ವಿವಾದಾತ್ಮಕ ಮೀಸೆ ಕತ್ತರಿಸಿಕೊಂಡ ಅಮೆರಿಕ ರಾಯಭಾರಿ ಹ್ಯಾರಿಸ್

ಸಿಯೋಲ್‌: ದಕ್ಷಿಣ ಕೊರಿಯಾದಲ್ಲಿ ಅಮೆರಿಕದ ರಾಯಭಾರಿಯಾಗಿರುವ ಹ್ಯಾರಿ ಹ್ಯಾರಿಸ್‌ ಅವರು ಕೊರಿಯಾದ ಸಾಂಪ್ರದಾಯಿಕ ಕ್ಷೌರಿಕನ ಅಂಗಡಿಯಲ್ಲಿ ತಮ್ಮ ಮೀಸೆಯನ್ನು ತೆಗೆಸಿಕೊಂಡಿದ್ದು, ಈ ಕುರಿತಾದ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ. ಬೇಸಿಗೆಯ ಈ ದಿನಗಳಲ್ಲಿ ತಂಪಾಗಿರಲು ಹಾಗೂ ಕೋವಿಡ್ ಹಿನ್ನೆಲೆಯಲ್ಲಿ ಮುಖಕ್ಕೆ ಮಾಸ್ಕ್ ಧರಿಸಲು ಅನುಕೂಲವಾಗಲೆಂದು ಮೀಸೆಯನ್ನು ತೆಗೆಸಿದ್ದಾಗಿ ಅವರು ತಿಳಿಸಿದ್ದಾರೆ. ಅವರ ದಪ್ಪ ಮೀಸೆ ದಕ್ಷಿಣ ಕೊರಿಯಾದಲ್ಲಿ ವ್ಯಾಪಕ ಟೀಕೆಗೆ ಗುರಿಯಾಗಿತ್ತು.

ದ.ಕೊರಿಯಾದಲ್ಲಿ ಹೆಚ್ಚಿನ ಜನ ಮೀಸೆ ಬೆಳೆಸುವುದಿಲ್ಲ. ಅದು ಮುಖದ ಸೌಂದರ್ಯ, ಗಂಭೀರತೆ ಹಾಗೂ ಸ್ವಚ್ಛತೆಯನ್ನು ಹಾಳುಗೆಡವುತ್ತದೆ. ಒಂದೊಮ್ಮೆ ಹೊಂದಿದ್ದರೂ ಅದು ಚಿಕ್ಕದಾಗಿ ಇರಬೇಕು ಎಂಬುದು ಅವರ ನಂಬಿಕೆ. ಅವರ ಈ ನಂಬಿಕೆ ಆನುವಂಶೀಯವಾಗಿ ನಡೆದುಕೊಂಡು ಬಂದಿದೆ. ಹೀಗಾಗಿಯೇ ಬಹುತೇಕ ಕೊರಿಯನ್ನರು ಗಡ್ಡ ಹಾಗೂ ಮೀಸೆಯನ್ನು ಪ್ರತಿದಿನ ತೆಗೆಯುತ್ತಾರೆ. ಹೀಗಾಗಿ, ಹ್ಯಾರಿಸ್‌ರ ದಪ್ಪ ಮೀಸೆ ವ್ಯಾಪಕ ಚರ್ಚೆಗೆ ಕಾರಣವಾಗಿತ್ತು. ಈ ಹಿಂದೆ ಜನವರಿಯಲ್ಲಿ ಅವರು ಈ ಟೀಕೆಗೆ ಪ್ರತಿಕ್ರಿಯಿಸಿ, ಇದು ತಮ್ಮ ಸ್ವಂತ ವಿಷಯ ಎಂದು ಕಿಡಿ ಕಾರಿದ್ದರು.