US Open 2023 badminton: ಸಿಂಧು, ಲಕ್ಷ್ಯ ಸೇನ್‌ ಮುನ್ನಡೆ

ಕೌನ್ಸಿಲ್‌ ಬ್ಲುಫ್ಸ್: ಒಲಿಂಪಿಕ್‌ ಪದಕ ವಿಜೇತೆ ಪಿ.ವಿ. ಸಿಂಧು ಅವರು ಭಾರತೀಯ ಮೂಲದ ಅಮೆರಿಕದ ಎದುರಾಳಿ ದಿಶಾ ಗುಪ್ತ ಅವರನ್ನು ಯುಎಸ್‌ ಓಪನ್‌ ಸೂಪರ್‌ 300 ಕೂಟದಲ್ಲಿ ಸೋಲಿಸಿ ಮುನ್ನಡೆದಿದ್ದಾರೆ. ಇದೇ ವೇಳೆ ಲಕ್ಷ್ಯ ಸೇನ್‌ ಫಿನ್ಲಂಡಿನ ಕಲ್ಲೆ ಕೊಲ್ಜೊನೆನ್‌ ಅವರನ್ನು ಸುಲಭವಾಗಿ ಮಣಿಸಿ ಶುಭಾರಂಭ ಮಾಡಿದ್ದಾರೆ.

ಕೇವಲ 27 ನಿಮಿಷಗಳ ಕಾದಾಟದಲ್ಲಿ ಸಿಂಧು ಅವರು ದಿಶಾ ಅವರನ್ನು 21-15, 21-12 ಗೇಮ್‌ಗಳಿಂದ ಉರುಳಿಸಿದರೆ ಲಕ್ಷ್ಯ ಸೇನ್‌ ಅವರು ಕೊಲ್ಜೊನೆನ್‌ ಅವರನ್ನು 21-8, 21-16 ಗೇಮ್‌ಗಳಿಂದ ಸೋಲಿಸಿದರು. ಇನ್ನೊಂದು ಸಿಂಗಲ್ಸ್‌ ಪಂದ್ಯದಲ್ಲಿ ಎಸ್‌. ಶಂಕರ್‌ ಸುಬ್ರಮಣಿಯನ್‌ ಹಟ್‌ ಗುಯೆನ್‌ ಅವರನ್ನು 21-11, 21-16 ಗೇಮ್‌ಗಳಿಂದ ಸೋಲಿಸಿ ದ್ವಿತೀಯ ಸುತ್ತು ತಲುಪಿದರು. ಅವರು ಅರ್ಹತಾ ಸುತ್ತಿನಲ್ಲಿ ಕಠಿನ ಸ್ಪರ್ಧೆಯಲ್ಲಿ ವಿಜೇತರಾಗಿ ಮುಖ್ಯ ಡ್ರಾಕ್ಕೆ ತೇರ್ಗಡೆಯಾಗಿದ್ದರು.

ಇದೇ ವೇಳೆ ಬಿ. ಸಾಯಿ ಪ್ರಣೀತ್‌ ಅವರು 23ರ ಹರೆಯದ ವಿಶ್ವದ 7ನೇ ರ್‍ಯಾಂಕಿನ ಚೀನದ ಆಟಗಾರ ಲಿ ಶಿ ಫೆಂಗ್‌ ಅವರಿಗೆ 16-21, 21-14, 21-19 ಗೇಮ್‌ಗಳಿಂದ ಶರಣಾದರು. ಇನ್ನೊಂದು ಪಂದ್ಯದಲ್ಲಿ ಪಾರುಪಳ್ಳಿ ಕಶ್ಯಪ್‌ 21-23, 7-11ರಿಂದ ಹಿನ್ನಡೆಯಲ್ಲಿದ್ದಾಗ ಪಂದ್ಯ ತ್ಯಜಿಸಿದರು.