‘ವಿಷ’ವೇ ವರ್ಷದ ಶಬ್ದ!

ಲಂಡನ್‌: ಆಕ್ಸ್‌ಫ‌ರ್ಡ್‌ ಡಿಕ್ಷನರಿ ಈ ವರ್ಷದ ಶಬ್ದವನ್ನಾಗಿ ‘ವಿಷ’ (ಟಾಕ್ಸಿಕ್‌) ವನ್ನು ಆಯ್ಕೆ ಮಾಡಿದೆ! ನಿಜ, ಪ್ರತಿ ವರ್ಷವೂ ‘ವರ್ಷದ ಶಬ್ದ’ ಎಂದು ಘೋಷಣೆ ಮಾಡುವ ಸಂಪ್ರದಾಯವನ್ನು ಆಕ್ಸ್‌ಫ‌ರ್ಡ್‌ ಡಿಕ್ಷನರಿ ಹೊಂದಿದ್ದು, ಈ ಬಾರಿ ವಿಷ (toxic) ಅನ್ನು ವರ್ಷದ ಶಬ್ದ ಎಂದು ಘೋಷಿಸಿದೆ. ಹಲವು ಕಾರಣಗಳಿಗೆ ಈ ಶಬ್ದ ಮಹತ್ವದ ಪಡೆದಿದೆ. ವಿವಿಧ ರೀತಿಯ ಸನ್ನಿವೇಶಗಳು, ಕಾಳಜಿ ಹಾಗೂ ಘಟನೆಗಳನ್ನು ವಿವರಿಸಲು ಜನರು ವಿಷ ಎಂಬ ಪದವನ್ನು ಈ ವರ್ಷ ಹೆಚ್ಚು ಬಳಸಿದ್ದಾರೆ. ನಮ್ಮ ಪರಿಸರದಲ್ಲಿರುವ ವಿಷಾಂಶದ ಬಗ್ಗೆ ಹೆಚ್ಚು ಚರ್ಚೆಗಳಾಗಿವೆ.

ಇನ್ನೊಂದೆಡೆ ಮೀ ಟೂ ಅಭಿಯಾನದಲ್ಲಿ ಮಹಿಳೆಯರಿಗೆ ವಿವಿಧ ಸ್ತರಗಳಲ್ಲಿ ಉಂಟಾಗುವ ಲೈಂಗಿಕ ದೌರ್ಜನ್ಯದ ಬಗ್ಗೆ ಧ್ವನಿಯೆತ್ತಲಾಗಿದ್ದು, ಇದು ಪುರುಷತ್ವದಲ್ಲಿನ ವಿಷಾಂಶದ ಅನಾವರಣ ಮಾಡಿದೆ ಎಂದು ಆಕ್ಸ್‌ಫ‌ರ್ಡ್‌ ಯೂನಿವರ್ಸಿಟಿ ಪ್ರಸ್‌ ತನ್ನ ಪ್ರಕಟಣೆಯಲ್ಲಿ ವಿವರಿಸಿದೆ. ಈ ಶಬ್ದವನ್ನು ರಾಸಾಯನಿಕ, ಪುರುಷತ್ವ, ಮಾದಕ ದ್ರವ್ಯ, ಅನಿಲ, ಪರಿಸರ, ಸಂಬಂಧ, ಸಂಸ್ಕೃತಿ, ತ್ಯಾಜ್ಯ, ಗಾಳಿ ಸೇರಿದಂತೆ ವಿವಿಧ ವಿಷಯಗಳೊಂದಿಗೆ ಸಂಬಂಧಿಸಿ ವಿಷ ಎಂಬ ಶಬ್ದವನ್ನು ಬಳಸಲಾಗಿದೆ. ಕಳೆದ ವರ್ಷ ‘ಯೂತ್‌ಕ್ವೇಕ್‌’ ಎಂಬ ಶಬ್ದವು ‘ವರ್ಷದ ಶಬ್ದ’ವಾಗಿತ್ತು.