ಮತ್ತೆ ಅಶಿಸ್ತು ಪ್ರದರ್ಶನ: ಫ‌ುಟ್ಬಾಲಿಗ ಸ್ವಾರೆಜ್‌ಗೆ 2 ಪಂದ್ಯ ನಿಷೇಧ

ಬಾರ್ಸಿಲೋನಾ: ಇಟಲಿ ಆಟಗಾರ ಚಿಲಿನಿಗೆ 2014ರ  ವಿಶ್ವಕಪ್‌ ಫ‌ುಟ್‌ಬಾಲ್‌ ಪಂದ್ಯವೊಂದರ ವೇಳೆ ಕಚ್ಚಿ 4 ತಿಂಗಳು ಅಮಾನತ್ತುಗೊಂಡಿದ್ದ ಉರುಗ್ವೆ ಆಟಗಾರ ಲೂಯಿಸ್‌ ಸ್ವಾರೆಜ್‌ಗೆ ಮತ್ತೂಮ್ಮೆ ಅಶಿಸ್ತಿನ ಕಾರಣದಿಂದ 2 ಪಂದ್ಯದಿಂದ ನಿಷೇಧಕ್ಕೆ ಒಳಗಾಗಿದ್ದಾರೆ. 

ಬಾರ್ಸಿಲೋನಾ ಮತ್ತು ರಿಯಲ್‌ ಮ್ಯಾಡ್ರಿಡ್‌ ತಂಡಗಳ ನಡುವಿನ ಕಿಂಗ್‌ ಕಪ್‌ ಸೆಮಿಫೈನಲ್‌ ಪಂದ್ಯದ ವೇಳೆ ಈ ಘಟನೆ ನಡೆದಿದೆ. ಸ್ವಾರೆಜ್‌ ಖ್ಯಾತ ಫ‌ುಟ್ಬಾಲಿಗ ಮೆಸ್ಸಿ ಒಳಗೊಂಡ ಬಾರ್ಸಿಲೋನಾ ತಂಡದ ಪರ ಆಡುತ್ತಿದ್ದರು. ಪಂದ್ಯದ ವೇಳೆ ಸ್ವಾರೆಜ್‌ ಅತಿರೇಕದ ವರ್ತನೆ ಪ್ರದರ್ಶಿಸಿದ್ದರು. ಒಂದು ಬಾರಿ ರೆಫ್ರಿ ಹಳದಿ ಕಾರ್ಡ್‌ ನೀಡಿದ್ದರು. ಈ ವೇಳೆ ರೆಫ್ರಿ ಜತೆಗೆ ಸ್ವಾರೆಜ್‌ ವಾಗ್ವಾದ ಕೂಡ ನಡೆಸಿದ್ದಾರೆ. ಈ ಹಿನ್ನಲೆಯಲ್ಲಿ ಸಂಘಟಕರು ಸ್ವಾರೆಜ್‌ಗೆ 2 ಪಂದ್ಯದಿಂದ ನಿಷೇಧ ಹೇರಿದ್ದಾರೆ ಎನ್ನಲಾಗಿದೆ. ಸದ್ಯ ಅಲವೆಸ್‌ ಕ್ಲಬ್‌ ವಿರುದ್ಧದ ಫೈನಲ್‌ ಪಂದ್ಯಕ್ಕೆ ಸ್ವಾರೆಜ್‌ ಲಭ್ಯವಿರುವುದಿಲ್ಲ. ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸಲು  ಬಾರ್ಸಿಲೋನಾ ನಿರ್ಧರಿಸಿದೆ.