ಜ್ಯೋತಿಷಿ ಒಪ್ಪಿದ್ರೆ ತೆಲಂಗಾಣ ಚುನಾವಣೆ

ಹೈದರಾಬಾದ್‌: ತೆಲಂಗಾಣದಲ್ಲಿ ಅಧಿಕಾರದಲ್ಲಿರುವ ತೆಲಂಗಾಣ ರಾಷ್ಟ್ರ ಸಮಿತಿ (ಟಿಆರ್‌ಎಸ್‌) ರಾಜ್ಯದಲ್ಲಿ ಅವಧಿಗಿಂತ ಮೊದಲು ಚುನಾವಣೆ ನಡೆಸುವ ಇರಾದೆಯಲ್ಲಿದೆ. ಈ ಬಗ್ಗೆ ಟಿಆರ್‌ಎಸ್‌ ಅಥವಾ ಮುಖ್ಯಮಂತ್ರಿ ಕೆ.ಚಂದ್ರಶೇಖರ ರಾವ್‌ ಅಧಿಕೃತವಾಗಿ ಏನನ್ನೂ ಹೇಳಿಲ್ಲ. ಜ್ಯೋತಿಷ್ಯ ಮತ್ತು ವಾಸ್ತು ಮೇಲೆ ಭಾರಿ ನಂಬಿಕೆ ಇರುವ ರಾವ್‌, ತಮ್ಮ ವೈಯಕ್ತಿಕ ಜ್ಯೋತಿಷಿಗಳು ಈ ಬಗ್ಗೆ ಸಲಹೆ ನೀಡಿದರೆ ಮಾತ್ರ ಚುನಾವಣೆಗೆ ಮುಂದಾಗುವ ಸಾಧ್ಯತೆ ಇದೆ ಎಂದು “ಸಿಎನ್‌ಎನ್‌-ನ್ಯೂಸ್‌ 18′ ವರದಿ ಮಾಡಿದೆ. ಮುಂದೆ ನಡೆಯುವ ವಿಧಾನಸಭೆ ಚುನಾವಣೆಯಲ್ಲಿ ಟಿಆರ್‌ಎಸ್‌ ಸೋಲಿಸುವುದು ಕಷ್ಟವೆಂದು ಪ್ರತಿಪಕ್ಷಗಳು  ಹೇಳಿಕೊಳ್ಳುತ್ತಿವೆ. ಹಲವಾರು ನೀರಾವರಿ ಯೋಜನೆಗಳನ್ನು ಘೋಷಣೆ ಮಾಡಿ, ಅದರಲ್ಲಿ ಕೆಲವನ್ನು ಅನುಷ್ಠಾನಗೊಳಿಸುವಲ್ಲಿಯೂ ಸಿಎಂ ಚಂದ್ರಶೇಖರ ರಾವ್‌ ಯಶಸ್ವಿಯಾಗಿದ್ದಾರೆ.