ಪಾಕ್‌ ವೇಗಿ ಶಹೀನ್‌ ಶಾ ಅಫ್ರಿದಿಗೆ ಟಿಪ್ಸ್‌ ನೀಡಿದ ಮೊಹಮ್ಮದ್‌ ಶಮಿ! ವಿಡಿಯೋ ವೈರಲ್

ಇದು ಕೂಡ ಮೊಹಮ್ಮದ್‌ ಶಮಿಗೆ ಸಂಬಂಧಿಸಿದ ಸ್ವಾರಸ್ಯಕರ ಸುದ್ದಿ. ಈ ಅನುಭವಿ ಬೌಲರ್‌ನಿಂದ ಮಾರ್ಗದರ್ಶನ ಪಡೆಯಲು ಭಾರತದ ಯುವ ಬೌಲರ್ ಸದಾ ಕಾದಿರುತ್ತಾರೆ. ಶಮಿ ಈ ಅವಕಾಶವನ್ನು ವ್ಯರ್ಥಗೊಳಿಸುವುದಿಲ್ಲ. ಸಮಯವಿದ್ದಾಗಲೆಲ್ಲ ಬೌಲಿಂಗ್‌ ಟಿಪ್ಸ್‌ ಹೇಳುತ್ತಿರುತ್ತಾರೆ.

ಇದೀಗ ಟಿ20 ವಿಶ್ವಕಪ್‌ ವೇಳೆ ವಿಚಿತ್ರ ದೃಶ್ಯವೊಂದು ಕಂಡುಬಂದಿದೆ. ಅವರಿಂದ ಮಾರ್ಗದರ್ಶನ ಪಡೆಯಲು ಪಾಕಿಸ್ಥಾನದ ವೇಗಿ ಶಹೀನ್‌ ಶಾ ಅಫ್ರಿದಿ ಕೂಡ ಬಂದಿರುವುದು. ನೆಟ್ಸ್‌ ವೇಳೆ ಶಮಿ ಪಾಕ್‌ ವೇಗಿಗೆ ಪಾಠ ಹೇಳುತ್ತಿರುವ ದೃಶ್ಯಾವಳಿ ವೈರಲ್‌ ಆಗಿದೆ.

ಮಾರ್ನೆ ಕಾ ಮೂಡ್‌ ಹೀ ನಹೀ…
ಎಂದಿನಂತೆ ಸೂರ್ಯಕುಮಾರ್‌ ಯಾದವ್‌ ಆಸ್ಟ್ರೇಲಿಯ ವಿರುದ್ಧದ ಅಭ್ಯಾಸ ಪಂದ್ಯದಲ್ಲಿ ಪ್ರಚಂಡ ಬ್ಯಾಟಿಂಗ್‌ ಮೂಲಕ ಗಮನ ಸೆಳೆದರು. ಇವರದು ಭರ್ತಿ 50 ರನ್ನುಗಳ ಕೊಡುಗೆ.

ಅರ್ಧ ಶತಕ ಪೂರ್ತಿಗೊಂಡ ಬಳಿಕ ಸೂರ್ಯಕುಮಾರ್‌ ಯಾದವ್‌ ಸಹ ಆಟಗಾರ ಅಕ್ಷರ್‌ ಪಟೇಲ್‌ ಜತೆ ಆಡಿದ ಮಾತೊಂದು ಸ್ಟಂಪ್‌ ಮೈಕ್ರೋಫೋನ್‌ನಲ್ಲಿ ದಾಖಲಾಗಿದೆ. ಮೈದಾನದಲ್ಲಿದ್ದವರಿಗೂ ಕೇಳಿಸಿದೆ.

“ಆಸ್ಟ್ರೇಲಿಯದ ಬೌಲರ್‌ಗಳನ್ನು ಇನ್ನಷ್ಟು ಸತಾಯಿಸುವುದು ನನಗೆ ಇಷ್ಟವಿಲ್ಲ’ (ಮಾರ್ನೆ ಕಾ ಮೂಡ್‌ ಹೀ ನಹೀ ಹೋ ರಹಾ ಯಾರ್‌) ಎಂದಿದ್ದರು. ಮುಂದಿನ ಎಸೆತದಲ್ಲೇ ಸೂರ್ಯಕುಮಾರ್‌ ಔಟಾದದ್ದು ಅಚ್ಚರಿಯಾಗಿ ಕಂಡಿತು.