ಪಿಎಸ್ ಎಲ್ ಆರಂಭದ ದಿನವೇ ಆಘಾತ: ಉಮರ್ ಅಕ್ಮಲ್ ರನ್ನು ಅಮಾನತು ಮಾಡಿದ ಪಿಸಿಬಿ

ಇಸ್ಲಮಾಬಾದ್: ಕ್ರಿಕೆಟ್ ಆಟಗಾರ ಉಮರ್ ಅಕ್ಮಲ್ ರನ್ನು ಪಾಕಿಸ್ಥಾನ ಕ್ರಿಕೆಟ್ ಮಂಡಳಿ ಅಮಾನತು ಮಾಡಿದೆ. ಗುರುವಾರದಿಂದಲೇ ಜಾರಿಗೆ ಬರುವಂತೆ ಉಮರ್ ಅಕ್ಮಲ್ ರನ್ನು ಅಮಾನತು ಮಾಡಿದ್ದು, ಇದಿರಿಂದಾಗಿ ಅವರು ಇಂದಿನಿಂದ ಆರಂಭವಾಗಲಿರುವ  ಪಿಎಸ್ ಎಲ್ ನಲ್ಲಿ ಆಡುವ ಅವಕಾಶ ಕಳೆದುಕೊಂಡಿದ್ದಾರೆ.

ಪಿಸಿಬಿಯು ಭ್ರಷ್ಟಾಚಾರ ವಿರೋಧಿ ನಿಯಮದ 4.7.1 ನಿಯಮ ಉಲ್ಲಂಘನೆಯಾದ ಕಾರಣ ಉಮರ್ ಅಕ್ಮಲ್ ರನ್ನು ಅಮಾನತು ಮಾಡಿದೆ. ತನಿಖೆ ಇನ್ನೂ ಜಾರಿಯಲ್ಲಿರುವ ಕಾರಣ ಹೆಚ್ಚಿನ ವಿಷಯ ಬಹಿರಂಗ ಮಾಡುವಂತಿಲ್ಲ ಎಂದು ಪಿಸಿಬಿ ಹೇಳಿದೆ.

ಅಮಾನತು ಆದೇಶ ಜಾರಿಯಲ್ಲಿರುವ ತನಕ ಉಮರ್ ಅಕ್ಮಲ್ ಯಾವುದೇ ರೀತಿಯ ಕ್ರಿಕೆಟ್ ಚಟುವಟಿಕೆಗಳಲ್ಲಿ ಭಾಗವಹಿಸುವಂತಿಲ್ಲ. ಪಿಎಸ್ ಎಲ್ ನಲ್ಲಿ ಕ್ವೆಟ್ಟಾ ಗ್ಲಾಡಿಯೇಟರ್ ತಂಡವನ್ನು ಉಮರ್ ಅಕ್ಮಲ್ ಪ್ರತಿನಿಧಿಸುತ್ತಿದ್ದರು. ಇವರ ಅಮಾನತಿನ ಕಾರಣ ಬದಲಿ ಆಟಗಾರನನ್ನು ಖರೀದಿಸಲು ತಂಡಕ್ಕೆ ಅವಕಾಶ ನೀಡಲಾಗಿದೆ.

ಫೆಬ್ರವರಿ 20ರಿಂದ ಮಾರ್ಚ್ 22ರವರೆಗೆ ಪಿಎಸ್ ಎಲ್ ಕೂಟ ನಡೆಯಲಿದೆ. ಮೊದಲ ಪಂದ್ಯದಲ್ಲಿ ಕ್ವೆಟ್ಟಾ ಗ್ಲಾಡಿಯೇಟರ್ ಮತ್ತು ಇಸ್ಲಮಾಬಾದ್ ಯುನೈಟೆಡ್ ಮುಖಾಮುಖಿಯಾಗಲಿದೆ.