ಹೊಸವರ್ಷಕ್ಕೆ ಸಜ್ಜಾಗುತ್ತಿರುವ ರಾಜಧಾನಿ

ಬೆಂಗಳೂರು: ಹೊಸವರ್ಷಾಚರಣೆ ಸಂಭ್ರಮಕ್ಕೆ ಸಿಲಿಕಾನ್‌ ಸಿಟಿಯಲ್ಲಿ ಸಡಗರದ ಸಿದ್ಧತೆ ನಡೆದಿದೆ. ನಗರದ ಕೆಲವು ಸಂಘ ಸಂಸ್ಥೆಗಳು ಸಾಂಸ್ಕೃತಿಕ ಕಾರ್ಯಕ್ರಮದ ಮೂಲಕ ಹೊಸವರ್ಷದ ಸ್ವಾಗತಕ್ಕೆ ಸಜ್ಜಾದರೆ, ಹೋಟೆಲ್‌, ರೆಸಾರ್ಟ್‌, ಮಾಲ್‌ಗ‌ಳು ಸಂಗೀತ ಹಾಗೂ ನೃತ್ಯ ಕಾರ್ಯಕ್ರಮ ಆಯೋಜಿಸಿವೆ.

ಹೋಟೆಲ್‌ ಹಾಗೂ ಕ್ಲಬ್‌ಗಳಲ್ಲಿ ಈಗಾಗಲೇ ಹೊಸ ವರ್ಷದ ಪ್ರಯುಕ್ತ ಚಲನಚಿತ್ರ ನಟ-ನಟಿಯರ ಕಾರ್ಯಕ್ರಮಗಳು ಆಯೋಜಿಸಿದ್ದು, ಆನ್‌ಲೈನ್‌ ಮೂಲಕ ಟಿಕೆಟ್‌ ಮಾರಾಟ ಸಹ ನಡೆಯುತ್ತಿದೆ. ಮಾಲ್‌ಗ‌ಳಲ್ಲಿ ಹೊಸ ವರ್ಷದ ಪ್ರಯುಕ್ತ ವಿಶೇಷ ರಿಯಾಯಿತಿ ಘೋಷಿಸಲಾಗಿದೆ. ಡಿ. 31 ರಂದು ರಾತ್ರಿ ಹಲವು ಕಾರ್ಯಕ್ರಮಗಳನ್ನೂ ನಗರದ ಮಾಲ್‌ಗ‌ಳಲ್ಲಿ ಹಮ್ಮಿಕೊಳ್ಳಲಾಗಿದೆ. ಹೊಸ ವರ್ಷ ಸ್ವಾಗತಿಸಲು ನಾಲ್ಕೈದು ದಿನಗಳಿಂದಲೇ ಹೋಟೆಲ್‌ ಹಾಗೂ ಕ್ಲಬ್‌ಗಳು ಮುಂದಾಗಿದ್ದು ದೀಪಾಲಂಕಾರಗಳಿಂದ ಕಂಗೊಳಿಸುತ್ತಿವೆ.

ಗ್ರಾಮೀಣ ಸೊಗಡಿನ ಖಾದ್ಯ: ಹೊಸ ವರ್ಷದ ಪ್ರಯುಕ್ತ ಗ್ರಾಮೀಣ ಸೊಗಡಿನಲ್ಲಿ ಆರೋಗ್ಯಯುತ ಆಹಾರ ಸವಿಯಲು ಇಚ್ಛಿಸುವವರಿಗಾಗಿ ಜಯನಗರ 7ನೇ ಬಡಾವಣೆಯಲ್ಲಿರುವ ಪ್ರೇಮ್ಸ್‌ ಗ್ರಾಮ ಭೋಜನಂ ಹೊಸ ಖಾದ್ಯಗಳನ್ನು ತಯಾರಿಕೆ ಮುಂದಾಗಿದೆ. ಬಿದರಕ್ಕಿಯ ಚಪಾತಿ, ಕೆಂಪು ಮತ್ತು ಕಪ್ಪಾಕ್ಕಿಯ ಒತ್ತು ಶಾವಿಗೆ, ಎಳನೀರಿನ ಪಾಯಸ ಸೇರಿದಂತೆ ಸಿರಿಧಾನ್ಯಗಳಿಂದ ಹೊಸ ತಿನಿಸುಗಳನ್ನು ಸಿದ್ದಪಡಿಸುತ್ತಿದೆ.

ಮಲ್ಲೇಶ್ವರದ ಗ್ರೀನ್‌ಪಾಥ್‌ ಹೋಟೆಲ್‌ ಸಾವಾಯವ ಆಹಾರ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದರ ಮೂಲಕ ಹೊಸ ವರ್ಷಾಚರಣೆಗೆ ಸಿದ್ಧತೆ ನಡೆಸಿದೆ. ಡಿ.31ರಂದು ಸಂಜೆ 7ಕ್ಕೆ ಗಾಲ ಸಾವಯುವ ಊಟದೊಂದಿಗೆ ಹೊಸವರ್ಷ ಸಂಭ್ರಮಾಚರಣೆ ಕಾರ್ಯಕ್ರಮ ಆರಂಭವಾಗಲಿದೆ.

19 ಬಗೆಯ ಸಿಹಿ ತಿನಿಸುಗಳು, ಮಾಕ್‌ಟೆಲ್ಸ್‌ (10ಕ್ಕೂ ಹೆಚ್ಚಿನ ಗಿಡಮೂಲಿಕೆಗಳ ಜ್ಯೂಸ್‌), ವಿವಿಧ ಸಿರಿಧಾನ್ಯಗಳಿಂದ ಮಾಡಿರುವ ಐಸ್‌ಕ್ರೀಂ ಗಾಲ ಸಾವಯವ ಊಟದ ಪ್ರಮುಖ ಆಕರ್ಷಣೆಯಾಗಿರಲಿದೆ. ಊಟದ ನಂತರ ಸಂಗೀತ-ನೃತ್ಯ, ಜಾದು ಪ್ರದರ್ಶನ ಕಾರ್ಯಕ್ರಮ ಆರಂಭವಾಗಲಿದ್ದು ಮಧ್ಯರಾತ್ರಿ 12.30ರವರೆಗೂ ನಡೆಯಲಿದೆ. 

