ಸ್ವಾಗತ ಗೋಪುರದ ತಿರುವಿನ ರಸ್ತೆ ದುಃಸ್ಥಿತಿ: ಗ್ರಾಮಸ್ಥರ ಆಕ್ರೋಶ

ಕೊಲ್ಲೂರು: ಶ್ರೀ ಮೂಕಾಂಬಿಕಾ ದೇಗುಲದ ರಥೋತ್ಸವದ ಈ ಪರ್ವ ಕಾಲದಲ್ಲಿ ಸ್ವಾಗತ ಗೋಪುರ ಬಳಿಯಲ್ಲಿನ ರಸ್ತೆಯ ಸ್ಥಿತಿ ಗತಿ ಬಗ್ಗೆ ಇಲಾಖೆ ಕ್ರಮ ಕೈಗೊಳ್ಳದಿರುವುದು ಗ್ರಾಮಸ್ಥರ ಆಕ್ರೋಶಕ್ಕೆ ಕಾರಣವಾಗಿದೆ.

ಪ್ರಸಿದ್ಧ ಸಪ್ತ ಕ್ಷೇತ್ರಗಳಲ್ಲೊಂದಾದ ಕೊಲ್ಲೂರು ದೇಗುಲದ ಸ್ವಾಗತ ಗೋಪುರ ದಾಟಿದೊಡನೆ ಎದುರಾಗುವ ಮುಖ್ಯ ರಸ್ತೆಯು ಹದಗೆಟ್ಟಿದೆ. ಬಸ್ಸು ನಿಲ್ದಾಣದ ತಿರುವಿನಿಂದ ಸಾಗುವ ಹಾದಿಯು ಹೊಂಡದಿಂದ ಕೂಡಿದೆ. ಅಲ್ಲಲ್ಲಿ ತಾತ್ಕಾಲಿಕ ನೆಲೆಯಲ್ಲಿ ಹೊಂಡ ಮುಚ್ಚಲಾಗಿದ್ದರೂ ಸಂಪೂರ್ಣ ಡಾಮರೀಕರಣ ಗೊಳ್ಳದಿರುವುದು ಭಕ್ತರ ಅಸಮಾಧಾನಕ್ಕೆ ಕಾರಣವಾಗಿದೆ. ಬಹುತೇಕ ಕಡೆ ರಸ್ತೆಯ ಇಕ್ಕೆಲಗಳಲ್ಲಿ ಹೊಂಡ ತೋಡಿ ಕೇಬಲ್‌ ಸಂಪರ್ಕ ವ್ಯವಸ್ಥೆಗೆ ಅನುವುಮಾಡಿ ಕೊಟ್ಟಿರುವುದು ಆ ಭಾಗದಲ್ಲಿ ವಾಹನ ಸಂಚಾರಕ್ಕೆ ಅಡ್ಡಿ ಉಂಟುಮಾಡಿದೆ.

ಡಾಮರೀಕರಣಕ್ಕೆ ಆಗ್ರಹ
ಸ್ವಾಗತ ಗೋಪುರದಿಂದ ದೇಗುಲದ ತಿರುವಿನವರೆಗೆ ಸಂಪೂರ್ಣ ಡಾಮರೀಕರಣಗೊಳಿಸಿದಲ್ಲಿ ದಿನಂಪ್ರತಿ ದೇಗುಲಕ್ಕೆ ಆಗಮಿಸು ಭಕ್ತರಿಗೆ ಸುಗಮ ವಾಹನ ಸಂಚಾರಕ್ಕೆ ಅನುವು ಮಾಡಿ ಕೊಟ್ಟಂತಾಗುವುದು ಎಂದು ಗ್ರಾಮಸ್ಥರು ಹಾಗೂ ಭಕ್ತರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.