರು. ಎಚ್‌ 

ಡಿಕೆ ಆರೋಗ್ಯ ವಿಚಾರಿಸಿದ ಸದಸ್ಯರು: ಹೃದಯ ಶಸ್ತ್ರಚಿಕಿತ್ಸೆಗೊಳಗಾಗಿ ವಿಶ್ರಾಂತಿಯಲ್ಲಿದ್ದ ಎಚ್‌.ಡಿ. ಕುಮಾರಸ್ವಾಮಿ ಸದನಕ್ಕೆ ಆಗಮಿಸುತ್ತಿದ್ದಂತೆ ಕಾಂಗ್ರೆಸ್‌, ಜೆಡಿಎಸ್‌, ಬಿಜೆಪಿ ಶಾಸಕರು ಅವರ ಆಸನದತ್ತ ಬಂದು ಆರೋಗ್ಯ ವಿಚಾರಿಸಿದರು. ರಾಷ್ಟ್ರಪತಿಯವರ ಭಾಷಣ ಮುಗಿಸಿ ಹೋಗುವಾಗ ರಾಜ್ಯಪಾಲ ವಜೂಭಾಯ್‌ ವಾಲಾ, ಪರಿಷತ್‌ ಸಭಾಪತಿ ಡಿ.ಎಚ್‌.ಶಂಕರಮೂರ್ತಿ 
ಕುಮಾರಸ್ವಾಮಿಯವರ ಆರೋಗ್ಯ ವಿಚಾರಿಸಿದರು.