ರಾಜಕೀಯದಿಂದ ಸೋನಿಯಾ ನಿವೃತ್ತಿ ಇಲ್ಲ

ಹೊಸದಿಲ್ಲಿ: ಕಾಂಗ್ರೆಸ್‌ನ ಅಧ್ಯಕ್ಷರಾಗಿ ನಿಯೋಜಿತರಾಗಿರುವ ರಾಹುಲ್‌ ಗಾಂಧಿ ಡಿ.16ರಂದು ಅಧಿಕೃತವಾಗಿ ಅಧಿಕಾರ ಸ್ವೀಕರಿಸಲಿದ್ದಾರೆ. ಅದಕ್ಕೆ ಪೂರಕವಾಗಿ ಶುಕ್ರವಾರ ಸಂಸತ್‌ ಭವನದ ಆವರಣದಲ್ಲಿ ಪತ್ರಕರ್ತರ ಜತೆಗೆ ಮಾತನಾಡಿದ ಕಾಂಗ್ರೆಸ್‌ ನಾಯಕಿ ಸೋನಿಯಾ ಗಾಂಧಿ “ಇನ್ನೇನಿದ್ದರೂ ನನ್ನ ಕೆಲಸ ನಿವೃತ್ತಿಯಾಗುವುದು’ ಎಂದು ಹೇಳಿದ್ದರು. ಇದು ಹಲವು ವಿಶ್ಲೇಷಣೆಗಳಿಗೆ ಕಾರಣವಾಗಿತ್ತು. 2019ರ ಲೋಕ ಸಭೆ ಚುನಾವಣೆಗೆ ಅವರು ಸ್ಪರ್ಧಿಸುವುದಿಲ್ಲ ಎಂಬಂತೆ ವರದಿಗಳು ಸುದ್ದಿವಾಹಿನಿಗಳಲ್ಲಿ ಹರಿದಾಡತೊಡಗಿದವು.
 
ಈ ಬಗ್ಗೆ ಕೂಡಲೇ ಸುದ್ದಿಗೋಷ್ಠಿ ಮತ್ತು ಟ್ವಿಟರ್‌ ಮೂಲಕ ಪ್ರತಿಕ್ರಿಯೆ ನೀಡಿದ ಕಾಂಗ್ರೆಸ್‌ನ ಮುಖ್ಯ ವಕ್ತಾರ ರಣದೀಪ್‌ ಸುಜೇìವಾಲಾ, “ಸೋನಿಯಾ ಗಾಂಧಿಯವರು ಕಾಂಗ್ರೆಸ್‌ ಅಧ್ಯಕ್ಷ ಸ್ಥಾನದಿಂದ ನಿವೃತ್ತರಾಗುತ್ತಿದ್ದಾರೆಯೇ ಹೊರತು ಸಾರ್ವಜನಿಕ ಜೀವನದಿಂದ ಅಲ್ಲ’ ಎಂದು ಹೇಳಿದ್ದಾರೆ. ಅವರ ಆಶೀರ್ವಾದ, ಸಂಘಟನಾ ಕೌಶಲ, ಸಂವಹನಾ ಕೌಶಲ ನಮ್ಮ ಪಕ್ಷವನ್ನು ದಾರಿದೀಪವಾಗಿ ಮುಂದುವರಿಸಲಿದೆ ಎಂದು ಸುಜೇìವಾಲಾ ಹೇಳಿದ್ದಾರೆ. 19 ವರ್ಷ ಕಾಲ ಸೋನಿಯಾ ಪಕ್ಷವನ್ನು ಮುನ್ನಡೆಸಿದ್ದಾರೆ.