ಕೆಲ ಸ್ಟಾರ್‌ ಚಿತ್ರಗಳ ಚಿತ್ರೀಕರಣ ನಡೆಯುವ ಸಂದರ್ಭದಲ್ಲಿ ಹಲವು ಸ್ಟಾರ್‌ ನಟರುಗಳು ಭೇಟಿ ನೀಡಿ, ಒಂದಷ್ಟು ಮಾತುಕತೆ ನಡೆಸಿ ಬರುತ್ತಿರುವುದು ಹೊಸದೇನಲ್ಲ. ಈಗಾಗಲೇಹಲವು ಸ್ಟಾರ್‌ ನಟರು, ಸ್ಟಾರ್‌ ನಟರ ಚಿತ್ರೀಕರಣ ಸ್ಥಳಕ್ಕೆ ಭೇಟಿ ನೀಡಿ, ಕೆಲಹೊತ್ತು ಕಾಲ ಕಳೆದು ಬಂದಿರುವ ಉದಾಹರಣೆಗಳು ಸಾಕಷ್ಟು ಇವೆ. ಈಗ ಹೊಸ ಸುದ್ದಿಯೆಂದರೆ, ಯಶ್ ಅಭಿನಯದ “ಮೈ ನೇಮ್‌ ಈಸ್‌ ಕಿರಾತಕ’ ಚಿತ್ರದ ಚಿತ್ರೀಕರಣ ಸ್ಥಳಕ್ಕೆ ಯುವ ನಟ ಅಭಿಷೇಕ್‌ ಅಂಬರೀಶ್‌ ಅವರು ಭೇಟಿ ನೀಡಿದ್ದಾರೆ.
ಶನಿವಾರ “ಮೈ ನೇಮ್‌ ಈಸ್‌ ಕಿರಾತಕ’ ಚಿತ್ರದ ಚಿತ್ರೀಕರಣದಲ್ಲಿ ಯಶ್ ಪಾಲ್ಗೊಂಡಿದ್ದರು. ಈ ಮಧ್ಯೆ ಬಿಡುವು ಮಾಡಿಕೊಂಡ ಅಭಿಷೇಕ್‌ ಅಂಬರೀಶ್‌ ಅವರು, ಸೆಟ್‌ಗೆ ಭೇಟಿ ನೀಡಿ, ಕೆಲ ಹೊತ್ತು ಚಿತ್ರೀಕರಣ ವೀಕ್ಷಿಸಿದ ಬಳಿಕ ಯಶ್ ಜೊತೆಗೆ ಒಂದಷ್ಟು ಮಾತುಕತೆ ನಡೆಸಿದ್ದಾರೆ. “ಮೈ ನೇಮ್‌ ಈಸ್‌ ಕಿರಾತಕ’ ಚಿತ್ರೀಕರಣ ಸ್ಥಳಕ್ಕೆ ಹೋಗಿದ್ದ ಅಭಿಷೇಕ್‌ ಅಂಬರೀಶ್‌, ಯಶ್ ಜೊತೆ ಕಳೆದ ಖುಷಿಯ ಕ್ಷಣವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಅಭಿಷೇಕ್‌ ಅಂಬರೀಶ್‌ ಅವರ ಹುಟ್ಟು ಹಬ್ಬದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ಯಶ್, ತಮ್ಮ ಚಿತ್ರೀಕರಣ ಸೆಟ್‌ಗೆ ಬರುವಂತೆ ಅಭಿಷೇಕ್‌ ಅಂಬರೀಶ್‌ ಅವರಿಗೆ ಆಹ್ವಾನಿಸಿದ್ದರಿಂದ, ಅಭಿಷೇಕ್‌, ಚಿತ್ರೀಕರಣ ಸ್ಥಳಕ್ಕೆ ಭೇಟಿ ಕೊಟ್ಟಿದ್ದಾರೆ. ಈ ಚಿತ್ರಕ್ಕೆ ಅನಿಲ್‌ ನಿರ್ದೇಶಕರು. ಜಯಣ್ಣ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಚಿತ್ರದಲ್ಲಿ ಯಶ್‌ಗೆ ಜೋಡಿಯಾಗಿ “ನಂದ ಲವ್ಸ್‌ ನಂದಿತಾ’ ಖ್ಯಾತಿಯ ಶ್ವೇತಾ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇನ್ನೊಬ್ಬ ನಾಯಕಿಯ ಆಯ್ಕೆ ಇನ್ನಷ್ಟೇ ನಡೆಯಬೇಕಿದೆ.
ಆರಂಭದಲ್ಲಿ ಈ ಚಿತ್ರದ ಶೀರ್ಷಿಕೆ ವಿವಾದ ಎದ್ದಿತ್ತು. ಈ ಹಿಂದೆ ಯಶ್ ಅವರಿಗೆ “ಕಿರಾತಕ’ ಚಿತ್ರವನ್ನು ನಿರ್ದೇಶಿಸಿದ್ದ ಪ್ರದೀಪ್ರಾಜ್, “ಕಿರಾತಕರು’ ಎಂಬ ಶೀರ್ಷಿಕೆಯಡಿ ಇನ್ನೊಂದು ಚಿತ್ರ ನಿರ್ದೇಶಿಸುತ್ತಿದ್ದು, ಯಶ್ ಅಭಿನಯದ ಚಿತ್ರಕ್ಕೂ “ಕಿರಾತಕರು’ ಎಂದು ನಾಮಕರಣ ಮಾಡಲಾಗಿತ್ತು. ಕೊನೆಗೆ, ಆ ಶೀರ್ಷಿಕೆ ಬಿಟ್ಟುಕೊಡುವುದಿಲ್ಲ ಎಂದು ಪ್ರದೀಪ್ರಾಜ್ ಅವರು ಪಟ್ಟು ಹಿಡಿದಿದ್ದರಿಂದ, ಯಶ್ ಚಿತ್ರಕ್ಕೆ “ಮೈ ನೇಮ್‌ ಈಸ್‌ ಕಿರಾತಕ’ ಎಂದು ನಾಮಕರಣ ಮಾಡಿ ಚಿತ್ರೀಕರಣ ಶುರುಮಾಡಲಾಗಿದೆ.
