ಸುಡಾನ್‌ನಲ್ಲಿ 30 ವರ್ಷಗಳ ಇಸ್ಲಾಮಿಕ್‌ ಆಡಳಿತ ಅಂತ್ಯ

ಖಾರ್ತೋಮ್‌: ಐತಿಹಾಸಿಕ ನಿರ್ಧಾ­ರವೊಂದರಲ್ಲಿ ಆಫ್ರಿಕಾ ಖಂಡದ ಉತ್ತರ ಭಾಗದ ದೇಶವಾಗಿರುವ ಸುಡಾನ್‌ನಲ್ಲಿ 30 ವರ್ಷಗಳ ಇಸ್ಲಾಮಿಕ್‌ ಆಡಳಿತಕ್ಕೆ ಅಂತ್ಯ ಹಾಡಲಾಗಿದೆ. ಧರ್ಮ ಮತ್ತು ಸರಕಾರದ ವ್ಯವಸ್ಥೆಯನ್ನು ಪ್ರತ್ಯೇಕಗೊಳಿ­ಸಲು ಸರಕಾರ ಒಪ್ಪಿಗೆ ನೀಡಿದ್ದು, ಮೂವತ್ತು ವರ್ಷಗಳಿಂದ ಇಸ್ಲಾಮಿಕ್‌ ತತ್ವಗಳ ಆಧಾರದಲ್ಲಿದ್ದ ಆಡಳಿತ ವ್ಯವಸ್ಥೆಗೆ ವಿದಾಯ ಹೇಳಲಾಗಿದೆ.

ಮುಂದಿನ ದಿನಗಳಲ್ಲಿ ದೇಶ ಪ್ರಜಾ­ಸತ್ತಾತ್ಮಕ ಮೌಲ್ಯಗಳ ಆಧಾರದ ಸರಕಾರಿ ವ್ಯವಸ್ಥೆ ಹೊಂದಲು ತೀರ್ಮಾನಿಸಿದೆ. ಇಥಿಯೋಪಿಯಾ ರಾಜಧಾನಿ ಅಡ್ಡಿಸ್‌ ಅಬಾಬದಲ್ಲಿ ಕಳೆದ ಗುರುವಾರ ಸುಡಾನ್‌ ಪ್ರಧಾನಿ ಅಬ್ದಲ್ಲಾ ಹಮ್‌ದೊಕ್‌ ಮತ್ತು ಸುಡಾನ್‌ ಪೀಪಲ್ಸ್‌ ಲಿಬರೇಷನ್‌ ಮೂವ್‌ಮೆಂಟ್‌ನ ನಾಯಕ ಅಬ್ಧೆಲ್‌ ಅಜೀಜ್‌ ಅಲ್‌- ಹಿಲು ಈ ಬಗೆಗಿನ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ. ಹೊಸ ಒಪ್ಪಂದದಿಂದಲಾಗಿ ದೇಶದ ಎಲ್ಲ ಪ್ರಜೆಗಳಿಗೆ ಸಮಾನ ಹಕ್ಕುಗಳು ಲಭಿಸಲಿವೆ.