ಕೋವಿಡ್ ಏಟಿಗೆ ಮುಗ್ಗರಿಸಿದ ಷೇರು ಪೇಟೆ

ದೇಶದಲ್ಲಿ ಕೋವಿಡ್ 19 ವೈರಸ್ ಸೋಂಕಿತರ ಸಂಖ್ಯೆ ಹೆಚ್ಚಳವಾಗುತ್ತಿದ್ದಂತೆ ಮುಂದಿನ ಆರ್ಥಿಕ ಸ್ಥಿತಿಯ ಬಗ್ಗೆ ತೀವ್ರ ಕಳವಳ ಮೂಡಿರುವುದು ಷೇರುಪೇಟೆಯಲ್ಲೂ ಆತಂಕಕ್ಕೆ ಕಾರಣವಾಗಿದೆ. ಇದರ ಜೊತೆಗೆ ವಿದೇಶಿ ಹೂಡಿಕೆಯ ಹೊರಹರಿವು ಹಾಗೂ ಡಾಲರ್‌ ಎದುರು ರೂಪಾಯಿ ಮೌಲ್ಯ 76 ರೂ.ಗಿಂತ ಕೆಳಗೆ ಇಳಿದಿದೆ.

ಇವೆಲ್ಲದರ ಪರಿಣಾಮ ಎಂಬಂತೆ ಹೂಡಿಕೆದಾರರು ಷೇರುಗಳ ಮಾರಾಟದಲ್ಲಿ ತೊಡಗಿದ ಕಾರಣ ಮುಂಬಯಿ ಷೇರುಪೇಟೆ ಸಂವೇದಿ ಸೂಚ್ಯಂಕ ಶುಕ್ರವಾರ 674 ಅಂಕ ಕುಸಿದು, 27,590ರಲ್ಲಿ ವಹಿವಾಟು ಅಂತ್ಯಗೊಳಿಸಿದೆ. ನಿಫ್ಟಿ 170 ಅಂಕ ಕುಸಿತ ದಾಖಲಿಸಿ, 8,083ರಲ್ಲಿ ವಹಿವಾಟು ಕೊನೆಗೊಳಿಸಿದೆ.

ಅವಧಿ ಕಡಿತ: ಏ.7ರಿಂದ 17ರವರೆಗೆ ದೇಶದ ಕರೆನ್ಸಿ ಮತ್ತು ಬಾಂಡ್‌ ಮಾರುಕಟ್ಟೆ ಬೆಳಗ್ಗೆ 10ರಿಂದ ಮಧ್ಯಾಹ್ನ 2 ರವರೆಗೆ ಮಾತ್ರ ಕಾರ್ಯನಿರ್ವಹಿಸಲಿದೆ. ಈ ಬಗ್ಗೆ ಆರ್‌ಬಿಐ ಆದೇಶ ಹೊರಡಿಸಿದೆ. ಬಾಂಡ್‌ ಮಾರುಕಟ್ಟೆ ವಹಿವಾಟು ಬೆಳಗ್ಗೆ 11 ರಿಂದ ಮಧ್ಯಾಹ್ನ 2ರವರೆಗೆ ನಡೆಯಲಿದೆ. ಆದರೆ, ಷೇರು ಮಾರುಕಟ್ಟೆ ವಹಿವಾಟಿನ ಅವಧಿಯಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ.

ಸೋಮವಾರ ಸಭೆ: ಪ್ರಮುಖ ತೈಲ ಉತ್ಪಾದಕ ದೇಶವಾದ ರಷ್ಯಾ ನೇತೃತ್ವದ ಒಪೆಕ್‌ ಗ್ರೂಪ್‌ ಸೋಮವಾರ ಸಭೆ ನಡೆಸಲಿದೆ. ದರ ಸಮರದಿಂದಾಗಿ ಅಲ್ಲೋಲಕಲ್ಲೋಲವಾಗಿರುವ ತೈಲ ಮಾರುಕಟ್ಟೆಯನ್ನು ಸ್ಥಿರವಾಗಿರಿಸುವ ಬಗ್ಗೆ ಚರ್ಚೆಯಾಗಲಿದೆ.