‘ಸೇನಾಪುರ’ದಲ್ಲಿ ನಟಿಸಲಿರುವ ಸೋಜುಗಾದ ಸೂಜುಮಲ್ಲಿಗೆ ಗಾಯಕಿ ಅನನ್ಯ ಭಟ್

ಬೆಂಗಳೂರು: ‘ಮಾದೇವ ಮಾದೇವ’ ಎನ್ನುತ್ತಾ  ‘ಸೋಜುಗಾದ ಸೂಜುಮಲ್ಲಿಗೆ’ ಹಾಡನ್ನು ಹೇಳಿ ಸಂಗೀತ ಪ್ರಿಯರನ್ನು ಬೇರೊಂದು ಲೋಕಕ್ಕೆ ಕರೆದೊಯ್ದ ಗಾಯಕಿ ಅನನ್ಯ ಭಟ್ ಇದೀಗ ಸಿನಿಮಾದಲ್ಲಿ ನಟಿಸುವ ಮೂಲಕ ಸಿನಿ ಪ್ರಿಯರ ಮನತಣಿಸಲು ಮುಂದಾಗಿದ್ದಾರೆ. ಇದು ಅವರ ಮೂರನೇ ಸಿನಿಮಾವಾಗಿದೆ.

ನಿರ್ದೇಶಕ ಗುರು ಸವನ್ ಆ್ಯಕ್ಷನ್ ಕಟ್ ನಲ್ಲಿ ಮೂಡಿಬರುತ್ತಿರುವ ಈ ಹೊಸ ಸಿನಿಮಾಕ್ಕೆ ‘ಸೇನಾಪುರ’ ಎಂಬ ಹೆಸರಿಡಲಾಗಿದೆ. ಉಳ್ಳವರು ಹಾಗೂ ಶೋಷಿತರ ನಡುವಿನ ಹೋರಾಟದ ಕಥಾ ಹಂದರವನ್ನು ಒಳಗೊಂಡಿರುವ ನೈಜ ಕಥೆಯನ್ನು ಆಧರಿಸಿರುವ ಸಿನಿಮಾ ಇದಾಗಿದ್ದು, ಚಿತ್ರದಲ್ಲಿ ಅನನ್ಯ ಹೋರಾಟಗಾರ್ತಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಈ ಹಿಂದೆ ಹಲವಾರು ಸಿನಿಮಾಗಳಲ್ಲಿ ನಟಿಸಲು ಅವಕಾಶಗಳು ಬಂದಿದ್ದವು. ಆದರೆ ಕಥೆಗೆ ಹಾಗೂ ಪಾತ್ರಕ್ಕೆ ಪ್ರಾಮುಖ್ಯತೆ ಇರಬೇಕು ಎಂದು ಬಯಸಿದ್ದೆ. ಆದರೆ ಈ ಸಿನಿಮಾದ ಕಥೆ ನನಗೆ ತುಂಬಾ ಹಿಡಿಸಿತು. ಕಾರಣ ಇದು ಬಡಜನರ ಮೇಲೆ  ಸಿರಿವಂತರ ದಬ್ಬಾಳಿಕೆಯ ಎಳೆಯನ್ನು ಹೊಂದಿರುವ ಕಥೆ ಎಂದಿದ್ದಾರೆ.

ಇದನ್ನೂ ಓದಿ:ಕೇವಲ ದೆಹಲಿ ಮಾತ್ರವಲ್ಲ ಇಡೀ ದೇಶಾದ್ಯಂತ ಕೋವಿಡ್ 19 ಲಸಿಕೆ ಉಚಿತ: ಸಚಿವ ಹರ್ಷ್ ವರ್ಧನ್

ಹಿಂದಿನಿಂದಲೂ ರಂಗಭೂಮಿ ಕಲಾವಿದೆಯಾಗಿರುವ ನನಗೆ ಗ್ಲಾಮರ್ ಪಾತ್ರಗಳನ್ನೇ ಮಾಡಬೇಕು ಎಂಬ ಆಸೆ ಇಲ್ಲ ಎಂದಿರುವ ಅನನ್ಯ, ಬುಡಕಟ್ಟು ಚಿತ್ರಣವಿರುವ ಈ ಸಿನಿಮಾದಲ್ಲಿ ನಟಿಸಲು ನನಗೆ ತುಂಬಾ ಸಂತೋಷವಿದೆ ಎಂದಿದ್ದಾರೆ.

ಮೂಲತಃ ಕುಂದಾಪುರದವರಾಗಿರುವ ನಿರ್ದೇಶಕ ಗುರು ಸವನ್ ಅವರಿಗೆ ಇದು ಮೊದಲ ಸಿನಿಮಾ ಆಗಿದ್ದು, ಚಿತ್ರದ ಕುರಿತು ಮಾತನಾಡಿರುವ ನಿರ್ದೇಶಕ, ನಾನು ನೂರಾರು ವರ್ಷಗಳ ಹಿಂದೆ ನಡೆದ ಕಥೆಯನ್ನು ಸಿನಿಮಾ ಮಾಡಲು ಹೊರಟಿದ್ದೇನೆ. ಈ ಕಥೆಯಲ್ಲಿ ಅಂದಿನ ಮ್ಯಾಂಗನೀಸ್ ಅದಿರು ಸಾಗಾಣೆ ನಡೆಯುತ್ತಿದ್ದ ಸಮಯದಲ್ಲಿ ಬಡವರು, ಕಾರ್ಮಿಕರು ಅನುಭವಿಸಿರುವ ಸಮಸ್ಯೆಗಳು ಹಾಗೂ ಸಿರಿವಂತರ ದಬ್ಬಾಳಿಕೆಗಳ ಮೇಲೆ ಬೆಳಕು ಚೆಲ್ಲುವ ಪ್ರಯತ್ನ ಮಾಡುತ್ತಿದ್ದೇನೆ ಎಂದಿದ್ದಾರೆ.