7 ಸ್ಟಾರ್‌ ಪ್ರದೀಪ್‌ನ 3 ಸಹಚರರ ಬಂಧನ

ಕಲಬುರಗಿ: ರೌಡಿ ಶೀಟರ್‌ 7 ಸ್ಟಾರ್‌ ಪ್ರದೀಪ ರೌಡಿ ಪರೇಡ್‌ಗೆ ಹಾಜರಾಗಿಲ್ಲದ ಕಾರಣ ಆತನ ವಿಚಾರಣೆಗೆ ಹೋದ ಪೊಲೀಸರ ಮೇಲೆ ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮತ್ತೆ ಮೂರು ಜನರನ್ನು ಬಂಧಿಸಲಾಗಿದ್ದು, ಇವರ ಬಂಧನದೊಂದಿಗೆ ಬಂಧಿತರ ಸಂಖ್ಯೆ 23ಕ್ಕೇರಿದಂತಾಗಿದೆ ಎಂದು ಎಸ್‌ಪಿ. ಎನ್‌. ಶಶಿಕುಮಾರ ತಿಳಿಸಿದ್ದಾರೆ.

ನ. 5ರಂದು ನಗರದ ಬೋರಾಬಾಯಿ ನಗರದಲ್ಲಿರುವ ಆತನ ಮನೆ ಬಳಿ ಆತನನ್ನು ವಿಚಾರಣೆ ನಡೆಸಿ ರೌಡಿ ಪರೇಡ್‌ಗೆ ಬರುವಂತೆ ತಿಳಿಸಿ ಹೇಳಲು ಹೋದ ಪಿಎಸ್‌ಐ ಹಾಗೂ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ್ದರು.

ಈ ಬಗ್ಗೆ ರಾಘವೇಂದ್ರ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಈ ಪ್ರಕರಣದಲ್ಲಿ ಈಗಾಗಲೇ ಒಮ್ಮೆ 13 ಹಾಗೂ ನಂತರ 7 ಜನರನ್ನು ಬಂಧಿಸಲಾಗಿತ್ತು. ಈಗ ಪ್ರವೀಣ, ಅನೀಲ ಅಲಿಯಾಸ್‌ ಚೋಪಾಟಿ ಅನೀಲ ಹಾಗೂ ಶರಣಬಸಪ್ಪ ಅಲಿಯಾಸ್‌ ಸಾಹುಕಾರ ಶಾಣು ಎಂಬುವವರನ್ನು ಬಂಧಿಸಿ ಅವರನ್ನು ನ್ಯಾಯಾಂಗ ಬಂಧನಕ್ಕೊಪ್ಪಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.