ನೂತನ ವರ್ಷಕ್ಕೆ ಅನಂತ ನಮನ: ಪ್ರತಿವರ್ಷ ಡಿ.30 ರಿಂದ ಜ.1ವರೆಗೆ ಅದಮ್ಯ ಚೇತನದಿಂದ ನ್ಯಾಷನಲ್‌ ಕಾಲೇಜು ಮೈದಾನದಲ್ಲಿ ಸೇವಾ ಉತ್ಸವ ಹಮ್ಮಿಕೊಳ್ಳುವ ಮೂಲಕ ಹೊಸ ವರ್ಷವನ್ನು ಸ್ವಾಗತಿಸಲಾಗುತ್ತಿತ್ತು. ಡಿ.31ರ ಮಧ್ಯರಾತ್ರಿ ದೇಶದ ಅಭಿವೃದ್ಧಿಗೆ ಸಂಬಂಧಿಸಿದ ಸಂಕಲ್ಪ ಮಾಡಿ, ವಂದೇಮಾತರಂ ಗೀತೆ ಹಾಡಿ ಹೊಸ ವರ್ಷದ ಸಂಭ್ರಮಾಚರಣೆ ಮಾಡಲಾಗುತ್ತಿತ್ತು. ಆದರೆ ಈ ವರ್ಷ ಸೇವಾ ಉತ್ಸವದ ಬದಲಾಗಿ ಅನಂತ ನಮನ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.

ಪ್ರತಿವರ್ಷ ಮಾಡುತ್ತಿರುವ ಕಾರ್ಯಕ್ರಮವನ್ನು ಯಾವುದೇ ಕಾರಣಕ್ಕೂ ನಿಲ್ಲಿಸಬಾರದು ಎಂಬುದು ಅನಂತಕುಮಾರ್‌ ಅವರ ಆಶಯವಾಗಿತ್ತು. ಹೀಗಾಗಿ ಈ ಬಾರಿ ಸೇವಾ ಉತ್ಸವದ ಬದಲಾಗಿ ಅನಂತಕುಮಾರ್‌ ಅವರಿಗೆ ಸಂಗೀತ ಮತ್ತು ಚಿತ್ರದ ಮೂಲಕ ನಮನ ಸಲ್ಲಿಸುವ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ಪ್ರತಿವರ್ಷದಂತೆ ಈ ವರ್ಷವೂ ಡಿ.31ರ ಮಧ್ಯರಾತ್ರಿ ಹೊಸ ಸಂಕಲ್ಪ ಮಾಡಿ ವಂದೇಮಾತರಂ ಗೀತೆ ಹಾಡಲಾಗುವುದು ಎಂದು ಅದಮ್ಯ ಚೇತನ ಸಂಸ್ಥೆಯ ಅಧ್ಯಕ್ಷೆ ಡಾ.ತೇಜಸ್ವಿನಿ ಅನಂತಕುಮಾರ್‌ ತಿಳಿಸಿದ್ದಾರೆ.

ಡಿ.30ರಂದು ಸಂಜೆ 5ಕ್ಕೆ ಅನಂತನಮನ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಾಗುವುದು. ಚಿತ್ರನಮನದಲ್ಲಿ ಅವರ ಬಾಲ್ಯದಿಂದ ಅವರು ನಿಧನರಾಗುವರೆಗಿನ ಛಾಯಾಚಿತ್ರಗಳ ಪ್ರದರ್ಶನ ಇರಲಿದೆ. 1500ಕ್ಕೂ ಹೆಚ್ಚಿನ ಚಿತ್ರಗಳು ಈ ಪ್ರದರ್ಶನದಲ್ಲಿ ಇರಲಿವೆ. ಡಿ.31ರಂದು ಗೀತ ನಮನ ಹಮ್ಮಿಕೊಳ್ಳಲಾಗಿದ್ದು, ಪ್ರಸಿದ್ಧ ಗಾಯಕರು ದೇಶಭಕ್ತಿ ಗೀತೆ ಹಾಗೂ ಭಾವಗೀತೆಗಳನ್ನು ಹಾಡಲಿದ್ದಾರೆ.

ಹುಸೇನ್‌ ಸಾಬ್‌, ಸಂಗೀತ ಕಟ್ಟಿ, ನರಹರಿ ದಿಕ್ಷಿತ್‌, ಚಂದ್ರಿಕ ಗುರುರಾಜ್‌, ಶ್ರೀನಿವಾಸ ಉಡುಪ, ಆನೂರು ಅನಂತಕೃಷ್ಣ ಶರ್ಮ, ವೀಣಾವಾರುಣಿ ಮತ್ತಿತರರು ಭಾಗವಹಿಸಲಿದ್ದಾರೆ. ಜ.1ರಂದು ಸಂಜೆ 4ಕ್ಕೆ ಸಾವಿರಾರು ಮಂದಿ ಏಕಕಾಲದಲ್ಲಿ ವಂದೇ ಮಾತರಂ ಗೀತೆ ಹಾಡುವ ಮೂಲಕ ಅನಂತ ನಮನ ಕಾರ್ಯಕ್ರಮ ಸಮಾರೋಪಗೊಳ್ಳಲಿದೆ ಎಂದು ಹೇಳಿದರು.