“ಏಸು ಕ್ರಿಸ್ತನ ಪ್ರೀತಿಯ ಸಂದೇಶ ಪ್ರಚುರಪಡಿಸಿದ ಸ್ಪರ್ಧೆ’

ಉಡುಪಿ: ‘ಉದಯವಾಣಿ’ ಮತ್ತು ‘ಅಪ್ನಾ ಹಾಲಿಡೇಸ್‌’ ಸಹಯೋಗದಲ್ಲಿ ಕ್ರಿಸ್ಮಸ್‌ ಹಬ್ಬದ ಪ್ರಯುಕ್ತ ಆಯೋಜಿಸಿದ ಗೋದಲಿ ಫೋಟೋ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಮಣಿಪಾಲದ ಮಧುವನ್‌ ಸೆರಾಯ್‌ ಹೊಟೇಲ್‌ ಸಭಾಂಗಣದಲ್ಲಿ ಬುಧವಾರ ಬಹುಮಾನ ವಿತರಿಸಲಾಯಿತು.

ದಿನ ಪತ್ರಿಕೆಯೊಂದು ಇದೇ ಮೊದಲಬಾರಿ ಗೋದಲಿ ಫೋಟೋ ಸ್ಪರ್ಧೆಯನ್ನು ನಡೆಸಿರುವುದು ಅಭಿನಂದನೀಯ. ಇದು ಸಮುದಾಯವನ್ನು ಒಂದುಗೂಡಿಸುವ ಕ್ರಮವಾಗಿದೆ. ಇದಕ್ಕೆ ಜನರೂ ಉತ್ತಮವಾಗಿ ಸ್ಪಂದಿಸಿದ್ದಾರೆ. ಯೇಸುಕ್ರಿಸ್ತರು ಮನುಕುಲಕ್ಕೆ ಕೊಟ್ಟ ಪ್ರೀತಿಯ ಸಂದೇಶ ಸ್ಪರ್ಧೆಯ ಮೂಲಕ ಪ್ರಚುರಪಡಿಸಲಾಗಿದೆ ಎಂದು ಉಡುಪಿಯ ಪ್ರಧಾನ ಧರ್ಮಗುರು ವಂ| ವಲೇರಿಯನ್‌ ಮೆಂಡೋನ್ಸಾ ಬಹುಮಾನ ವಿತರಿಸಿ ಮೆಚ್ಚುಗೆ ಸೂಚಿಸಿದರು.

ಯೇಸುಕ್ರಿಸ್ತರ ಬೋಧನೆಯಲ್ಲಿ ಪರಿಸರದವರೊಂದಿಗೆ ಪ್ರೀತಿಯಿಂದ ಬಾಳುವುದು ಮತ್ತು ಕ್ಷಮೆ ಮುಖ್ಯವಾದುದು. ಸತ್ಯ ಮತ್ತು ಅಹಿಂಸೆಯಿಂದ ಬ್ರಿಟಿಷರ ಅರಸೊತ್ತಿಗೆಯನ್ನು ಕಿತ್ತೆಸೆದ ಮಹಾತ್ಮಾ ಗಾಂಧೀಯವರೂ ಯೇಸುಕ್ರಿಸ್ತರ ಸಂದೇಶಗಳಿಂದ ಪ್ರಭಾವಿತರಾಗಿದ್ದರು. ಈಗ ಸಮಾಜದಲ್ಲಿ ಅಗತ್ಯವಿರುವುದು ಜನರನ್ನು ಒಂದುಗೂಡಿಸುವುದಾಗಿದೆ. ಯಾವುದೇ ಮತಧರ್ಮದವರಿದ್ದರೂ ಪರಸ್ಪರ ಅರಿತು ಸಹೋದರರಂತೆ ಬಾಳಬೇಕು. ಸಮಸ್ಯೆಗಳು ಎಲ್ಲರಿಗೂ ಒಂದೇ ತೆರನಾಗಿ ಬರುತ್ತವೆ. ಆಗ ನಾವು ಮನುಕುಲದ ಶ್ರೇಯಸ್ಸಿಗಾಗಿ ಪ್ರಯತ್ನಿಸಬೇಕು. ಉದಯವಾಣಿ ಪ್ರೀತಿ ಮತ್ತು ಶಾಂತಿಯ ಸಂದೇಶಕ್ಕೆ ಹೆಚ್ಚು ಒತ್ತು ಕೊಡುತ್ತಿದೆ ಎಂದು ವಂ| ಮೆಂಡೋನ್ಸಾ ಹೇಳಿದರು.

