3 ದಿನಗಳ ಬಳಿಕ ಸಂಚಾರಕ್ಕೆ ಮುಕ್ತವಾದ ಶ್ರೀನಗರ-ಜಮ್ಮು ಹೆದ್ದಾರಿ

ಹೊಸದಿಲ್ಲಿ : ಕಾಶ್ಮೀರ ಕಣಿವೆಯನ್ನು ದೇಶದ ಇತರ ಭಾಗಗಳೊಂದಿಗೆ ಸಂಪರ್ಕಿಸುವ ಏಕೈಕ ಸರ್ವಋತು ರಸ್ತೆ ಮಾರ್ಗವಾಗಿರುವ ಶ್ರೀನಗರ-ಜಮ್ಮು ರಾಷ್ಟ್ರೀಯ ಹೆದ್ದಾರಿ ಕಳೆದ ಮೂರು ದಿನಗಳಿಂದ ಭಾರೀ ಹಿಮಪಾತದಿಂದಾಗಿ ಬಂದ್‌ ಆಗಿದ್ದು ಇಂದು ಅದನ್ನು ಸಂಚಾರಕ್ಕೆ ಮುಕ್ತಗೊಳಿಸಲಾಗಿದೆ.

ಜಮ್ಮು ಕಾಶ್ಮೀರ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಅಲ್ಲಲ್ಲಿ ಉಂಟಾಗಿದ್ದ ಭೂಕುಸಿತವನ್ನು ಹಾಗೂ ರಾಶಿ ಬಿದ್ದಿದ್ದ ಹಿಮವನ್ನು ತೆರವುಗೊಳಿಸಲಾಗಿದ್ದು ಮೂರು ದಿನಗಳ ತರುವಾಯ ಇಂದು ಅದನ್ನು ಸಂಚಾರಕ್ಕೆ ಮುಕ್ತಗೊಳಿಸಲಾಗಿದೆ ಎಂದು ಸಾರಿಗೆ ಇಲಾಖಾಧಿಕಾರಿ ತಿಳಿಸಿದ್ದಾರೆ.

ಹೆದ್ದಾರಿ ಬಂದ್‌ ಆದ ಪ್ರಯುಕ್ತ ಅಲ್ಲಲ್ಲಿ ಸಾಲು ಗಟ್ಟಿ ನಿಂತಿದ್ದ ವಾಹನಗಳನ್ನು ನಿನ್ನೆ ಭಾನುವಾರವೇ ಮುಂದಕ್ಕೆ ಹೋಗಲು ಬಿಡಲಾಗಿದೆ; ಭಾರೀ ಹಿಮಪಾತದಿಂದಾಗಿ ಕಾಶ್ಮೀರ ಕಣಿವೆಯಲ್ಲಿ  ಕಳೆದ ಶುಕ್ರವಾರದಿಂದಲೆ ಜನಜೀವನ ಬಹುತೇಕ ನಿಲುಗಡೆಗೆ ತಲುಪಿತ್ತು. ಇಂದು ಸೋಮವಾರ ವಾಹನ ಸಂಚಾರವನ್ನು ಸಾಧ್ಯಗೊಳಿಸಲಾಯಿತು ಎಂದು ಅಧಿಕಾರಿ ಹೇಳಿದರು. 

ಕಳೆದ ಎರಡು ದಿನಗಳಿಂದ ನಿಂತು ಹೋಗಿದ್ದ ವಾಯು ಸಂಚಾರ ಕೂಡ ನಿನ್ನೆ ಭಾನುವಾರದಿಂದಲೇ ಪುನರಾರಂಭಗೊಂಡಿದೆ ಎಂದವರು ತಿಳಿಸಿದರು.