ರೋಲ್‌ ಮಾಡೆಲ್‌ ಸಂಗಕ್ಕರ- ಸ್ಮತಿ ಮಂಧನಾ ಭೇಟಿ

ಟಾಂಟನ್‌: ರವಿವಾರ ಸಿಡಿಲಬ್ಬರ ಅರ್ಧ ಶತಕ ಬಾರಿಸಿ ಮಿಂಚಿದ ಸ್ಮತಿ ಮಂಧನಾಗೆ ಸಂಜೆಯ ವೇಳೆ ಇನ್ನೊಂದು ಅಚ್ಚರಿ ಕಾದಿತ್ತು. ಅವರು ಯಾರನ್ನು ತಮ್ಮ ಕ್ರಿಕೆಟಿನ ರೋಲ್‌ ಮಾಡೆಲ್‌ ಎಂದು ಆರಾಧಿಸುತ್ತಿದ್ದರೋ, ಅವರನ್ನೇ ಭೇಟಿಯಾಗುವ ಅಪೂರ್ವ ಅವಕಾಶವೊಂದು ಭಾರತೀಯ ಆಟಗಾರ್ತಿಗೆ ಎದುರಾಗಿತ್ತು. ಆ ರೋಲ್‌ ಮಾಡೆಲ್‌ ಬೇರೆ ಯಾರೂ ಅಲ್ಲ, ಶ್ರೀಲಂಕಾದ ಬ್ಯಾಟಿಂಗ್‌ ಹಾಗೂ ಕೀಪಿಂಗ್‌ ಸ್ಟಾರ್‌ ಎನಿಸಿದ್ದ ಕುಮಾರ ಸಂಗಕ್ಕರ!

ಕುಮಾರ ಸಂಗಕ್ಕರ ಜತೆ ಇದ್ದ ಚಿತ್ರವೊಂದನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಾಕಿರುವ ಸ್ಮತಿ ಮಂಧನಾ, “ಇದು ನನ್ನ ದಿನ. ನನ್ನ ಪಾಲಿಗಿದು ಸ್ಮರಣೀಯ ದಿನ. ಈ ಕ್ಷಣವನ್ನು ಹೇಗೆ ಬಣ್ಣಿಸಬೇಕೆಂದು ತಿಳಿಯುತ್ತಿಲ್ಲ. ನನ್ನ ಸಂತಸ ಉಕ್ಕಿ ಹರಿಯುತ್ತಿದೆ. ಈ ಮಧುರ ನೆನಪು ಸದಾ ನನ್ನ ಜತೆಗಿರುತ್ತದೆ’ ಎಂದು ಹೇಳಿಕೊಂಡಿದ್ದಾರೆ.

ಟಾಂಟನ್‌ನಲ್ಲಿ ನಡೆದ ಪಂದ್ಯದ ವೇಳೆ ಮಂಧನಾ ಆಟಕ್ಕೆ ಸಂಗಕ್ಕರ ಕೂಡ ಸಾಕ್ಷಿಯಾಗಿದ್ದರು.