Mangaluru Airport; 20 ಲಕ್ಷ ರೂ.ಗಳ ಚಿನ್ನಾಭರಣವಿದ್ದ ಬ್ಯಾಗ್‌ ವಾರಸುದಾರರಿಗೆ ಹಸ್ತಾಂತರ

ಮಂಗಳೂರು: ಬಜಪೆ ವಿಮಾನ ನಿಲ್ದಾಣದಲ್ಲಿ ಕಳೆದು ಹೋಗಿದ್ದ ಬರೋಬ್ಬರಿ 20 ಲಕ್ಷ ರೂ. ಮೌಲ್ಯದ ಚಿನ್ನಾಭರಣವಿದ್ದ ಬ್ಯಾಗ್‌ ವಾರಸುದಾರರ ಕೈಸೇರಿದೆ.

ಮುಂಬಯಿಯಿಂದ ಬಂದಿದ್ದ ಪ್ರಯಾಣಿಕರೋರ್ವರು ವಿಮಾನ ನಿಲ್ದಾಣದ ಆಗಮನ ಜಾಗದಲ್ಲಿ ತಮ್ಮ ಬ್ಯಾಗನ್ನು ಬಿಟ್ಟು ಹೋಗಿದ್ದರು. ಇದನ್ನು ಗಮನಿಸಿದ ಭದ್ರತಾ ಅಧಿಕಾರಿಗಳು ಬ್ಯಾಗನ್ನು ಪರಿಶೀಲಿಸಿದ್ದಾರೆ. ಅದರಲ್ಲಿ 1 ಲಕ್ಷ ರೂ. ನಗದು, ಬಾಕ್ಸ್‌ ಹಾಗೂ ಮೊಬೈಲ್‌ ಇತ್ತು. ಟರ್ಮಿನಲ್‌ ಮ್ಯಾನೇಜರ್‌ ಇದರ ವಾರಸುದಾರರ ಪತ್ತೆಗೆ ಮುಂದಾದರು.

ಈ ವೇಳೆ ಬ್ಯಾಗ್‌ನಲ್ಲಿದ್ದ ಮೊಬೈಲ್‌ ಗೆ ವಾರಸುದಾರರೇ ಕರೆ ಮಾಡಿ, ಬ್ಯಾಗ್‌ ಕಳೆದು ಹೋದ ಬಗ್ಗೆ ಮಾಹಿತಿ ನೀಡಿದರು. ಆಗ ಅವರು ಉಡುಪಿಗೆ ಪ್ರಯಾಣಿಸಿದ್ದರು. ಬಳಿಕ ವಿಮಾನ ನಿಲ್ದಾಣಕ್ಕೆ ಮರಳಿದ ವಾರಸು ದಾರರು ಬ್ಯಾಗ್‌ನಲ್ಲಿದ್ದ ಪೂರಕ ವಿವರಗಳನ್ನು ಭದ್ರತಾ ಸಿಬಂದಿ ಹಾಗೂ ಟರ್ಮಿನಲ್‌ ಮ್ಯಾನೇಜರ್‌ಗೆ ನೀಡಿದರು. ಬ್ಯಾಗಿನ ವಾರಸುದಾರರು ಇವರು ಹೌದು ಎಂಬುದನ್ನು ಖಚಿತಪಡಿಸಿಕೊಂಡ ಬಳಿಕ ಬ್ಯಾಗನ್ನು ಅವರಿಗೆ ಹಸ್ತಾಂತರಿಸಲಾಯಿತು.