ಅನುಮಾನಾಸ್ಪದ ಬ್ಯಾಗ್‌: ಯಾದಗಿರಿಯಲ್ಲಿ ಆತಂಕ

ಯಾದಗಿರಿ: ನಗರದಲ್ಲಿ ಎರಡು ಕಡೆ ಅನುಮಾನಾಸ್ಪದ ಬ್ಯಾಗ್‌ ಪತ್ತೆಯಾಗಿದ್ದು, ಜನರು ಭಯಭೀತರಾಗಿದ್ದಾರೆ. ಬೆಳಗ್ಗೆ ನಗರದ ಕೇಂದ್ರ ಬಸ್‌ ನಿಲ್ದಾಣದಲ್ಲಿ ಅನುಮಾನಾಸ್ಪದ ಬ್ಯಾಗ್‌ ಪತ್ತೆಯಾಗಿದ್ದು, ಬ್ಯಾಗ್‌ ಕಂಡು ಜನ ಆತಂಕಗೊಂಡರು. ಅಪರಿಚಿತ ವ್ಯಕ್ತಿ ಬ್ಯಾಗ್‌ ಬಿಟ್ಟು ಹೋಗಿದ್ದ ಎನ್ನಲಾಗಿದೆ. ಈ ಬಗ್ಗೆ ಮಾಹಿತಿ ದೊರೆತ ತಕ್ಷಣ ಯಾದಗಿರಿ ಡಿವೈಎಸ್‌ಪಿ ಯು.ಶರಣಪ್ಪ ನೇತೃತ್ವದಲ್ಲಿ ಬಾಂಬ್‌ ನಿಷ್ಕ್ರಿಯ ತಂಡ, ಶ್ವಾನದಳ ಆಗಮಿಸಿ ಬ್ಯಾಗ್‌ ತಪಾಸಣೆ ಮಾಡಲಾಯಿತು.

ಈ ವೇಳೆ ಬ್ಯಾಗ್‌ನಲ್ಲಿ ಬಟ್ಟೆ ಮತ್ತು ಹಣ ಪತ್ತೆಯಾಗಿದೆ. ಇನ್ನೊಂದೆಡೆ ನಗರದ ಅಜೀಜ್‌ ಕಾಲೋನಿ ಸನಾ ಮಸೀದಿ ಪಕ್ಕದಲ್ಲಿ ಮತ್ತೂಂದು ಅನುಮಾನಾಸ್ಪದ ಬ್ಯಾಗ್‌ ಪತ್ತೆಯಾಯಿತು. ಅಲ್ಲಿಗೂ ಶ್ವಾನದಳದೊಂದಿಗೆ ಭೇಟಿ ನೀಡಿದ ಪೊಲೀಸರು, ಬ್ಯಾಗ್‌ ಪರಿಶೀಲಿಸಿದರು. ಬ್ಯಾಗ್‌ನಲ್ಲಿ ಪುಸ್ತಕ, ಐಡಿ ಕಾರ್ಡ್‌, ಶೂ ಹಾಗೂ ಬಟ್ಟೆ ಪತ್ತೆಯಾಗಿದ್ದು, ಜನ ನಿಟ್ಟುಸಿರು ಬಿಡುವಂತಾಯಿತು.