ಫಿಫಾ ಅಂಡರ್‌-17 ವಿಶ್ವಕಪ್‌: ವಿದ್ಯಾರ್ಥಿಗಳಿಗೆ ಉಚಿತ ಪಾಸ್‌

ಕೋಲ್ಕತಾ: ಇಲ್ಲಿನ ಸಾಲ್ಟ್ಲೇಕ್‌ ಕ್ರೀಡಾಂಗಣದಲ್ಲಿ ಮುಂದಿನ ತಿಂಗಳು ನಡೆಯಲಿರುವ ಫಿಫಾ ಅಂಡರ್‌-17 ವಿಶ್ವಕಪ್‌ ಫ‌ುಟ್ಬಾಲ್‌ ಕೂಟದ ಪಂದ್ಯಗಳನ್ನು ಶಾಲಾ ಮತ್ತು ಕಾಲೇಜ್‌ ವಿದ್ಯಾರ್ಥಿಗಳು ವೀಕ್ಷಿಸುವ ಸಲುವಾಗಿ ಪಶ್ಚಿಮ ಬಂಗಾಲ ಸರಕಾರ ಸಕಲ ವ್ಯವಸ್ಥೆಗಳನ್ನು ಕಲ್ಪಿಸಲು ಪ್ರಯತ್ನಿಸುತ್ತಿದೆ.

ಅಕ್ಟೋಬರ್‌ 8ರಿಂದ ನಡೆಯಲಿರುವ ಈ ಕೂಟದ ಪಂದ್ಯಗಳನ್ನು ವೀಕ್ಷಿಸಲು ಶಾಲಾ ಮತ್ತು ಕಾಲೇಜ್‌ ವಿದ್ಯಾರ್ಥಿ-ವಿದ್ಯಾರ್ಥಿನಿಯವರಿಗೆ ಸುಮಾರು 5 ಸಾವಿರ ಉಚಿತ ಟಿಕೆಟ್‌ ನೀಡಲು ವ್ಯವಸ್ಥೆ ಮಾಡಲಾಗುತ್ತಿದೆ. ಫೈನಲ್‌ ಸಹಿತ 10  ಪಂದ್ಯಗಳು ನಡೆಯಲಿದ್ದು ಎಲ್ಲ ಪಂದ್ಯಗಳಿಗೂ ಉಚಿತ ಟಿಕೆಟ್‌ ನೀಡಲಾಗುತ್ತದೆ ಎಂದು  ಪಶ್ಚಿಮ ಬಂಗಾಲ ಶಿಕ್ಷಣ ಇಲಾಖೆಯ ಹಿರಿಯ ಅದಿಕಾರಿಯೊಬ್ಬರು ತಿಳಿಸಿದ್ದಾರೆ.

ವಿವಿಧ ಶಾಲಾ ಕಾಲೇಜ್‌ಗಳ ಮಕ್ಕಳಿಗೆ ಉಚಿತ ಪಾಸ್‌ ನೀಡಲಾಗುವುದು. ಪ್ರತಿ ದಿನವೂ ಸುಮಾರು 5 ಸಾವಿರ ಮಕ್ಕಳಿಗೆ ಉಚಿತ ಪಾಸ್‌ ವಿತರಿಸಲಾಗುವುದು ಎಂದು ಅವರು ಹೇಳಿದರು.