Tiger Safari: ನಾಗರಹೊಳೆ ಉದ್ಯಾನ ರಸ್ತೆಯಲ್ಲಿಅಪರೂಪಕ್ಕೆ ಹುಲಿ ಪ್ರತ್ಯಕ್ಷ!

ಹುಣಸೂರು: ನಾಗರಹೊಳೆ ಮುಖ್ಯರಸ್ತೆಯಲ್ಲಿ ಮಧ್ಯಾಹ್ನದ ಬಿರು ಬಿಸಿಲ ನಡುವೆಯೇ ಹುಲಿ ಅಡ್ಡಾಡುತ್ತ ರಸ್ತೆ ದಾಟುತ್ತಿರುವುದನ್ನು ವಾಹನ ಸವಾರರು ಕಣ್ತುಂಬಿಕೊಂಡರು. ಈ ವೇಳೆ ಸವಾರರು ಕೆಲಹೊತ್ತು ನಿಂತು ಪೋಟೋ ಕ್ಲಿಕ್ಕಿಸಿ, ವಿಡಿಯೋಗಳ ಮಾಡಿ ಖುಷಿಪಟ್ಟು  ಮುಂದೆ ಸಾಗಿದರು.

ಈ ಬಾರಿ ಉತ್ತಮ ಮಳೆಯಿಂದಾಗಿ ನಾಗರಹೊಳೆ ಉದ್ಯಾನದಲ್ಲಿ ಎಲ್ಲೆಲ್ಲೂ ಹಸಿರು ಕಂಗೊಳಿಸುತ್ತಿರುವುದರಿಂದ ಸಸ್ಯಹಾರಿ ಪ್ರಾಣಿಗಳಿಗೆ ಯಥೇಚ್ಛವಾಗಿ ಕಾಡಿನೊಳಗೆ ಆಹಾರ ಸಿಗುತ್ತಿದೆ.  ಆದ್ದರಿಂದ ಬೇಟೆಯಾಡಿ ಹೊಟ್ಟೆ ತುಂಬಿಸಿಕೊಳ್ಳುವ ಮಾಂಸಹಾರಿ ಪ್ರಾಣಿಗಳಿಗೂ ಕಾಡಿನೊಳಗೆ ಆಹಾರ ಲಭ್ಯವಾಗುತ್ತಿದೆ.  ಸಿಬ್ಬಂದಿಗಳ ಪರಿಸರ ಪ್ರೇಮ ಹಾಗೂ ಜತನದಿಂದ ಕಾನನ ಕಾಯುತ್ತಿರುವುದರಿಂದಾಗಿ ವನ್ಯಪ್ರಾಣಿಗಳ ಸಂಖ್ಯೆಯೂ ಹೆಚ್ಚಿದೆ. ಹೀಗಾಗಿ ವನ್ಯಪ್ರಾಣಿಗಳು ಸ್ವಚ್ಛಂದವಾಗಿ ವಿಹರಿಸುವಂತಾಗಿದೆ.

ನಾಗರಹೊಳೆ ಮುಖ್ಯರಸ್ತೆಯಲ್ಲೇ ಹುಲಿ, ಆನೆ, ಜಿಂಕೆ, ಕಡವೆಗಳ ದರ್ಶನವೂ ಆಗುತ್ತಿದೆ. ಮಂಗಳವಾರ ಮಧ್ಯಾಹ್ನ ಬಿಸಿಲಿನಲ್ಲಿ ಹುಣಸೂರು-ಕುಟ್ಟ ಮುಖ್ಯ ರಸ್ತೆಯ ನಾಗರಹೊಳೆ ಪಿಕಾಕ್ ಲೈನ್ ಬಳಿಯಲ್ಲಿ ಡಾಂಬರ್ ರಸ್ತೆ ದಾಟಿದ ಹುಲಿರಾಯ ಪೀಕಾಕ್ ಲೈನ್‌ ಮೂಲಕ ರಾಜಗಾಂಭೀರ್ಯದಲ್ಲಿ ನಡೆದು ತೆರಳುತ್ತಿರುವುದು ಕಂಡ ಪ್ರವಾಸಿಗರೊಬ್ಬರು ಕೆಲ ಕ್ಷಣ ಅವಕ್ಕಾಗಿ ವಾಹನ ನಿಲ್ಲಿಸಿದ್ದಾರೆ. ಫೋಟೋ ಕ್ಲಿಕ್ಕಿಸಿದ್ದಾರೆ. ಹುಲಿ ಕಾಡಿನತ್ತ ಹೋದ ನಂತರ ಮತ್ತೆ ಪ್ರಯಾಣ ಮುಂದುವರಿಸಿದ್ದಾರೆ.