“ಟೂರ್‌ ಆಫ್ ಡ್ಯೂಟಿ’ಅಡಿಯಲ್ಲಿ ಸೈನಿಕರ ನೇಮಕ

ಹೊಸದಿಲ್ಲಿ: ಭಾರತೀಯ ಸೇನೆಯಲ್ಲಿನ ಶೇ.50ರಷ್ಟು ಯೋಧರು ಇನ್ನು 5 ವರ್ಷಗಳಲ್ಲಿ ನಿವೃತ್ತರಾಗಲಿದ್ದು, ಆ ಹುದ್ದೆಗಳ ಭರ್ತಿಗೆ ಕೇಂದ್ರ ಸರಕಾರ ಕೂಡಲೇ ಮುಂದಾಗುವ ಸಾಧ್ಯತೆ ಇದೆ.

ಕೇಂದ್ರ ಸರಕಾರದ ಮೂಲಗಳಿಂದ ಹೊರಬಿದ್ದ ಮಾಹಿತಿ ಪ್ರಕಾರ, ಕಳೆದೆರಡು ವಾರಗಳಿಂದ “ಟೂರ್‌ ಆಫ್ ಡ್ಯೂಟಿ’ ನೇಮಕಾತಿ ಪ್ರಕ್ರಿಯೆಯ ಕರಡನ್ನು ಸರಕಾರ ಸಿದ್ಧಪಡಿಸುತ್ತಿದೆ.

ಇದರ ಅನ್ವಯ, ನೇಮಕಾತಿಯಲ್ಲಿ ಶೇ.25 ಮಂದಿಯನ್ನು 3 ವರ್ಷಗಳವರೆಗೆ, ಮತ್ತೆ ಶೇ.25 ಮಂದಿಯನ್ನು 5 ವರ್ಷಗಳವರೆಗೆ ನೇಮಕ ಮಾಡಿಕೊಳ್ಳಲಾಗುತ್ತದೆ.

ಅಲ್ಲದೆ, ಬಾಕಿ ಉಳಿದ ಶೇ.50 ಮಂದಿಯನ್ನು ನಿವೃತ್ತಿಯ ವರೆಗೆ ನೇಮಕ ಮಾಡಿಕೊಳ್ಳಲಾಗುತ್ತದೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ:ಜಾರಿ ನಿರ್ದೇಶನಾಲಯ ಸಮನ್ಸ್‌ ಹಿನ್ನೆಲೆ: ಎ.8ರಂದು ಟಿಟಿವಿ ದಿನಕರನ್‌ ವಿಚಾರಣೆ

3 ಮತ್ತು 5 ವರ್ಷಗಳ ಅವಧಿಗೆ ನೇಮಕಗೊಳ್ಳುವ ಯೋಧರಿಗೆ ನಿವೃತ್ತಿ ವೇತನ, ವೈದ್ಯಕೀಯ ಸೌಲಭ್ಯ ಸೇರಿದಂತೆ ವಿವಿಧ ಸರಕಾರ ಸವಲತ್ತು ನೀಡುವ ಕುರಿತೂ “ಟೂರ್‌ ಆಫ್ ಡ್ಯೂಟಿ’ಯ ಕರಡಿನಲ್ಲಿ ಪ್ರಸ್ತಾಪಿಸಲಾಗಿದೆ.

ಕೇವಲ ಸೈನಿಕ ಶ್ರೇಣಿಗೆ ಮಾತ್ರವೇ ಈ ಕರಡು ನೀತಿ ಅನ್ವಯವಾಗುತ್ತದೆ. ಅಧಿಕಾರಿಗಳ ಶ್ರೇಣಿಗೆ ಅನ್ವಯವಾಗದು ಎಂದು ಮೂಲಗಳು ತಿಳಿಸಿವೆ.

ಕೊರೊನಾ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಕಳೆದೆರಡು ವರ್ಷಗಳಿಂದ ಯೋಧ ನಿರೀಕ್ಷಿತ ನೇಮಕಾತಿ ಪ್ರಕ್ರಿಯೆ ನಡೆಯದ ಕಾರಣ, ಆಕಾಂಕ್ಷಿಗಳು ಜಂತರ್‌ ಮಂತರ್‌ನಲ್ಲಿ ಪ್ರತಿಭಟನೆ ನಡೆಸುತ್ತಿದ್ದಾರೆ.