ವಿದ್ಯುತ್‌ ಕಂಬಕ್ಕೆ ಡಿಕ್ಕಿ ಹೊಡೆದ ಭಜರಂಗಿ-2 ಚಿತ್ರತಂಡದ ಬಸ್‌

ನೆಲಮಂಗಲ: “ಭಜರಂಗಿ-2′ ಚಿತ್ರತಂಡ ಪ್ರಯಾಣಿಸುತ್ತಿದ್ದ ಬಸ್‌ ವಿದ್ಯುತ್‌ ಕಂಬಕ್ಕೆ ಡಿಕ್ಕಿಹೊಡೆದು ಸುಮಾರು 60 ಕಲಾವಿದರು ಕೂದಲೆಳೆ ಅಂತರದಲ್ಲಿ ಪಾರಾಗಿರುವ ಘಟನೆ ಗ್ರಾಮಾಂತರ ಪೊಲೀಸ್‌ ಠಾಣೆ ವ್ಯಾಪ್ತಿಯ ಶ್ರೀನಿವಾಸಪುರ ಬಳಿ ಸಂಭವಿಸಿದೆ.

ಶಿವರಾಜ್‌ಕುಮಾರ್‌ ಅಭಿನಯದ “ಭಜರಂಗಿ-2′ ಚಿತ್ರ ತಂಡದ ಸೆಟ್‌ಗೆ ಜ.16ರ ಗುರುವಾರ ಬೆಂಕಿಬಿದ್ದಿತ್ತು. ಶನಿವಾರ ಮತ್ತೂಂದು ಅವಘಡವನ್ನು ಚಿತ್ರತಂಡ ಎದುರಿಸಿದೆ. ಶೂಟಿಂಗ್‌ಗಾಗಿ 60ಕ್ಕೂ ಕಲಾವಿದರು ಪ್ರಯಾಣಿಸುತ್ತಿದ್ದ ಬಸ್‌, ಬೆಂಗಳೂರು ಕಡೆಯಿಂದ ಶ್ರೀನಿವಾಸಪುರದ ಸ್ಟುಡಿಯೋಗೆ ತೆರಳುತಿತ್ತು.

ಈ ವೇಳೆ ಚಾಲಕನ ನಿಯಂತ್ರಣ ತಪ್ಪಿದ ಬಸ್‌, ಮೊದಲು ಕಾರೊಂದಕ್ಕೆ ಡಿಕ್ಕಿಹೊಡೆದು, ಬಳಿಕ ರಸ್ತೆ ಬದಿ ಇದ್ದ ವಿದ್ಯುತ್‌ ಕಂಬಕ್ಕೆ ಡಿಕ್ಕಿಹೊಡೆದಿದೆ. ಒಟ್ಟಿನಲ್ಲಿ ಭಜರಂಗಿ ಚಿತ್ರ ತಂಡಕ್ಕೆ ಭಜರಂಗಿಯೇ ಬೆನ್ನೆಲುಬಾಗಿ ನಿಂತು ಕಾಪಾಡುತ್ತಿರುವುದಂತೂ ನಿಜ.