ಮಗಳಿಗೆ ಪೋಷಕರಾದ ಸನ್ನಿ ಲಿಯೋನ್‌-ಡೆನಿಯಲ್‌ ವೆಬರ್‌ ದಂಪತಿ 

ಮುಂಬಯಿ: ಬಾಲಿವುಡ್‌ ನಟಿ ಸನ್ನಿ ಲಿಯೋನ್‌ ಮತ್ತು ಪತಿ ಡೆನಿಯಲ್‌ ವೆಬರ್‌ ಈಗ 21 ತಿಂಗಳ ಹೆಣ್ಣು ಮಗುವಿನ ಪೋಷಕರಾಗಿದ್ದಾರೆ. 

ಮಹಾರಾಷ್ಟ್ರದ ಲಾತೂರ್‌ನಿಂದ ದತ್ತು ಪಡೆಯಲಾಗಿರುವ ಹೆಣ್ಣು ಮಗುವಿಗೆ ನಿಶಾ ಕೌರ್‌ ವೆಬರ್‌ ಎಂದು ಹೆಸರಿಡಲಾಗಿದೆ. 

2 ವರ್ಷದ ಹಿಂದೆ ಮಗುವೊಂದು ಬೇಕೆಂದು ಅನಾಥಾಶ್ರಮಕ್ಕೆ ದಂಪತಿ ಮನವಿ ಮಾಡಿದ್ದರು. ಈಗ ಮಗುವನ್ನು ಕಾನೂನಾತ್ಮಕವಾಗಿ ಮನೆಗೆ ಕರೆದುಕೊಂಡು ಹೋಗಲು ಅವಕಾಶ ಪಡೆದು ಸಂಭ್ರಮಿಸಿದ್ದಾರೆ.

ಕಾನೂನು ಅನ್ವಯ ದತ್ತು ಪಡೆಯಲು ಹಲವು ಪತ್ರಗಳನ್ನು ಸಿದ್ದಪಡಿಸಿ ತಿರುಗಾಡಬೇಕಾಯಿತು. ಈಗ ನಿಶಾಳ ಮುಖ ನೋಡಿ ಖುಷಿ ಎನಿಸುತ್ತಿದೆ ಎಂದು ಡೆನಿಯಲ್‌ ಹೇಳಿದ್ದಾರೆ. ಪಂಜಾಬ್‌ ಮೂಲದ ಕರೇನ್‌ಜಿತ್‌ ಕೌರ್‌ ಎಂಬ ಮೂಲ ಹೆಸರಿನ ಸನ್ನಿ ಲಿಯೋನ್‌ಗೆ ಮಗಳ ಹೆಸರಿನಲ್ಲಿ ಪಂಜಾಬಿತನ ಬರಬೇಕೆಂದು ನಿಶಾ ಕೌರ್‌ ಎಂದಿರಿಸಿದ್ದಾರೆ. 

ದಂಪತಿಯ ಈ ನಡೆಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.ಉತ್ತಮ ಸಂಸ್ಕಾರ ಮತ್ತು ಶಿಕ್ಷಣ ನೀಡಿ ಉನ್ನತ ಸ್ಥಾನಕ್ಕೇರುವಂತೆ ಮಾಡಿ ಎಂದು ಹಲವರು ಹರಸಿದ್ದಾರೆ.