ಉಡುಪಿ: “ಗಂಧದ ಕುಡಿ’ಚಲನಚಿತ್ರ ಬಿಡುಗಡೆ

ಉಡುಪಿ: ಗಂಧದ ಕುಡಿ ಚಲನಚಿತ್ರ ಬಿಡುಗಡೆಗೂ ಮುನ್ನವೇ 21 ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಪ್ರಶಸ್ತಿ ಪಡೆದಿದೆ. ಪ್ರತಿಯೊಬ್ಬರೂ ನೋಡುವಂತಹ ಅಂಶಗಳು ಚಿತ್ರದಲ್ಲಿವೆ ಎಂದು ಸಮಾಜಸೇವಕ ದಯಾನಂದ ಶೆಟ್ಟಿ ಅಭಿಪ್ರಾಯಪಟ್ಟರು.

ಆಶೀರ್ವಾದ್‌ ಚಿತ್ರಮಂದಿರದಲ್ಲಿ ಶುಕ್ರವಾರ “ಗಂಧದ ಕುಡಿ’ ಚಲನಚಿತ್ರ ಬಿಡುಗಡೆ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಕಲ್ಯಾಣಪುರ ರೋಟರಿ ಕ್ಲಬ್‌ ಅಧ್ಯಕ್ಷ ಬ್ರಾನ್‌ ಡಿ’ಸೋಜಾ ಮಾತನಾಡಿ, ಗ್ರಾಮೀಣ ಪ್ರದೇಶದಿಂದ ಬಂದಂತಹ ಸತ್ಯೇಂದ್ರ ಪೈ ಅವರು ಉತ್ತಮ ಚಿತ್ರ ನಿರ್ಮಿಸಿದ್ದಾರೆ. ಇಂತಹ ಚಿತ್ರಗಳು ಮತ್ತಷ್ಟು ಹೊರಹೊಮ್ಮಬೇಕು ಎಂದರು.
ಅತಿಥಿಯಾಗಿದ್ದ ರೋಟರಿಯ ರಾಜಾರಾಂ ಭಟ್‌ ಮಾತನಾಡಿ, ಈ ಚಿತ್ರದಲ್ಲಿ ಮನೋರಂಜನೆ ಹಾಗೂ ಉತ್ತಮ ಸಂದೇಶ ಇದೆ. ಚಿತ್ರದಲ್ಲಿರುವ ನೀತಿಯನ್ನು ಪ್ರತಿಯೊಬ್ಬರೂ ಅಳವಡಿಸಿ ಕೊಳ್ಳಬೇಕು ಎಂದರು.

ಅಗಲಿದ ಚಿತ್ರದ ನಿರ್ದೇಶಕ ಸಂತೋಷ್‌ ಶೆಟ್ಟಿ ಕಟೀಲು ಅವರಿಗೆ ಸಂತಾಪ ಸೂಚಿಸಲಾಯಿತು.

ಕೆಮರಾಮೆನ್‌ ಸಚಿನ್‌ ಶೆಟ್ಟಿ, ವಸಂತ ನಾಯಕ್‌ ಉಪಸ್ಥಿತರಿದ್ದರು. ಪ್ರಕಾಶ್‌ ಸುವರ್ಣ ಕಟಪಾಡಿ ವಂದಿಸಿದರು. ಅರವಿಂದ ಶೆಟ್ಟಿ ಕೊಜಕೊಳ್ಳಿ ನಿರೂಪಿಸಿದರು.

ಮಲೆನಾಡಿನ ರಮಣೀಯ ತಾಣಗಳು
ಪಶ್ಚಿಮ ಘಟ್ಟಗಳ ನಾಶದಿಂದ ಉಂಟಾಗುವ ಜಾಗತಿಕ ದುಷ್ಪರಿಣಾಮ ವನ್ನು ಎಳೆಎಳೆಯಾಗಿ ಈ ಚಿತ್ರದಲ್ಲಿ ತೋರ್ಪಡಿಸಲಾಗಿದೆ. ದಿನದಿಂದ ದಿನಕ್ಕೆ ನಾಶವಾಗುತ್ತಿರುವ ಪಶ್ಚಿಮ ಘಟ್ಟಗಳನ್ನು ಉಳಿಸಿ ಬೆಳೆಸುವ ಕಥಾವಸ್ತು ಈ
ಚಿತ್ರದಲ್ಲಿವೆ. ಮಲೆನಾಡಿನ ರಮಣೀಯ ತಾಣಗಳು ಮನೋಜ್ಞವಾಗಿ ಮೂಡಿ
ಬಂದಿವೆ. ಮಕ್ಕಳಿಗೆ ಪರಿಸರ ರಕ್ಷಣೆಯ ಕಾಳಜಿಯ ಜತೆಗೆ ಅವರ ಅಭಿರುಚಿಗೆ ತಕ್ಕಂತೆ ಮನೋರಂಜನಾತ್ಮಕ ಅಂಶಗಳೂ ಇವೆ.