ಜಮ್ಮು ಕಾಶ್ಮೀರ: ಮಾಜಿ ಸಚಿವ, ಬಿಜೆಪಿ ಅಭ್ಯರ್ಥಿ ಅಹ್ಮದ್‌ ಶಾ ಬುಖಾರಿ ನಿಧನ

ಶ್ರೀನಗರ: ಜಮ್ಮು – ಕಾಶ್ಮೀರ ಮಾಜಿ ಸಚಿವ, ಸುರನ್‌ಕೋಟ್‌ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಮುಷ್ತಾಕ್‌ ಅಹ್ಮದ್‌ ಶಾ ಬುಖಾರಿ ಬುಧವಾರ ಪೂಂಚ್‌ ಜಿಲ್ಲೆಯ ತಮ್ಮ ನಿವಾಸದಲ್ಲಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ.

75 ವರ್ಷದ ಬುಖಾರಿ ಕೆಲ ದಿನಗಳಿಂದ ಅನಾರೋಗ್ಯಕ್ಕೀಡಾಗಿದ್ದರು. 4 ದಶಕಗಳ ಕಾಲ ನ್ಯಾಷನಲ್‌ ಕಾನ್ಫರೆನ್ಸ್‌ ಪಕ್ಷದಲ್ಲಿ ಗುರಿತಿಸಿಕೊಂಡಿದ್ದ ಬುಖಾರಿ 2 ಅವಧಿಗೆ ಸುರನ್‌ಕೋಟ್‌ ಶಾಸಕರಾಗಿದ್ದರು.

2023ರಲ್ಲಿ ತಮ್ಮ ಪಹಾಡಿ ಸಮುದಾಯಕ್ಕೆ ಕೇಂದ್ರ ಸರ್ಕಾರ ಪರಿಶಿಷ್ಟ ಪಂಗಡ ಸ್ಥಾನಮಾನ ನೀಡಿದ ಬಳಿಕ 2023ರ ಫೆಬ್ರವರಿಯಲ್ಲಿ ಬುಖಾರಿ ಬಿಜೆಪಿ ಸೇರಿದ್ದರು. ಕಾಶ್ಮೀರದ ಚುನಾವಣಾ ಫ‌ಲಿತಾಂಶ ಅ.8ರಂದು ಪ್ರಕಟವಾಗಲಿದೆ. ಒಂದು ವೇಳೆ ಬುಖಾರಿ ಗೆದ್ದರೆ ಅಲ್ಲಿ ಮತ್ತೆ ಚುನಾವಣೆ ನಡೆಸಬೇಕಾಗುತ್ತದೆ.