ರಾಜ್ಯಮಟ್ಟದ ಸೈಕಲ್‌ ಜಾಥಾ ಅಭಿಯಾನಕ್ಕೆ ಚಾಲನೆ

ಮಹಾನಗರ: ದೇಶದ ವೈದ್ಯಕೀಯ ಶಿಕ್ಷಣವನ್ನು ನಿಯಂತ್ರಿಸುತ್ತಿರುವ ಭಾರತೀಯ ವೈದ್ಯಕೀಯ ಮಂಡಳಿ (ಎಂಸಿಐ) ವಿಸರ್ಜಿಸಲು ಭ್ರಷ್ಟಾಚಾರದ ಕಾರಣವನ್ನು ನೀತಿ ಆಯೋಗ ನೀಡುವುದಾದರೆ, ಇದಕ್ಕಿಂತ ಹೆಚ್ಚು ಭ್ರಷ್ಟಾಚಾರ ಲೋಕಸಭೆ ಮತ್ತು ವಿಧಾನ ಸಭೆಗಳಿಗೆ ಮೊದಲು ಬೀಗ ಹಾಕಲಿ ಎಂದು ಭಾರತೀಯ ವೈದ್ಯಕೀಯ ಸಂಘದ ಕರ್ನಾಟಕ ರಾಜ್ಯ ಘಟಕದ ಅಧ್ಯಕ್ಷ ಡಾ| ಎಚ್‌.ಎನ್‌. ರವೀಂದ್ರ ಹೇಳಿದರು.

ಉದ್ದೇಶಿತ ರಾಷ್ಟ್ರೀಯ ವೈದ್ಯಕೀಯ ಆಯೋಗ (ಎನ್‌ಎಂಸಿ) ಮಸೂದೆಯ ಜನವಿರೋಧಿ ಅಂಶಗಳ ಬಗ್ಗೆ ಜಾಗೃತಿ ಮೂಡಿಸುವ ಸಲುವಾಗಿ ರಾಜ್ಯಮಟ್ಟದ ಸೈಕಲ್‌ ಜಾಥಾ ಅಭಿಯಾನಕ್ಕೆ ನಗರದಲ್ಲಿ ಮಂಗಳವಾರ ಚಾಲನೆ ನೀಡಿ ಅವರು ಮಾತನಾಡಿದರು. ಭ್ರಷ್ಟಾಚಾರವನ್ನು ನಿಯಂತ್ರಿಸಲು ಸೂಕ್ತ ಕಾಯ್ದೆ- ಕಾನೂನುಗಳಿರುವಾಗ ಅದನ್ನು ಸಮರ್ಥವಾಗಿ ಬಳಸುವ ಬದಲು ಎಂಸಿಐ ವಿಸರ್ಜಿಸಲು ಶಿಫಾರಸು ಮಾಡಿರುವುದು ಸರಿಯಲ್ಲ. ಉದ್ದೇಶಿತ ಮಸೂದೆ ಜನಾರೋಗ್ಯಕ್ಕೆ ಮಾರಕ ಹಾಗೂ ದೇಶದ ಆರೋಗ್ಯ ವ್ಯವಸ್ಥೆಯನ್ನೇ ಹದಗೆಡಿಸಲಿದೆ ಎಂದರು.

ಈ ಮಸೂದೆಯ ಪ್ರಕಾರ 64 ಮಂದಿಯ ರಾಷ್ಟ್ರೀಯ ವೈದ್ಯಕೀಯ ಆಯೋಗದಲ್ಲಿ ಕೇವಲ ಐದು ಮಂದಿ ಚುನಾಯಿತ ಸದಸ್ಯರಿಗೆ ಅವಕಾಶವಿದೆ. ಉಳಿದ 59 ಮಂದಿ ಸರಕಾರದಿಂದ ನೇಮಕಗೊಳ್ಳುವವರು. ಹೀಗಿರುವಾಗ ಇಲ್ಲಿ ಭ್ರಷ್ಟಾಚಾರ ನಡೆಯುವುದಿಲ್ಲ ಎನ್ನುವ ಖಾತ್ರಿ ಇದೆಯೇ ಎಂದು ಪ್ರಶ್ನಿಸಿದರು.

