ಸುಕ್ರಜ್ಜಿ ಗುಣಮುಖ: ಆಸ್ಪತ್ರೆಯಿಂದ ಡಿಸ್ಚಾರ್ಜ್‌

ಕಾರವಾರ: ಜಾನಪದ ಗಾಯಕಿ ಸುಕ್ರಿ ಬೊಮ್ಮಗೌಡ ಕಾರವಾರದ ಕಿಮ್ಸ್‌ ಆಸ್ಪತ್ರೆಯಿಂದ ಮಂಗಳವಾರ ಬಿಡುಗಡೆಯಾದರು. ಅವರ ಆರೋಗ್ಯದಲ್ಲಿ ಸಂಪೂರ್ಣ ಚೇತರಿಕೆ ಕಂಡು ಬಂದ ಹಿನ್ನೆಲೆಯಲ್ಲಿ ಆಸ್ಪತ್ರೆಯಿಂದ ಮನೆಗೆ ಕಳುಹಿಸಲಾಯಿತು. ಸೆ.12ರಂದು ಉಸಿರಾಟದ ತೊಂದರೆಯಿಂದ ಕಾರವಾರದ ಕಿಮ್ಸ್‌ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಶ್ವಾಸಕೋಶಗಳು ಉತ್ತಮವಾಗಿ ಕಾರ್ಯನಿರ್ವಹಣೆ ಮಾಡುವುದು ಕಂಡು ಬಂದ ನಂತರ ಸುಕ್ರಜ್ಜಿಯನ್ನು ಮನೆಗೆ ಕಳುಹಿಸಲಾಯಿತು.

ರೆಡ್‌ಕ್ರಾಸ್‌ನಿಂದ ಬೆಡ್‌ಶೀಟ್‌: ರೆಡ್‌ಕ್ರಾಸ್‌ ಸದಸ್ಯರು ಆಸ್ಪತ್ರೆಗೆ ತೆರಳಿ ಸುಕ್ರಜ್ಜಿಗೆ ಬೆಡ್‌ಶೀಟ್‌ ನೀಡಿದರು. ರೆಡ್‌ಕ್ರಾಸ್‌ ಕಾರ್ಯದರ್ಶಿ ಜಗದೀಶ್‌ ಬಿರ್ಕೋಡಿಕರ್‌, ಅಜಯ್‌ ಸಾವುಕಾರ, ಮಾಧವ ನಾಯ್ಕ ಮತ್ತಿತರರಿದ್ದರು. ನಂತರ ಮಾಧವ ನಾಯ್ಕ, ಸುಕ್ರಜ್ಜಿ ಹಾಗೂ ಅವರ ಕುಟುಂಬದ ಸದಸ್ಯರನ್ನು ಅಂಕೋಲಾದ ಬಡಗೇರಿ ಗ್ರಾಮಕ್ಕೆ ಅವರ ವಾಹನದಲ್ಲಿ ಕರೆದೊಯ್ದರು.