ಆರು ವರ್ಷಗಳ ಬಳಿಕ “ಇಂಡೋ –ಪಾಕ್‌ ಎಕ್ಸ್‌ಪ್ರೆಸ್‌’ಜತೆಯಾಟ

ಹೊಸದಿಲ್ಲಿ: “ಇಂಡೋ-ಪಾಕ್‌ ಎಕ್ಸ್‌ಪ್ರೆಸ್‌’ ಖ್ಯಾತಿಯ ರೋಹನ್‌ ಬೋಪಣ್ಣ ಮತ್ತು ಐಸಮ್‌ ಉಲ್‌ ಹಕ್‌ ಖುರೇಶಿ 6 ವರ್ಷಗಳ ಬಳಿಕ ಜತೆಯಾಗಿ ಟೆನಿಸ್‌ ಅಂಕಣಕ್ಕೆ ಇಳಿಯಲಿದ್ದಾರೆ. ಮಾ. 15ರಿಂದ ಮೆಕ್ಸಿಕೋದಲ್ಲಿ ಆರಂಭವಾಗಲಿರುವ “ಅಕಪೊಲ್ಕೊ ಎಟಿಪಿ 500 ಟೆನಿಸ್‌ ಟೂರ್ನಿ’ಯಲ್ಲಿ ಇವರು ಪುರುಷರ ಡಬಲ್ಸ್‌ನಲ್ಲಿ ಸ್ಪರ್ಧಿಸಲಿದ್ದಾರೆ.

2014ರಷ್ಟು ಹಿಂದೆ ಶೆಂಜೆನ್‌ನಲ್ಲಿ ನಡೆದ ಎಟಿಪಿ 250 ಪಂದ್ಯಾವಳಿಯಲ್ಲಿ ಬೋಪಣ್ಣ-ಖುರೇಶಿ ಕೊನೆಯ ಸಲ ಒಟ್ಟಿಗೇ ಆಡಿದ್ದರು. 2010ರ ಯುಎಸ್‌ ಓಪನ್‌ ಫೈನಲ್‌ ತಲುಪಿದ್ದು ಈ ಜೋಡಿಯ ಅಮೋಘ ಸಾಧನೆಯಾಗಿದೆ. ಅಂದು ಇವರು ಗ್ರೇಟ್‌ ಬ್ರಿಯಾನ್‌ ಬ್ರದರ್ಗೆ ಶರಣಾಗಿದ್ದರು. ಅದೇ ವರ್ಷ ಬೋಪಣ್ಣ ಡಬಲ್ಸ್‌ನಲ್ಲಿ ವಿಶ್ವದ ನಂ.3 ಟೆನಿಸಿಗನಾಗಿ ಬಹಳ ಎತ್ತರ ಏರಿದ್ದರು.

ಒಲಿಂಪಿಕ್ಸ್‌ಗಾಗಿ ಬೇರ್ಪಟ್ಟರು
2012ರಲ್ಲಿ ಬೋಪಣ್ಣ-ಖುರೇಶಿ ಜೋಡಿ ಬೇರ್ಪಟ್ಟಿತು. ಅಂದು ಬೋಪಣ್ಣ ಅವರ ಜತೆಗಾರನಾಗಿ ಕಾಣಿಸಿಕೊಂಡವರು ಭಾರತದವರೇ ಆದ ಮಹೇಶ್‌ ಭೂಪತಿ. ಲಂಡನ್‌ ಒಲಿಂಪಿಕ್ಸ್‌ಗೆ ಸಿದ್ಧತೆ ನಡೆಸುವುದು ಇವರ ಉದ್ದೇಶವಾಗಿತ್ತು. 2014ರಲ್ಲಿ ಮತ್ತೆ ಬೋಪಣ್ಣ-ಖುರೇಶಿ ಜತೆಯಾದರು.

ಈಗ ಇಬ್ಬರಿಗೂ 40 ವರ್ಷ. ಸದ್ಯ ಮೆಕ್ಸಿಕೊ ಪಂದ್ಯಾವಳಿಯಲ್ಲಿ ಮಾತ್ರ ಇವರು ಜತೆಯಾಗಿ ಆಡಲಿದ್ದಾರೆ.