ಭ್ರಷ್ಟಾಚಾರಕ್ಕೆ ಕಾರಣವಾದೀತು
ಹಿಂದೆ ಇದ್ದ ವ್ಯವಸ್ಥೆಯಲ್ಲಿ ವೈದ್ಯಕೀಯ ಶಿಕ್ಷಣ ಸಂಸ್ಥೆಗಳ ಆರಂಭಕ್ಕೆ ಶಿಫಾರಸು ಮಾಡುವ ಅಧಿಕಾರ ಮಾತ್ರ ಎಂಸಿಐಗೆ ಇತ್ತು. ಆದರೆ ಹೊಸ ಆಯೋಗ ಯಾವ ತಪಾಸಣೆಯೂ ಇಲ್ಲದೇ ನೇರವಾಗಿ ಅನುಮತಿ ನೀಡಬಹುದಾಗಿದೆ. ಭ್ರಷ್ಟಾಚಾರಕ್ಕೆ ಕಾರಣವಾಗಲಿದೆ ಎಂಬ ಆತಂಕ ವ್ಯಕ್ತಪಡಿಸಿದರು.

ಮಂಗಳೂರು ಐಎಂಎ ಅಧ್ಯಕ್ಷ ಡಾ| ಕೆ.ಆರ್‌. ಕಾಮತ್‌ ಅಧ್ಯಕ್ಷತೆ ವಹಿಸಿದ್ದರು. ರಾಜ್ಯ ಉಪಾಧ್ಯಕ್ಷ ಗೀತಾ ದೊಪ್ಪ, ಡಾ| ಉಳ್ಳುಂಬಿ, ಡಾ| ಭಾಸ್ಕರ್‌, ಹರೀಶ್‌ ದೇಲಂತಬೆಟ್ಟು, ಡಾ| ಮುಕುಂದ್‌, ಡಾ| ಉಲ್ಲಾಸ್‌ ಶೆಟ್ಟಿ, ಖಜಾಂಚಿ ಸುಚಿತ್ರಾ ಶಣೈ, ಚುನಾಯಿತ ಅಧ್ಯಕ್ಷ ಡಾ| ಸಚ್ಚಿದಾನಂದ ರೈ, ಹಿರಿಯ ವೈದ್ಯ ಡಾ| ಶಾಂತಾರಾಮ ಶೆಟ್ಟಿ, ದಿವಾಕರ ರಾವ್‌, ಮಾಜಿ ಅಧ್ಯಕ್ಷ ಡಾ| ಜಿ.ಕೆ. ಭಟ್‌ ಸಂಕಬಿತ್ತಿಲು, ಡಾ|ಅಮೃತಾ ಭಂಡಾರಿ ಉಪಸ್ಥಿತರಿದ್ದರು. ಡಾ| ಅಣ್ಣಯ್ಯ ಕುಲಾಲ್‌ ನಿರೂಪಿಸಿದರು. ಐಎಂಎ ಭವನದಿಂದ ಜಿಲ್ಲಾಧಿಕಾರಿ ಕಚೇರಿ ವರೆಗೆ ಸೈಕಲ್‌ ಮತ್ತು ದ್ವಿಚಕ್ರ ವಾಹನ ಮೆರವಣಿಗೆಯಲ್ಲಿ ತೆರಳಿ ಜಿಲ್ಲಾಧಿಕಾರಿ ಕಚೇರಿ ಮೂಲಕ ಪ್ರಧಾನಿಗೆ ಮನವಿ ಪತ್ರ ಕಳುಹಿಸಲಾಯಿತು.

ಜನ ಸಾಮಾನ್ಯರಿಗೆ ಮಾರಕ
ಆಯುರ್ವೇದ ವೈದ್ಯರಿಗೆ ಅಲ್ಪಾವಧಿ ತರಬೇತಿ ನೀಡಿ ಅಲೋಪತಿಕ್‌ ಔಷಧ ವಿತರಿಸಲು ಅವಕಾಶ ಮಾಡಿಕೊಡುವುದು ಒಂದೆಡೆ ಆಯುರ್ವೇದ ಪದ್ಧತಿಯನ್ನು ಮುಗಿಸುವ ಸಂಚು. ಇನ್ನೊಂದೆಡೆ ಅರೆಜ್ಞಾನದಿಂದ ಚಿಕಿತ್ಸೆ ನೀಡುವುದು ಜನಸಾಮಾನ್ಯರ ಪಾಲಿಗೆ ಮಾರಕವಾಗಲಿದೆ. ಇಂಥ ವೈದ್ಯರಿಂದ ನಮ್ಮ ಸಂಸದರು, ಸಚಿವರು ಚಿಕಿತ್ಸೆ ಪಡೆಯುತ್ತಾರೆಯೇ?
– ಡಾ| ಎಚ್‌.ಎನ್‌. ರವೀಂದ್ರ,
ಅಧ್ಯಕ್ಷ , ಭಾರತೀಯ ವೈದ್ಯಕೀಯ ಸಂಘದ
ಕರ್ನಾಟಕ ರಾಜ್ಯ ಘಟಕ