Theft ಹಾಲಾಡಿ: ಬಾಡಿಗೆ ಮನೆ; ಮಟನ್‌ ಸ್ಟಾಲ್‌ನಲ್ಲಿ ಕಳ್ಳತನ

ಸಿದ್ದಾಪುರ: ಹಾಲಾಡಿ ಪೇಟೆಯ ಬಳಿ ಇರುವ ಬಾಡಿಗೆ ಮನೆ ಮತ್ತು ಮಟನ್‌ ಸ್ಟಾಲ್‌ನಲ್ಲಿ ಕಳ್ಳತನ ನಡೆದಿರುವ ಬಗ್ಗೆ ಹೀನಾ ಕೌಸರ ಪಾಣಿಕಟ್ಟಿ (30) ಅವರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಹಾಲಾಡಿಯಲ್ಲಿ ಬಾಡಿಗೆ ಮನೆ ಮಾಡಿಕೊಂಡಿರುವ ಹೀನಾ ಕೌಸರ ಪಾಣಿಕಟ್ಟಿ ಅವರ ಮನೆಯ ಮಾಡಿನ ಹೆಂಚು ತೆಗೆದು ಒಳಗೆ ನುಗ್ಗಿದ ಕಳ್ಳರು, ರೂಮಿನಲ್ಲಿ ಇಟ್ಟಿದ್ದ ಸೂಟ್‌ಕೇಸ್‌ನಿಂದ ಸುಮಾರು 1,40,000 ರೂ. ಮೌಲ್ಯದ ಚಿನ್ನ ಕಳವು ಮಾಡಿದ್ದಾರೆ. ಬಾಡಿಗೆ ಮನೆಯ ಪಕ್ಕದಲ್ಲಿದ್ದ ಅಯಿಷಾ ಮಟನ್‌ ಸ್ಟಾಲ್‌ನ ಮಾಡಿನ ತಗಡು ತೆಗೆದು ಒಳ ನುಗ್ಗಿದ ಕಳ್ಳರು, ಒಳಭಾಗದಲ್ಲಿ ಹುಡುಕಾಡಿ ವಸ್ತುಗಳನ್ನು ಮತ್ತು ಕೋಳಿಗಳನ್ನು ಚೆಲ್ಲಾಪಿಲ್ಲಿಯಾಗಿಸಿದ್ದಾರೆ.

ಜೂ. 19ರಂದು ಸಂಬಂಧಿಕರ ಮನೆಯಾದ ಕುಂದಾಪುರಕ್ಕೆ ತೆರಳಿದ್ದ ಹೀನಾ ಕೌಸರ ಪಾಣಿಕಟ್ಟಿ ಅವರು. ಜೂ. 22ರಂದು ಮರಳಿ ಬಂದಾಗ ಮನೆ ಮತ್ತು ಮಟನ್‌ ಸ್ಟಾಲ್‌ನಲ್ಲಿ ಕಳ್ಳತನ ಆಗಿರುವುದು ಬೆಳಕಿಗೆ ಬಂದಿದೆ. ಶಂಕರನಾರಾಯಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.