ಕುಂದಾಪುರ: ಸ್ವಾತಂತ್ರ್ಯ ಪೂರ್ವದಲ್ಲಿ ಬ್ರಿಟಿಷರು ಸಂಪನ್ಮೂಲ ಕ್ರೋಡೀಕರಣಕ್ಕಾಗಿ ಆರಂಭಿಸಿದ ಕರ ವಸೂಲಿ ನೀತಿಯನ್ನು, ಇನ್ನಷ್ಟು ಕಠಿನವಾಗಿ ಭಾರತ ಸರಕಾರ ಜನರ ಮೇಲೆ ಹೇರಲು ಪ್ರಯತ್ನಿಸಿದುದು ಕಪ್ಪು ಹಣ ಸೃಷ್ಟಿಗೆ ಕಾರಣವಾಯಿತು. ದಶಕಗಳ ಅನಂತರ ಪ್ರಮಾದದ ಅರಿವಾಗಿ ತೆರಿಗೆ ನೀತಿಯಲ್ಲಿ ಬದಲಾವಣೆ ಮಾಡಿದರೂ ಆದಾಯ ತೆರಿಗೆ ಇಲಾಖೆಯ ಕರಕಟ್ಟುವವರ ಮೇಲೆಯೇ ಮುಗಿ ಬೀಳುವ ಮನೋ ಭಾವದಿಂದ ಜನರು ಸಂತೋಷದಿಂದ ತೆರಿಗೆ ಕಟ್ಟದಂತಾಗಿದೆ ಎಂದು ಹಿರಿಯ ಲೆಕ್ಕ ಪರಿಶೋಧಕ, ರೋಟರಿ ಜಿಲ್ಲಾ ಮಾಜಿ ಅಸಿಸ್ಟೆಂಟ್‌ ಗವರ್ನರ್‌ ಗಣೇಶ ಶೆಟ್ಟಿ ಮೊಳಹಳ್ಳಿ ಹೇಳಿದರು.
ರೋಟರಿ ಕುಂದಾಪುರ ದಕ್ಷಿಣ ಏರ್ಪಡಿಸಿದ ಕಪ್ಪು ಹಣದ ಸುತ್ತಮುತ್ತ ಕಾರ್ಯಕ್ರಮದಲ್ಲಿ ಸಂಪನ್ಮೂಲ ವ್ಯಕ್ತಿಯಾಗಿ ಮಾತನಾಡಿದರು.
ಬ್ರಿಟಿಷರು ಆಡಳಿತ ನಡೆಸುವಾಗ ಗರಿಷ್ಠ ಶೇ. 25 ತೆರಿಗೆ ಇತ್ತು. ಅವರು ಭಾರತಕ್ಕೆ ಸ್ವಾತಂತ್ರ್ಯ ನೀಡುವ ಮುನ್ನ ಅದನ್ನು ಶೇ. 63ಕ್ಕೆ ಏರಿಸಿದರು. ಅದರ ಕಾರಣ ಆದಷ್ಟು ಹೆಚ್ಚು ಹಣ ಪಡೆದುಕೊಳ್ಳುವುದು ಅಥವಾ ಇಲ್ಲಿಯ ಕೈಗಾರಿಕೋದ್ಯಮದ ಅಭಿ ವೃದ್ಧಿಗೆ ತಡೆ ಒಡ್ಡುವುದು. ಆದರೆ ಭಾರತದಲ್ಲಿ ನಮ್ಮದೇ ನೂತನ ಸಹಕಾರ ರಚನೆಗೊಂಡಾಗ ಇದೇ ಕರಮಟ್ಟವನ್ನು ಶೇ. 79ರಿಂದ 94ಕ್ಕೆ ಕೊಂಡೊಯ್ದರು. ಉದ್ಯಮ, ವ್ಯವಹಾರ ನಡೆಸುವುದಾದರೂ ಹೇಗೆ, ತನಗಾಗಿ ಏನಾದರೂ ಉಳಿಸಿಕೊಳ್ಳುವುದಾದರೂ ಹೇಗೆ? ಹಾಗಾಗಿ ಸರಕಾರಕ್ಕೆ ತಪ್ಪು ಲೆಕ್ಕ ನೀಡಿ ನಿಶ್ಚಿತವಾದ ಕರ ಕಟ್ಟುವುದನ್ನು ತಪ್ಪಿಸಿಕೊಳ್ಳುವ ಮನೋಭಾವ ಸಹಜ ವಾಗಿ ಉದ್ಭವವಾಯಿತು. ಜನರ ಮೇಲೆ ತೆರಿಗೆ ಹೊರೆಯಿಂದ ಅರ್ಥ ವ್ಯವಸ್ಥೆಯಲ್ಲಿ ಆಗಿರುವ ಪ್ರಮಾದದ ಅರಿವು ಆಗಬೇಕಾದರೆ ಸರಕಾರಕ್ಕೆ 15 ವರ್ಷಗಳೇ ಬೇಕಾಯಿತು. ಆನಂತರವೂ ಈ ತೆರಿಗೆ ಕ್ರಮದಿಂದಾದ ಅವ್ಯವಸ್ಥೆ ಸರಿಪಡಿಸುತ್ತ ಬರಲು ಹಲವು ಸರಕಾರಗಳು ಬರಬೇಕಾಯಿತು, ಇಂದೂ ಸಹ ಕರ ಪದ್ಧತಿ ನ್ಯಾಯಯುತವಾಗಿಲ್ಲ. ಕಂಪೆನಿಗಳಿಗೆ ಇರುವ ಅನುಕೂಲತೆ. ವೈಯಕ್ತಿಕವಾಗಿ ವ್ಯವಹಾರ ನಡೆಸು ವವರಿಗಿಲ್ಲ. ಆದಾಯ ತೆರಿಗೆ ಇಲಾಖೆ ಯವರೂ ಆದಾಯ ಕಟ್ಟುತ್ತಿ ದ್ದವರ ಮೇಲೆ ಒತ್ತಡದ ಕ್ರಮ ಕೈಗೊಳ್ಳುತ್ತಿದ್ದಾರೆ ವಿನಾ ಸಾಕಷ್ಟು ಸಂಪಾದನೆ ವಿವಿಧ ಭಾಗಗಳಿಂದ ಕ್ರೋಡೀಕರಿಸುತ್ತಿರುವ ಜನರತ್ತ ಗಮನವೇ ಹರಿಸುತ್ತಿಲ್ಲ. ಕರಕಟ್ಟು ವವರು ಸಂಕಟ ಪಡುತ್ತಿದ್ದರೆ, ಕಟ್ಟದವರು ಸಂತೃಪ್ತಿಯಲ್ಲಿದ್ದಾರೆ ಎಂದರು.
ರೋಟರಿ ಕುಂದಾಪುರ ದಕ್ಷಿಣದ ಅಧ್ಯಕ್ಷ ಓಝಲಿನ್‌ ರೆಬೆಲ್ಲೊ ಅಧ್ಯಕ್ಷತೆ ವಹಿಸಿದ್ದರು. ಕೆ.ಕೆ. ಕಾಂಚನ್‌ ಅತಿಥಿ ಯನ್ನು ಪರಿಚಯಿಸಿದರು. ಕಾರ್ಯ ದರ್ಶಿ ಫ್ಲೆ ವಿನ್‌ ವಂದಿಸಿದರು.
