6138 ಕೋಟಿ ರೂ. ನೀಡಿ ಮಾಧ್ಯಮ ಹಕ್ಕು ಖರೀದಿಸಿದ ಸ್ಟಾರ್‌ ಇಂಡಿಯಾ

ಮುಂಬಯಿ: ನೇರ ಪ್ರಸಾರ ದಿಗ್ಗಜ ಸ್ಟಾರ್‌ ಇಂಡಿಯಾ ಭಾರತೀಯ ಕ್ರಿಕೆಟ್‌ ಮೇಲೆ ತನ್ನ ಅಧಿಪತ್ಯ ಸ್ಥಾಪಿಸಿದೆ. ಮುಂದಿನ ಐದು ವರ್ಷಗಳ ಅವಧಿಗೆ 6138.1 ಕೋಟಿ ರೂ. ತೆತ್ತು ರಾಷ್ಟ್ರೀಯ ತಂಡದ ತವರಿನ ಸರಣಿ ಮತ್ತು ದೇಶೀಯ ಕ್ರಿಕೆಟ್‌ ಕೂಟಗಳ ಮಾಧ್ಯಮ ಹಕ್ಕನ್ನು ಖರೀದಿಸಿದೆ.

ಮೂರು ದಿನಗಳವರೆಗೆ ಸಾಗಿದ ಇ-ಹರಾಜು ಪ್ರಕ್ರಿಯೆಯಲ್ಲಿ ಸ್ಟಾರ್‌ ಇಂಡಿಯಾವು ಸೋನಿ ಮತ್ತು ರಿಲೆಯನ್ಸ್‌ ಜಿಯೋ ಅನ್ನು ಸೋಲಿಸಿ ಮಾಧ್ಯಮ ಹಕ್ಕನ್ನು ತನ್ನದಾಗಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ತವರಿನ ಸರಣಿಗಳಿಗೆ ಮಾಧ್ಯಮ ಹಕ್ಕು ಖರೀದಿಸಲು ಬಿಸಿಸಿಐ ಇದೇ ಮೊದಲ ಬಾರಿಗೆ ಇ-ಹರಾಜು ಪ್ರಕ್ರಿಯೆ ನಡೆಸಿತ್ತು. 

ಸ್ಟಾರ್‌ ಕಳೆದ ವರ್ಷ ದಾಖಲೆ 16,347 ಕೋಟಿ ರೂ. ತೆತ್ತು ಐಪಿಎಲ್‌ ಕೂಟದ ಹಕ್ಕನ್ನು ಪಡೆದಿತ್ತು. ಐಸಿಸಿ ಕೂಟಗಳ (ಪುರುಷರ ಮತ್ತು ಮಹಿಳೆಯ 50 ಓವರ್‌ಗಳ ವಿಶ್ವಕಪ್‌, ಟ್ವೆಂಟಿ20 ವಿಶ್ವಕಪ್‌) ಎಲ್ಲ ಹಕ್ಕುಗಳನ್ನು ಕೂಡ ಸ್ಟಾರ್‌ ಹೊಂದಿದೆ.