ಹಠವಾದಿಗಳು ಜೊತೆಯಾದರು

ಒಂದಷ್ಟು ದಿನ ಬಣ್ಣದ ಲೋಕದಿಂದ ದೂರವಿದ್ದು, ತಮ್ಮದೇ ಕಾರ್ಯಗಳಲ್ಲಿ ಬಿಝಿಯಾಗಿದ್ದ ರಾಧಿಕಾ ಈಗ ಮತ್ತೆ ಬಣ್ಣದ ಲೋಕದಲ್ಲಿ ಬಿಝಿಯಾಗುತ್ತಿದ್ದಾರೆ. ಈಗಾಗಲೇ “ಕಾಂಟ್ರ್ಯಾಕ್ಟ್’ ಚಿತ್ರೀಕರಣ ಮುಗಿಸಿರುವ ರಾಧಿಕಾ, ಈಗ ಮತ್ತೂಂದು ಸಿನಿಮಾದ ಚಿತ್ರೀಕರಣದಲ್ಲಿ ತೊಡಗಿಕೊಂಡಿದ್ದಾರೆ.

ಹೌದು, ರವಿಚಂದ್ರನ್‌ ನಿರ್ದೇಶನದ “ರಾಜೇಂದ್ರ ಪೊನ್ನಪ್ಪ’ ಚಿತ್ರದಲ್ಲಿ ರಾಧಿಕಾ ನಾಯಕಿಯಾಗಿ ನಟಿಸುತ್ತಿದ್ದಾರೆಂಬ ವಿಚಾರ ನಿಮಗೆ ಗೊತ್ತೇ ಇದೆ. ಆದರೆ, ಚಿತ್ರೀಕರಣ ಯಾವಾಗ ಆರಂಭವಾಗುತ್ತದೆ ಎಂಬ ಪ್ರಶ್ನೆ ಅನೇಕರಲ್ಲಿತ್ತು. ಈಗಾಗಲೇ “ರಾಜೇಂದ್ರ ಪೊನ್ನಪ್ಪ’ ಚಿತ್ರದ ಚಿತ್ರೀಕರಣ ಆರಂಭವಾಗಿದ್ದು, ಸುಂದರ ತಾಣದಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ರಾಧಿಕಾ ಕೂಡಾ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದಾರೆ. 

ಕಳೆದ ಶಿವರಾತ್ರಿಯಂದು “ರಾಜೇಂದ್ರ ಪೊನ್ನಪ್ಪ’ ಜೊತೆಗೆ ರವಿಚಂದ್ರನ್‌ ಅವರ ಇನ್ನೂ ಎರಡು ಚಿತ್ರಗಳು ಸೆಟ್ಟೇರಿದ್ದವು. ಈಗಾಗಲೇ “ಬಕಾಸುರ’ ಹಾಗೂ “ದಶರಥ’ದ ಬಹುತೇಕ ಚಿತ್ರೀಕರಣ ನಡೆದಿದೆ. ಈಗ ರವಿಚಂದ್ರನ್‌ ನಿರ್ದೇಶನದ “ರಾಜೇಂದ್ರ ಪೊನ್ನಪ್ಪ’ ಆರಂಭವಾಗಿದೆ. ಅಂದಹಾಗೆ, “ದೃಶ್ಯ’ ಸಿನಿಮಾದಲ್ಲಿ ರವಿಚಂದ್ರನ್‌ ಪಾತ್ರದ ಹೆಸರು “ರಾಜೇಂದ್ರ ಪೊನ್ನಪ್ಪ’ ಎಂದಿತ್ತು.

ಈಗ ಅದೇ ಚಿತ್ರವೊಂದರ ಟೈಟಲ್‌ ಆಗಿದೆ ಹಾಗೂ ರಾಧಿಕಾ ನಾಯಕಿಯಾಗಿ ನಟಿಸುತ್ತಿದ್ದಾರೆ. ರಾಧಿಕಾ ದೊಡ್ಡ ಗ್ಯಾಪ್‌ನ ನಂತರ ರವಿಚಂದ್ರನ್‌ ಜೊತೆ ಮತ್ತೆ ನಟಿಸುತ್ತಿದ್ದಾರೆ. ಈ ಹಿಂದೆ “ಹಠವಾದಿ’ ಮತ್ತು “ಒಡಹುಟ್ಟಿದವಳು’ ಚಿತ್ರಗಳಲ್ಲಿ ಒಟ್ಟಿಗೆ ನಟಿಸಿದ್ದರು. ಸದ್ಯ ರಾಧಿಕಾ ನಟನೆಯ ಜೊತೆಗೆ ರಿಯಾಲಿಟಿ ಶೋವೊಂದರ ತೀರ್ಪುಗಾರರಾಗಿಯೂ ಕಾಣಿಸಿಕೊಳ್ಳುತ್ತಿದ್ದಾರೆ.