ನಿರೀಕ್ಷೆಗೂ ಮೀರಿ ಪ್ರತಿಕ್ರಿಯೆ
‘ಉದಯವಾಣಿ’ಗೆ 50 ವರ್ಷಆಗುತ್ತಿರುವ ಸಂದರ್ಭ ದಿನ ಪತ್ರಿಕೆಗಳ ಲ್ಲಿಯೇ ಮೊದಲ ಬಾರಿ ಗೋದಲಿಸ್ಪರ್ಧೆಯನ್ನು ನಡೆಸಲು ನಿರ್ಧರಿಸಿದೆವು. ಕ್ರೈಸ್ತ ಸಮುದಾಯವು ಒಟ್ಟು ಸಮಾಜದ ಆಧಾರಸ್ತಂಭವಿದ್ದಂತೆ. ನಮ್ಮ ಪತ್ರಿಕೆ ಬೆಳೆಯುವಲ್ಲಿಯೂ ಸಮುದಾಯದ ಕೊಡುಗೆ ಅಪಾರವಿದೆ. ನಾವು ಸ್ಪರ್ಧೆಯನ್ನು ನಡೆಸಲು ನಿರ್ಧರಿಸಿದಾಗ ಮಂಗಳೂರು ಮತ್ತು ಉಡುಪಿ ಬಿಷಪ್‌ ಅವರು ಬೆನ್ನು ತಟ್ಟಿ ಪ್ರೋತ್ಸಾಹಿಸಿದರು. ಸ್ಪರ್ಧೆಗೆ ನಿರೀಕ್ಷೆಗೂ ಮೀರಿ ಪ್ರತಿಕ್ರಿಯೆಗಳು ಬಂದವು. ಮುಂದಿನ ವರ್ಷ ಇನ್ನಷ್ಟು ಕ್ರಿಯಾಶೀಲವಾಗಿ ಸ್ಪರ್ಧೆಯನ್ನು ನಡೆಸಲಾಗುವುದು ಎಂದು ಅಧ್ಯಕ್ಷತೆ ವಹಿಸಿ ಪ್ರಸ್ತಾವನೆಗೈದ ಮಣಿಪಾಲ್‌ ಮೀಡಿಯ ನೆಟ್ವರ್ಕ್‌ ಲಿ. ಸಿಇಒ ವಿನೋದಕುಮಾರ್‌ ಹೇಳಿದರು.

ಉದಯವಾಣಿಗೆ 50 ವರ್ಷವಾದರೆ ಉದಯವಾಣಿಯೊಂದಿಗೆ ನನಗೆ 39 ವರ್ಷಗಳ ಸಂಬಂಧವಿದೆ. 1980ರಲ್ಲಿ ಜಾಹೀರಾತು ಏಜೆನ್ಸಿಯನ್ನು ಆರಂಭಿಸಿದೆ. 2007ರಲ್ಲಿ ಪ್ರವಾಸ ಏರ್ಪಡಿಸುವ ಅಪ್ನಾ ಹಾಲಿಡೇಸ್‌ ಸಂಸ್ಥೆಯನ್ನು ಆರಂಭಿಸಿದೆ. ಇವೆರಡೂ ಸಂದರ್ಭ ನಮ್ಮ ಬೆಳವಣಿಗೆಗೆ ಉದಯವಾಣಿ ಪೂರ್ಣ ಸಹಕಾರ ನೀಡಿದೆ ಎಂದು ಮುಖ್ಯ ಅತಿಥಿ ಅಪ್ನಾ ಹಾಲಿಡೇಸ್‌ ಮಾಲಕ ಮ. ನಾಗರಾಜ ಹೆಬ್ಟಾರ್‌ ಹೇಳಿದರು.

