World Super Kabaddi League: ವಿಶ್ವ ಕಬಡ್ಡಿ ಲೀಗ್‌ಗೆ ಅನುಮತಿ

ಹೊಸದಿಲ್ಲಿ: ಭಾರತದಲ್ಲಿ ಮಾಶಲ್‌ ಸ್ಪೋರ್ಟ್ಸ್ ನಡೆಸುತ್ತಿರುವ ಪ್ರೊ ಕಬಡ್ಡಿ ಲೀಗ್‌ ಮಾದರಿಯಲ್ಲೇ ವಿಶ್ವ ಕಬಡ್ಡಿ ಲೀಗ್‌ ನಡೆಸಲು ಅಂತಾರಾಷ್ಟ್ರೀಯ ಕಬಡ್ಡಿ ಒಕ್ಕೂಟ (ಐಕೆಎಫ್) ಅನುಮತಿ ನೀಡಿದೆ. ಇದನ್ನು ಖಾಸಗಿ ಸಂಸ್ಥೆ ಎಸ್‌ಜೆ ಅಪ್‌ಲಿಫ್ಟ್ ಕಬಡ್ಡಿ ಪ್ರೈವೇಟ್‌ ಲಿ. ನಡೆಸಲು ಮುಂದಾಗಿದ್ದು, ವರ್ಲ್ಡ್ ಸೂಪರ್‌ ಕಬಡ್ಡಿ ಲೀಗ್‌ (ಡಬ್ಲ್ಯೂಎಸ್‌ಕೆಎಲ್‌) ಎಂದು ಹೆಸರಿಡಲಾಗಿದೆ.

ಮುಂದಿನ 15 ವರ್ಷಗಳ ಕಾಲ ಈ ಸಂಸ್ಥೆ ವಿಶ್ವ ಲೀಗ್‌ ನಡೆಸುವ ಹಕ್ಕುಗಳನ್ನು ಪಡೆದಿದೆ. ಆಗ್ನೇಯ ಏಷ್ಯಾ ಕಬಡ್ಡಿ ಒಕ್ಕೂಟ (ಎಸ್‌ಇಎಕೆಎಫ್), ಥಾಯ್ಲೆಂಡ್‌ ಕಬಡ್ಡಿ ಸಂಸ್ಥೆಗಳು ಕೂಟದ ಸಹಭಾಗಿತ್ವ ವಹಿಸಲಿವೆ. ಥಾಯ್ಲೆಂಡ್‌ ಸಂಸ್ಥೆಯಂತೂ ಅಪ್‌ಲಿಫ್ಟ್ ಕಬಡ್ಡಿ ಪ್ರೈವೇಟ್‌ ಲಿ.ಗೆ ಕೂಟದ ಪೂರ್ಣ ಜವಾಬ್ದಾರಿಯನ್ನು ಹೊರಿಸಿದೆ. ಈ ಕೂಟದ ಮೊದಲ ಆವೃತ್ತಿ ಎಲ್ಲಿ, ಯಾವಾಗ ನಡೆಯಲಿದೆ ಎನ್ನುವುದು ಇನ್ನೂ ಖಚಿತವಾಗಿಲ್ಲ. ಹಾಗೆಯೇ ಕೂಟದ ಸ್ವರೂಪವೇನು, ಆರ್ಥಿಕ ಲೆಕ್ಕಾಚಾರಗಳೇನು ಎನ್ನುವುದೂ ಸ್ಪಷ್ಟಗೊಂಡಿಲ್ಲ.