ಕೆರೆ ಕೋಡಿ ಒಡೆದು ಪೋಲಾದ ನೀರು

ಪಿರಿಯಾಪಟ್ಟಣ: ಗುರುವಾರ ರಾತ್ರಿ ಸುರಿದ ಭಾರೀ ಮಳೆಗೆ ಕೆರೆಯ ಏರಿ ಒಡೆದು ಸಂಪೂರ್ಣ ನೀರು ಹರಿದು ಪೋಲಾದ ಘಟನೆ ತಾಲೂಕಿನ ರಾವಂದೂರು ಸಮೀಪದ ಅರೇನಹಳ್ಳಿ ಗ್ರಾಮದಲ್ಲಿ ನಡೆದಿದೆ.

ಈ ಗ್ರಾಮಕ್ಕೆ ಸೇರಿದ ಹೊಸಕೆರೆಯು ಬಹಳ ದಿನದಿಂದ ಕೆರೆಯ ಏರಿ ಬಿರುಕು ಬಿಟ್ಟಿದ್ದು ಗುರುವಾರ ರಾತ್ರಿ ಸುರಿದ ಗುಡುಗು ಸಹಿತ ಬಾರಿ ಮಳೆಗೆ ನೀರಿನ ಸಂಗ್ರಹವನ್ನು ಸಂಗ್ರಹಿಸಿಕೊಳ್ಳಲಾಗದೆ ಕೆರೆಯ ಕೋಡಿ ಒಡೆದು ಬಹಳ ಪ್ರಮಾಣದ ನೀರು ಪೋಲಾಗಿ ಬೇರೆ ಪ್ರದೇಶಗಳಿಗೆ ಹರಿದು ಹೋಗಿ ಇತರ ಜಮೀನು ಗಳಿಗೆ ನಷ್ಟ ಕೂಡ ಉಂಟಾಗಿದೆ.

ಜನರು ಈ ಕೆರೆಯ ನೀರನ್ನೇ ಕೃಷಿ ಹಾಗೂ ಜಾನುವಾರುಗಳಿಗೆ ಅವಲಂಬಿಸಿಕೊಂಡು ಬರುತ್ತಿದ್ದು ಇದೀಗ ಬಹಳ ವರ್ಷಗಳಿಂದ ತುಂಬದ ಕೆರೆಯು ಇದೀಗ ಮಳೆಯಿಂದ ತುಂಬಿದರೂ ಸಹ ಆ ನೀರೂ ಪೋಲಾದಂತಾಗಿದೆ.

ಸ್ಥಳಕ್ಕೆ ತಹಶೀಲ್ದಾರ್‌ ಜೆ.ಮಹೇಶ್‌, ಉಪತಹಶೀಲ್ದಾರ್‌ ಸಣ್ಣರಾಮಪ್ಪ, ಆರ್‌.ಐ.ಮಹೇಶ್‌ ಭೇಟಿ ನೀಡಿ ಪರಿಶೀಲಿದರು ಹಾಗೂ ಹಾರಂಗಿ ಇಲಾಖೆಯ ಅಧಿಕಾರಿಗಳು ಕೂಡ ಭೇಟಿ ನೀಡಿ ಈ ಕೋಡಿ ಕೂಡಲೇ ಸರಿಪಡಿಸಲಾಗುವುದು ಎಂದು ಗ್ರಾಮಸ್ಥರಿಗೆ ಭರವಸೆ ನೀಡಿದರು.