ಬಹುಮಾನಿತರ ಪರವಾಗಿ ಮೂಡಬಿದಿರೆ ತೋಡಾರಿನ ಜಾನ್‌ ಮಿರಾಂಡ ಮತ್ತು ಮಂಗಳೂರು ಮಾರ್ನಮಿಕಟ್ಟೆಯ ಮೇರಿ ಅವರು ಮಾತನಾಡಿ ‘ಉದಯವಾಣಿ’ ನಡೆಸಿದ ಸ್ಪರ್ಧೆಯಿಂದ ಗೋದಲಿ ನಿರ್ಮಾಣದಲ್ಲಿ ಇನ್ನಷ್ಟು ಸೃಜನಶೀಲತೆಯನ್ನು ಕಾಪಿಟ್ಟುಕೊಳ್ಳುವಂತಾಯಿತು. ಹಿಂದಿನಿಂದಲೂ ಉದಯವಾಣಿಯನ್ನು ಓದಿ ಬೆಳೆದಿದ್ದೇವೆ. ಈಗ ಈ ಹೊಸ ಉಪಕ್ರಮ ಶ್ಲಾಘನೀಯ ಎಂದರು.

ಉದಯವಾಣಿ ಸಂಪಾದಕ ಅರವಿಂದ ನಾವಡ ವಿಜೇತರ ಪಟ್ಟಿ ವಾಚಿಸಿದರು. ಉಪಸಂಪಾದಕ ಅಶ್ವಿ‌ನ್‌ ಲಾರೆನ್ಸ್‌ ಮೂಡುಬೆಳ್ಳೆ ಸ್ವಾಗತಿಸಿ ಕಾರ್ಯಕ್ರಮ ನಿರ್ವಹಿಸಿದರು. ಉಡುಪಿ ಜಾಹೀರಾತು ವಿಭಾಗದ ಮುಖ್ಯಸ್ಥ ರಾಧಾಕೃಷ್ಣ ಕೊಡವೂರು ವಂದಿಸಿದರು.

ಬಹುಮಾನಿತರು
ಪ್ರಥಮ:  ರವಿನ್‌ ಡಿ’ಸೋಜಾ, ಸಳ್ವಾಡಿ ಕುಂದಾಪುರ.
ದ್ವಿತೀಯ:  ಜಾನ್‌ ಮಿರಾಂಡ, ತೋಡಾರು, ಮೂಡಬಿದಿರೆ, ಪಾವ್‌É ಲೋಬೋ, ಮೂಡಬಿದಿರೆ.
ತೃತೀಯ:  ಸನ್ನಿ ಮಾರ್ನಮಿಕಟ್ಟೆ ಮಂಗಳೂರು, ಪ್ರಮೀಳಾ ಡಿ’ಕುನ್ನಾ ಮಂಚಿ ಬಂಟ್ವಾಳ, ಹ್ಯಾನ್ಸೆಲ್‌ ಡಿ’ಸೋಜಾ ನೇಜಾರು ಉಡುಪಿ.
ಪ್ರೋತ್ಸಾಹಕ: ಜಾನ್ಸನ್‌ ರೇಗೋ ಕುಡುಪು ಮಂಗಳೂರು, ಚಾರ್ಲಿ ಲೋಬೋ ಮೊಡಂಕಾಪು ಬಂಟ್ವಾಳ, ಜೆನ್ನಿಫ‌ರ್‌ ಡಿ’ಸೋಜಾ ಪೇತ್ರಿ, ಚೇರ್ಕಾಡಿ, ಚಂದ್ರಶೇಖರ್‌/ಪ್ರಕಾಶ್‌ ಡೆ’ಸಾ  ಮಂಗಳೂರು.