ಟಿ20 ಪಂದ್ಯ: ಸೂಪರ್‌ ಓವರಿನಲ್ಲಿ ಲಂಕೆಗೆ ಗೆಲುವು

ಆಕ್ಲಂಡ್‌: ತೀವ್ರ ಪೈಪೋಟನಿಂದ ಸಾಗಿದ ಮೊದಲ ಟಿ20 ಪಂದ್ಯದಲ್ಲಿ ಪ್ರವಾಸಿ ಶ್ರೀಲಂಕಾ ತಂಡವು ನ್ಯೂಜಿಲ್ಯಾಂಡ್‌ ತಂಡವನ್ನು ಸೂಪರ್‌ ಓವರ್‌ನಲ್ಲಿ ಸೋಲಿಸಿದೆ. ಈ ಮೊದಲು ನ್ಯೂಜಿಲ್ಯಾಂಡ್‌ ಇನ್ನಿಂಗ್ಸ್‌ನ ಅಂತಿಮ ಎಸೆತದಲ್ಲಿ ಐಶ್‌ ಸೋಧಿ ಅವರು ಸಿಕ್ಸರ್‌ ಬಾರಿಸಿದ್ದರಿಂದ ಪಂದ್ಯ ಟೈಗೊಂಡಿತ್ತು ಮತ್ತು ಫ‌ಲಿತಾಂಶ ನಿರ್ಧರಿಸಲು ಸೂಪರ್‌ ಓವರ್‌ ಅಳವಡಿಸಲಾಯಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಶ್ರೀಲಂಕಾ ತಂಡವು ಚರಿತ ಅಸಲಂಕ ಅವರ 67 ರನ್‌ ನೆರವಿನಿಂದ 5 ವಿಕೆಟಿಗೆ 196 ರನ್ನುಗಳ ಉತ್ತಮ ಮೊತ್ತ ಪೇರಿಸಿತ್ತು. ಇದಕ್ಕುತ್ತರವಾಗಿ ನ್ಯೂಜಿಲ್ಯಾಂಡ್‌ ತಂಡವು ಡ್ಯಾರಿಲ್‌ ಮಿಚೆಲ್‌ ಅವರ 66 ರನ್‌ ನೆರವಿನಿಂದ ಗೆಲುವಿನತ್ತ ಹೊರಟಿತ್ತು. ಅಂತಿಮ ಓವರಿನಲ್ಲಿ ಗೆಲ್ಲಲು 13 ರನ್‌ ಬೇಕಿತ್ತು. ಆದರೆ ತಂಡ 12 ರನ್‌ ಗಳಿಸಿದ್ದರಿಂದ ಪಂದ್ಯ ಸಮಬಲದಲ್ಲಿ ಅಂತ್ಯಗೊಂಡಿತು. ಅಂತಿಮ ಎಸೆತದಲ್ಲಿ ಸೋಧಿ ಸಿಕ್ಸರ್‌ ಬಾರಿಸಿದ್ದರಿಂದ ತಂಡ ಟೈಗೊಳ್ಳಲು ಸಾಧ್ಯವಾಗಿತ್ತು.

ಸೂಪರ್‌ ಓವರ್‌ನಲ್ಲಿ ನ್ಯೂಜಿಲ್ಯಾಂಡ್‌ ಮೊದಲು ಬ್ಯಾಟಿಂಗ್‌ ಮಾಡಿತ್ತು. ಡ್ಯಾರಿಲ್‌ ಮಿಚೆಲ್‌, ಜಿಮ್ಮಿ ನೀಶಮ್‌ ಮತ್ತು ಮಾರ್ಕ್‌ ಚಾಪ್‌ಮನ್‌ ಬ್ಯಾಟ್ಸ್‌ಮನ್‌ ಆಗಿದ್ದರು. ಮಹೀಶ್‌ ತೀಕ್ಷಣ ಬೌಲರ್‌. ನ್ಯೂಜಿಲ್ಯಾಂಡ್‌ ಎರಡು ವಿಕೆಟ್‌ ಕಳೆದುಕೊಂಡು ಕೇವಲ 8 ರನ್‌ ಗಳಿಸಲಷ್ಟೇ ಶಕ್ತವಾಗಿತ್ತು. ಶ್ರೀಲಂಕಾ ಪರ ಕುಸಲ್‌ ಮೆಂಡಿಸ್‌, ಚರಿತ ಅಸಲಂಕ ಆಡಿದ್ದರು. ಅಸಲಂಕ ಅವರ ಸ್ಫೋಟಕ ಆಟದಿಂದಾಗಿ ಶ್ರೀಲಂಕಾ ವಿಕೆಟ್‌ ನಷ್ಟವಿಲ್ಲದೇ 11 ರನ್‌ ಗಳಿಸಿ ಜಯಭೇರಿ ಬಾರಿಸಿತು.