ವಿಜಯ್‌ ಹಜಾರೆ ಟ್ರೋಫಿ ಕ್ರಿಕೆಟ್‌ : ಲೀಗ್‌ ಹಂತದಲ್ಲಿ ಮುಂಬಯಿ ಅಜೇಯ

ಜೈಪುರ: ವಿಜಯ್‌ ಹಜಾರೆ ಟ್ರೋಫಿ ಏಕದಿನ ಪಂದ್ಯಾವಳಿಯಲ್ಲಿ ಮುಂಬಯಿ ಅಜೇಯ ಸಾಧನೆಯೊಂದಿಗೆ ಲೀಗ್‌ ಹಂತವನ್ನು ಮುಗಿಸಿದೆ. ಸೋಮವಾರ ನಡೆದ “ಡಿ’ ವಿಭಾಗದ 5ನೇ ಹಾಗೂ ಕೊನೆಯ ಮುಖಾಮುಖೀಯಲ್ಲಿ ಮುಂಬಯಿ ಭರ್ತಿ 200 ರನ್ನುಗಳಿಂದ ಹಿಮಾಚಲ ಪ್ರದೇಶವನ್ನು ಮಣಿಸಿತು.

ಮೊದಲು ಬ್ಯಾಟಿಂಗ್‌ ನಡೆಸಿದ ಮುಂಬಯಿ ಯಶಸ್ವಿ ಜೈಸ್ವಾಲ್‌, ಪೃಥ್ವಿ ಶಾ ಮತ್ತು ನಾಯಕ ಅಯ್ಯರ್‌ ಅವರನ್ನು ಅಗ್ಗಕ್ಕೆ ಕಳೆದುಕೊಂಡಿತು. 8 ರನ್‌ ಆಗುವಷ್ಟರಲ್ಲಿ ಈ ಮೂವರ ವಿಕೆಟ್‌ ಉರುಳಿತು. ಎಲ್ಲರ ಗಳಿಕೆಯೂ ತಲಾ 2 ರನ್‌. ಸಫ‌ìರಾಜ್‌ ಖಾನ್‌ (11) ಕೂಡ ಬೇಗ ಔಟಾದರು. ಆದರೆ ಸೂರ್ಯಕುಮಾರ್‌ ಯಾದವ್‌, ಆದಿತ್ಯ ತಾರೆ ಮತ್ತು ಶಾದೂìಲ್‌ ಠಾಕೂರ್‌ ಅವರ ದಿಟ್ಟ ಪ್ರತಿಹೋರಾಟದಿಂದ 9 ವಿಕೆಟಿಗೆ 321 ರನ್‌ ಪೇರಿಸುವಲ್ಲಿ ಯಶಸ್ವಿಯಾಯಿತು. ಜವಾಬಿತ್ತ ಹಿಮಾಚಲ ಪ್ರದೇಶ 24.1 ಓವರ್‌ಗಳಲ್ಲಿ 121 ರನ್ನಿಗೆ ಕುಸಿಯಿತು.

ಠಾಕೂರ್‌ ಮೊದಲ ಅರ್ಧ ಶತಕ
ಮುಂಬಯಿ ಇನ್ನಿಂಗ್ಸ್‌ನಲ್ಲಿ ಶಾದೂìಲ್‌ ಠಾಕೂರ್‌ ಸರ್ವಾಧಿಕ 92 ರನ್‌ ಬಾರಿಸಿದರು. 57 ಎಸೆತಗಳ ಈ ಸಿಡಿಲಬ್ಬರದ ಬ್ಯಾಟಿಂಗ್‌ ವೇಳೆ 6 ಸಿಕ್ಸರ್‌, 6 ಬೌಂಡರಿ ಸಿಡಿಯಿತು. ಇದು ಲಿಸ್ಟ್‌ ಎ ಕ್ರಿಕೆಟ್‌ನಲ್ಲಿ ಶಾದೂìಲ್‌ ಬಾರಿಸಿದ ಮೊದಲ ಅರ್ಧ ಶತಕ.
ಭಾರತ ತಂಡಕ್ಕೆ ಕರೆ ಪಡೆದ ಸೂರ್ಯಕುಮಾರ್‌ ಯಾದವ್‌ 91 ರನ್‌ (75 ಎಸೆತ, 15 ಬೌಂಡರಿ), ಕೀಪರ್‌ ಆದಿತ್ಯ ತಾರೆ 83 ರನ್‌ (98 ಎಸೆತ, 6 ಬೌಂಡರಿ, 1 ಸಿಕ್ಸರ್‌) ಕೊಡುಗೆ ಸಲ್ಲಿಸಿದರು.

ಹಿಮಾಚಲ ಪ್ರದೇಶ ಪ್ರಶಾಂತ್‌ ಸೋಲಂಕಿ, ಶಮ್ಸ್‌ ಮುಲಾನಿ ಮತ್ತು ಧವಳ್‌ ಕುಲಕರ್ಣಿ ದಾಳಿಗೆ ಕುಸಿಯಿತು.

ಕ್ವಾರ್ಟರ್‌ ಫೈನಲ್ಸ್‌
ಲೀಗ್‌ ಹಂತದಲ್ಲಿ ಉತ್ತಮ ಸಾಧನೆ ತೋರಿದ 7 ತಂಡಗಳು ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿವೆ. ಇವುಗಳೆಂದರೆ ಗುಜರಾತ್‌, ಆಂಧ್ರಪ್ರದೇಶ, ಕರ್ನಾಟಕ, ಉತ್ತರಪ್ರದೇಶ, ಕೇರಳ, ಮುಂಬಯಿ ಮತ್ತು ಸೌರಾಷ್ಟ್ರ.

ದಿಲ್ಲಿ ಮತ್ತು ಉತ್ತರಾಖಂಡ ತಂಡಗಳು ರವಿವಾರದ ಎಲಿಮಿನೇಟರ್‌ ಪಂದ್ಯದಲ್ಲಿ ಮುಖಾಮುಖೀಯಾಗಲಿವೆ. ಇಲ್ಲಿ ಗೆದ್ದ ತಂಡ ಕ್ವಾರ್ಟರ್‌ ಫೈನಲ್‌ ತಲುಪಲಿದೆ.

ಸಂಕ್ಷಿಪ್ತ ಸ್ಕೋರ್‌: ಮುಂಬಯಿ-9 ವಿಕೆಟಿಗೆ 321 (ಠಾಕೂರ್‌ 92, ಸೂರ್ಯ ಕುಮಾರ್‌ 91, ತಾರೆ 83, ರಿಷಿ ಧವನ್‌ 84ಕ್ಕೆ 4, ಪಂಕಜ್‌ ಜೈಸ್ವಾಲ್‌ 65ಕ್ಕೆ 3). ಹಿಮಾಚಲ ಪ್ರದೇಶ-24.1 ಓವರ್‌ಗಳಲ್ಲಿ 121 (ಸೋಲಂಕಿ 31ಕ್ಕೆ 4, ಮುಲಾನಿ 42ಕ್ಕೆ 3, ಕುಲಕರ್ಣಿ 8ಕ್ಕೆ 2).