ಶ್ರೀಕಾಂತ್‌, ಅಶ್ವಿ‌ನಿ ಮಾರುವೇಷಕ್ಕೆ ಮಕ್ಕಳು ತಬ್ಬಿಬ್ಬು!

ಹೈದರಾಬಾದ್‌: ಕೆ. ಶ್ರೀಕಾಂತ್‌ ಮತ್ತು ಅಶ್ವಿ‌ನಿ ಪೊನ್ನಪ್ಪ ಭಾರತದ ಖ್ಯಾತ ಬ್ಯಾಡ್ಮಿಂಟನ್‌ ತಾರೆಯರೆಂದು ಎಲ್ಲರಿಗೂ ಗೊತ್ತು. ಆದರೆ ಅವರು ಒಳ್ಳೆಯ ನಟರು ಎನ್ನುವುದು ತಿಳಿದಿದೆಯೇ? ಹೌದು…

ಇತ್ತೀಚೆಗೆ ಸಿಕಂದರಾಬಾದ್‌ನಲ್ಲಿರುವ ಬ್ಯಾಡ್ಮಿಂಟನ್‌ ಅಕಾಡೆಮಿಯೊಂದಕ್ಕೆ ಭೇಟಿ ನೀಡಿದ್ದ ಶ್ರೀಕಾಂತ್‌ ಮತ್ತು ಅಶ್ವಿ‌ನಿ ಪೊನ್ನಪ್ಪ ವೃದ್ಧ ದಂಪತಿಯೆಂಬಂತೆ ತೋರಿಸಿಕೊಂಡಿದ್ದರು. ಇದನ್ನು ನಂಬಿ ಮಕ್ಕಳು ಬೇಸ್ತುಬಿದ್ದಿದ್ದರು!

ತಾವಿಬ್ಬರು ವೃದ್ಧರು, ಬ್ಯಾಡ್ಮಿಂಟನ್‌ ಆಡುವ ಆಸೆಯಿದೆ. ಒಂದು ಐದು ನಿಮಿಷ ನಿಮ್ಮ ಜತೆ ಆಡುವ ಅವಕಾಶ ಕೊಡಿ ಎಂದು ಕೇಳಿಕೊಂಡಿದ್ದಾರೆ. ಅದನ್ನು ಅಸಹನೆಯಿಂದಲೇ ಒಪ್ಪಿಕೊಂಡ ಮಕ್ಕಳು ಅವಕಾಶ ಕೊಟ್ಟಿದ್ದಾರೆ. ತಮಗೆ ಬೆನ್ನು ನೋವಿದೆ ಎಂದು ಒದ್ದಾಡುತ್ತಲೇ ಇಬ್ಬರೂ ಆಡಿದ್ದಾರೆ. ಕಡೆಗೆ ಇಬ್ಬರೂ ತಮ್ಮ ಸ್ವಂತ ರೂಪವನ್ನು ತೋರಿಸಿದಾಗಲೇ, ಅವರು ಯಾರೆಂದು ಗೊತ್ತಾದದ್ದು!

ಕೂಡಲೇ ಈ ಬ್ಯಾಡ್ಮಿಂಟನ್‌ ತಾರೆಗಳತ್ತ ನುಗ್ಗಿದ ಮಕ್ಕಳು ಹಸ್ತಾಕ್ಷರಕ್ಕಾಗಿ ಮುಗಿಬಿದ್ದಿದ್ದಾರೆ. ವಿಶ್ವದ ಶ್ರೇಷ್ಠ ಫ‌ುಟ್ಬಾಲಿಗ ಕ್ರಿಸ್ಟಿಯಾನೊ ರೊನಾಲ್ಡೊ ಕೂಡ ಒಮ್ಮೆ ಬೀದಿಯಲ್ಲಿ ಮುದುಕನಂತೆ ವೇಷ ಧರಿಸಿ ಮಕ್ಕಳಿಗೆ ಅಚ್ಚರಿ ಹುಟ್ಟಿಸಿದ್ದರು.