ಬಿರುಗಾಳಿ ರೌದ್ರಾವತಾರಕ್ಕೆ 17 ಬಲಿ

ಲಕ್ನೋ: ಉತ್ತರ ಪ್ರದೇಶದಲ್ಲಿ ಇತ್ತೀಚೆಗಷ್ಟೇ ತನ್ನ ರೌದ್ರಾವತಾರ ಪ್ರದರ್ಶಿಸಿ ನೂರಾರು ಮಂದಿಯನ್ನು ಬಲಿ ಪಡೆದಿದ್ದ ಧೂಳು ಮಿಶ್ರಿತ ಬಿರುಗಾಳಿ, ಶುಕ್ರವಾರ ಮಧ್ಯರಾತ್ರಿಯೂ ಪುನಃ ಬೀಸಿ, 17 ಮಂದಿಯ ಪ್ರಾಣವನ್ನು ಹೊತ್ತೂಯ್ದಿದೆ. ಸಾವಿಗೀಡಾದವರಲ್ಲಿ ಹೆಚ್ಚಿನವರು ಮರ ಉರುಳಿದ್ದರಿಂದ, ಮನೆ ಕುಸಿತದಿಂದ ಮೃತಪಟ್ಟಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 

ಶುಕ್ರವಾರದ ನೈಸರ್ಗಿಕ ವಿಕೋಪಕ್ಕೆ ಹೆಚ್ಚು ನಲುಗಿದ್ದು ಮೊರಾದಾಬಾದ್‌. ಈ ಜಿಲ್ಲೆಯಲ್ಲಿ ಏಳು ಸಾವು ಸಂಭವಿಸಿವೆ. ಇನ್ನುಳಿದಂತೆ, ಸಂಭಾಲ್‌ನಲ್ಲಿ ಮೂರು, ಬದೌನ್‌, ಮುಜಫ‌ರ್‌ ನಗರ್‌ ಹಾಗೂ ಮೀರತ್‌ನಲ್ಲಿ ತಲಾ ಎರಡು, ಅನ್ರೋಹಾದಲ್ಲಿ ಒಂದು ಸಾವು ಸಂಭವಿಸಿದೆ ಎಂದು ಸರ್ಕಾರಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.