ಚೆನ್ನೈ: ಕಾಲಿವುಡ್‌ ನಟ ಸಿಲಂಬರಸನ್ ಟಿಆರ್‌ ಕಮಲ್ ಹಾಸನ್ ಅವರ ʼಥಗ್ ಲೈಫ್‌ʼ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈಗಾಗಲೇ ಸಿನಿಮಾದ ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದಾರೆ. ಸೆಟ್‌ ನಲ್ಲಿನ ಅವರ ಲುಕ್‌ ಗಮನ ಸೆಳೆದಿದೆ.
ಈ ನಡುವೆ ಸಿಲಂಬರಸನ್ ಅವರ ವಿರುದ್ಧ ನಿರ್ಮಾಪಕರೊಬ್ಬರು ಆರೋಪವೊಂದನ್ನು ಮಾಡಿ ದೂರು ನೀಡಿದ್ದಾರೆ. ತಮಿಳು ಚಿತ್ರರಂಗದ ಖ್ಯಾತ ನಿರ್ಮಾಪಕ ವೆಲ್ಸ್ ಪ್ರೊಡಕ್ಷನ್‌ನ ಇಶಾರಿ ಕೆ ಗಣೇಶ್ ಅವರು ನಿರ್ಮಾಪಕರ ಮಂಡಳಿಗೆ ನಟನ ವಿರುದ್ಧ ದೂರು ನೀಡಿದ್ದಾರೆ.
ನಟ ಸಿಂಬು ಅವರು ನಿರ್ಮಾಪಕ ಇಶಾರಿ ಅವರ ಸಿನಿಮಾದಲ್ಲಿ ನಟಿಸುವುದಾಗಿ ಹೇಳಿದ್ದರು. ಈ ಸಿನಿಮಾಕ್ಕೆ ʼಕರೋನಾ ಕುಮಾರ್ʼ ಎನ್ನುವ ಟೈಟಲ್‌ ಇಡಲಾಗಿತ್ತು. ಸಿನಿಮಾವನ್ನು ಗೋಕುಲ್ ಎನ್ ಕೃಷ್ಣ ಅವರನ್ನು ನಿರ್ದೇಶನ ಮಾಡಲಿದ್ದರು. ಇನ್ನೇನು ಸೆಟ್ಟೇರಬೇಕೆನ್ನುವಾಗಲೇ ಸಿಂಬು ಸಿನಿಮಾದಿಂದ ಹಿಂದೆ ಸರಿದಿದ್ದಾರೆ. ಅವರ ಈ ನಿರ್ಧಾರದ ಹಿಂದಿನ ಕಾರಣ ತಿಳಿದು ಬಂದಿಲ್ಲ.
ಇದನ್ನೂ ಓದಿ: Kantara Prequel: ಕೋಟಿ ಕೋಟಿ ಕೊಟ್ಟು ʼಕಾಂತಾರ -1ʼ ಡಿಜಿಟಲ್‌ ಹಕ್ಕನ್ನು ಖರೀದಿಸಿದ ಪ್ರೈಮ್
ಸಿನಿಮಾದಲ್ಲಿ ನಟಿಸುವುದಾಗಿ ನಿರ್ಮಾಪಕರಿಂದ ಸಿಂಬು ಮುಂಗಡವಾಗಿ ಹಣವನ್ನು ಪಡೆದುಕೊಂಡಿದ್ದರು. ಆದರೆ ಸಿನಿಮಾದಿಂದ ಹಿಂದೆ ಸರಿದ ಬಳಿಕವೂ ಮುಂಗಡ ಹಣವನ್ನು ವಾಪಾಸ್‌ ನೀಡದ ಕಾರಣದಿಂದಾಗಿ ನಿರ್ಮಾಪಕ ಇಶಾರಿ ಅವರು ಮಂಡಳಿಗೆ ದೂರು ನೀಡಿದ್ದಾರೆ.
ಸಿಂಬು ಮುಂಗಡ ಪಾವತಿಯನ್ನು ಹಿಂದಿರುಗಿಸುವವರೆಗೆ ಅಥವಾ ಅದೇ ನಿರ್ಮಾಪಕರ ಮತ್ತೊಂದು ಸಿನಿಮಾದಲ್ಲಿ ಕಾಣಿಸಿಕೊಳ್ಳುವವರೆ ಇತರ ಪ್ರಾಜೆಕ್ಟ್‌ ನಲ್ಲಿ ಭಾಗಿಯಾಗಲು ಅನುಮತಿಸಬಾರದು ಎಂದು ನಿರ್ಮಾಪಕರು ಒತ್ತಾಯಿಸಿದ್ದಾರೆ.
ಸದ್ಯ ಸಿಂಬು ಕಮಲ್ ಹಾಸನ್ ಅವರ ಮುಂದಿನ ಚಿತ್ರ ʼಥಗ್ ಲೈಫ್‌ʼನ ಚಿತ್ರೀಕರಣದಲ್ಲಿ ತೊಡಗಿಕೊಂಡಿದ್ದಾರೆ. ಇದಾದ ಬಳಿಕ ಅವರು ʼSTR 48ʼ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
