ನ್ಯಾಯದ ಪಡಿತರಕ್ಕೆ ಅನ್ಯಾಯದ ಶುಲ್ಕ !

ವಾಡಿ: ಹೆಮ್ಮಾರಿ ಕೊರೊನಾ ಸಂಕಟಕ್ಕೆ ಸಿಲುಕಿ ಗೃಹ ಬಂಧನಕ್ಕೆ ಒಳಗಾಗಿರುವ ಕೂಲಿ ಕಾರ್ಮಿಕರು, ಸರ್ಕಾರದ ನ್ಯಾಯಬೆಲೆ ಅಂಗಡಿಗಳ ಪಡಿತರ ವಿತರಣೆ ವೇಳೆ ವಸೂಲಿ ಮಾಡುತ್ತಿರುವ ಶುಲ್ಕದಿಂದ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ.

ನಗರದಲ್ಲಿ ಸುಮಾರು 12 ನ್ಯಾಯಬೆಲೆ ಅಂಗಡಿಗಳಿವೆ. ಒಂದು ಅಂಗಡಿಯಲ್ಲಿ 500ಕ್ಕೂ ಹೆಚ್ಚು ಬಿಪಿಎಲ್‌-ಎಪಿಎಲ್‌ ಪಡಿತರ ಚೀಟಿದಾರರಿದ್ದಾರೆ. ಏ.16 ಕಳೆದರೂ ಕೆಲವು ನ್ಯಾಯಬೆಲೆ ಅಂಗಡಿಗಳಲ್ಲಿ ಪಡಿತರ ವಿತರಣೆ ಆಗಿಲ್ಲ. ಈ ಮಧ್ಯೆ ಪ್ರತಿಯೊಬ್ಬ ಫಲಾನುಭವಿಯಿಂದ ಬೆರಳಿನ ಗುರುತು ದಾಖಲಿಸಿಕೊಳ್ಳಲು 20 ರೂ. ಹಾಗೂ ಪಡಿತರ ವಿತರಿಸುವಾಗ ಕಡ್ಡಾಯವಾಗಿ 20 ರೂ. ವಸೂಲಿ (ಕೆಲ ಅಂಗಡಿಗಳಲ್ಲಿ ರೂ.20 ಮಾತ್ರ) ಮಾಡಲಾಗುತ್ತಿದೆ. ಈ ಕುರಿತು ಪ್ರಶ್ನಿಸಿದವರಿಗೆ ಶುಲ್ಕ ಪಡೆಯದೇ ಪಡಿತರ ನೀಡಲಾಗುತ್ತಿದೆ ಎಂದು ಫಲಾನುಭವಿಗಳು ದೂರಿದ್ದಾರೆ.

ಕೂಲಿನಾಲಿ ಮಾಡಿ ಬದುಕುತ್ತಿದ್ದೆವು. ಶ್ರೀಮಂತರ ಮನೆಗಳಲ್ಲಿ, ಹೋಟೆಲ್‌, ಖಾನಾವಳಿಗಳಲ್ಲಿ ಕಸ-ಮುಸುರೆ ಮಾಡಿ ಹೊಟ್ಟೆ ತುಂಬಿಸಿಕೊಳ್ಳುತ್ತಿದ್ದೆವು. ಈಗ ಕೆಲಸವೂ ಇಲ್ಲ, ಇತ್ತ ರೇಷನ್‌ ಅಂಗಡಿಯವರು ಪಡಿತರ ನೀಡಲು ವಿಳಂಬ ಮಾಡುತ್ತಿದ್ದಾರೆ. ಜತೆಗೆ ಶುಲ್ಕ ವಸೂಲಿ ಮಾಡುತ್ತಿದ್ದಾರೆ ಎಂದು ಬಿಪಿಎಲ್‌ ಫಲಾನುಭವಿ ವೃದ್ಧೆ ಕಮಲಾಬಾಯಿ ತಮ್ಮ ಅಳಲು ತೋಡಿಕೊಂಡಿದ್ದಾರೆ.