ತಮಿಳು ನಾಡು ಸಾರಿಗೆ ನಿಗಮ ನೌಕರರಿಗೆ ಶೇ.20 ಬೋನಸ್‌ ಘೋಷಣೆ

ಚೆನ್ನೈ : ತಮಿಳು ನಾಡು ಮುಖ್ಯಮಂತ್ರಿ ಕೆ ಪಳನಿಸ್ವಾಮಿ ಅವರು ಇಂದು ಶುಕ್ರವಾರ ರಾಜ್ಯ ಸಾರಿಗೆ ನಿಗಮದ ಸುಮಾರು 1.44 ಲಕ್ಷ ನೌಕರರಿಗೆ ಲಾಭವಾಗುವ ಹಾಗೆ 215.99 ಕೋಟಿ ರೂ. ಮೊತ್ತದ ದೀಪಾವಳಿ ಬೋನಸ್‌ ಪ್ರಕಟಿಸಿದ್ದಾರೆ. 

ಮುಖ್ಯಮಂತ್ರಿ ಪಳನಿಸ್ವಾಮಿ ಅವರು ಇಂದು ಹೊರಡಿಸಿರುವ ಆದೇಶದ ಪ್ರಕಾರ 1.44 ಲಕ್ಷ ರಾಜ್ಯ ಸಾರಿಗೆ ನಿಗಮದ ನೌಕರರಿಗೆ ಶೇ.11.67ರ ಎಕ್ಸ್‌ ಗ್ರೇಶಿಯಾ ಸಹಿತ  ಶೆ.20 ಬೋನಸ್‌ ಸಿಗಲಿದೆ ಎಂದು ಅಧಿಕೃತ ಪ್ರಕಟನೆ ತಿಳಿಸಿದೆ. 

ಇದೇ ವೇಳೆ ಸಿಎಂ ಪಳನಿಸ್ವಾಮಿ ಅವರು ಸಾರಿಗೆ ನಿಗಮಗಳಿಗೆ ಹೆಚ್ಚುತ್ತಿರುವ ಇಂಧನ ವೆಚ್ಚವನ್ನು ಭರಿಸುವುದಕ್ಕಾಗಿ ಸಹಾಯಧನ ನೀಡುವುದನ್ನು ಮುಂದುವರಿಸಿದ್ದಾರೆ. ಅಂತೆಯೇ 2018ರ ಜನವರಿ 20 ಮತ್ತು ಸೆ.30ರ ನಡುವಿನ ಅವಧಿಗೆಂದು 198.66 ಕೋಟಿ ರೂ. ಸಬ್ಸಿಡಿಯನ್ನು ಸರಕಾರ ಪ್ರಕಟಿಸಿದೆ ಎಂದು ಪ್ರಕಟನೆ ತಿಳಿಸಿದೆ.