“ಕಿರಾತಕ’ನ ಸೆಟ್‍ಗೆ ಅಮರ್ ಭೇಟಿ

ರಾಕಿಂಗ್​ ಸ್ಟಾರ್​ ಯಶ್​ ಅಭಿನಯದ ಬಹುನಿರೀಕ್ಷಿತ ಸಿನಿಮಾ “ಮೈ ನೇಮ್​ ಈಸ್​ ಕಿರಾತಕ’ ಚಿತ್ರದ ಚಿತ್ರೀಕರಣ ಬಿರುಸಿನಿಂದ ಸಾಗಿದ್ದು, ಈ ಮಧ್ಯೆ ಶೂಟಿಂಗ್​ ಸೆಟ್​ಗೆ ಯಂಗ್​ ರೆಬೆಲ್​ ಸ್ಟಾರ್​​ ಅಭಿಷೇಕ್​ ಅಂಬರೀಶ್​ ಭೇಟಿ ಕೊಟ್ಟಿದ್ದಾರೆ.

ಹೌದು! ಅಭಿಷೇಕ್​ ಅಂಬರೀಶ್​ ಶನಿವಾರ ಮಧ್ಯಾಹ್ನ ಚಿತ್ರೀಕರಣದ ಸ್ಥಳಕ್ಕೆ ಭೇಟಿ ನೀಡಿ ಸುಮಾರು ಹೊತ್ತು ಶೂಟಿಂಗ್ ವೀಕ್ಷಿಸಿ, ಅನಂತರ ಯಶ್​ ಜೊತೆ ಕೆಲ ಸಮಯ ಮಾತನಾಡಿ ಕಾಲ ಕಳೆದರು. ಅಲ್ಲದೇ ಯಶ್​ ಜೊತೆಗೆ ಕಳೆದ ಸಂತಸದ ಕ್ಷಣವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

ಯಶ್​ ಇತ್ತೀಚೆಗಷ್ಟೇ ಅಭಿ ಹುಟ್ಟುಹಬ್ಬದ ಪಾರ್ಟಿ ಕಾರ್ಯಕ್ರಮದಲ್ಲಿ ಭಾಗಿಯಾಗಿದಲ್ಲದೇ ತಮ್ಮ ಸೆಟ್​ಗೆ ಬರುವಂತೆ ಅಭಿಗೆ ಆಮಂತ್ರಣವನ್ನು ನೀಡಿದ್ದರಿಂದ, ಸೆಟ್​ಗೆ ಎಂಟ್ರಿ​ ಕೊಟ್ಟಿದ್ದಾರೆ ಅಭಿಷೇಕ್​ ಅಂಬರೀಶ್. ಇನ್ನು ಮುಖ್ಯವಾಗಿ ಅಭಿಷೇಕ್​, ಯಶ್​ ತೊಟ್ಟಿದ್ದ ಬಣ್ಣ ಬಣ್ಣದ ಶರ್ಟ್​​​ನ ಈ ಬಾರಿಯ ಕ್ರಿಸ್​ಮಸ್​ ಹಬ್ಬಕ್ಕೆ ಉಡುಗೊರೆ ಆಗಿ ನೀಡುವಂತೆ ಯಶ್​ ಪತ್ನಿ ರಾಧಿಕಾ ಪಂಡಿತ್‍ ಅವರನ್ನು ಕೇಳಿದ್ದಾರೆ.

“ಮೈ ನೇಮ್​ ಈಸ್​ ಕಿರಾತಕ’ ಚಿತ್ರ “ಕಿರಾತಕ’ ಸಿನಿಮಾದ ಸೀಕ್ವೆಲ್​ ಆಗಿದ್ದು, ಚಿತ್ರವನ್ನು ಅನಿಲ್‌ ಕುಮಾರ್‌ ನಿರ್ದೇಶನ ಮಾಡುತ್ತಿದ್ದು, ಜಯಣ್ಣ ನಿರ್ಮಿಸುತ್ತಿದ್ದಾರೆ. ಯಶ್‍ಗೆ ನಾಯಕಿಯಾಗಿ “ನಂದ ಲವ್ಸ್‌ ನಂದಿತಾ’ ಖ್ಯಾತಿಯ ಶ್ವೇತ ಅಲಿಯಾಸ್‌ ನಂದಿತಾ ನಟಿಸುತ್ತಿದ್ದು, ಮತ್ತೊಬ್ಬ ನಾಯಕಿಯ ಆಯ್ಕೆ ನಡೆಯಬೇಕಿದೆ.