ಉದ್ದೀಪನ: 9 ರಾಷ್ಟ್ರಗಳಿಗೆ ವೇಟ್‌ಲಿಫ್ಟಿಂಗ್‌ ನಿಷೇಧ

ಹೊಸದಿಲ್ಲಿ: ರಶ್ಯ, ಚೀನ ಸೇರಿದಂತೆ ಒಟ್ಟು 9 ರಾಷ್ಟ್ರಗಳನ್ನು ವೇಟ್‌ಲಿಫ್ಟಿಂಗ್‌ನಿಂದ ಒಂದು ವರ್ಷ ನಿಷೇಧಿಸಲಾಗಿದೆ. ಸ್ವತ್ಛ ಕ್ರೀಡೆಗಾಗಿ ಅಂತಾರಾಷ್ಟ್ರೀಯ ವೇಟ್‌ಲಿಫ್ಟಿಂಗ್‌ ಸಮಿತಿ ಕಠಿನ ನಿರ್ಧಾರ ತೆಗೆದುಕೊಂಡಿದೆ.

ಕಜಕೀಸ್ಥಾನ್‌, ಅರ್ಮೇನಿಯಾ, ಅಜರ್‌ಬೈಜಾನ್‌, ಬೆಲಾರಸ್‌, ಮೊಲ್ಡೋವಾ, ಟರ್ಕಿ ಹಾಗೂ ಉಕ್ರೇನ್‌ ಕೂಡ ಅಮಾನತಿಗೆ ಒಳಗಾಗಿವೆ. ಈ ರಾಷ್ಟ್ರಗಳ 2008-2012ರವರೆಗಿನ ಉದ್ದೀಪನ ಮದ್ದು  ಪರೀಕ್ಷೆಯಿಂದ ವರದಿ ತೆಗೆದುಕೊಳ್ಳಲಾಗಿದ್ದು, ಇದರ ಪ್ರಕಾರ ಶಿಕ್ಷೆ ಪ್ರಕಟಿಸಲಾಗಿದೆ.

ಅಮಾನತುಗೊಂಡ ರಾಷ್ಟ್ರಗಳ ಪೈಕಿ ಒಲಿಂಪಿಕ್ಸ್‌ ವೇಳೆ ಕನಿಷ್ಠ ಎಂದರೂ 3 ಮಂದಿ ಉದ್ದೀಪನ ಮದ್ದು ಸೇವಿಸಿದ್ದಾರೆ ಎಂದು ವರದಿಯಲ್ಲಿ ದಾಖಲಾಗಿದೆ. ಪ್ರತಿ ರಾಷ್ಟ್ರಗಳು  ಉದ್ದೀಪನ ಕುರಿತು ಜಾಗೃತಿ ಅಭಿಯಾನ ಮಾಡಬೇಕು. ನಮ್ಮ ಸಮಿತಿಯ ಕೆಳಗಿರುವ ಯಾವುದೇ ಸಂಸ್ಥೆಗಳು, ರಾಷ್ಟ್ರಗಳು ಉದ್ದೀಪನ ಮದ್ದು ಸೇವಿಸುವುದನ್ನು ಸಹಿಸುವುದಿಲ್ಲ ಎಂದು ಐಡಬ್ಲ್ಯುಎಫ್ ಅಧ್ಯಕ್ಷ ಥಾಮಸ್‌ ಅಜಾನ್‌ ತಿಳಿಸಿದ್ದಾರೆ.