ನೀರಿನ ಮಿತ ಬಳಕೆ ಕುರಿತ ಕಿರುಚಿತ್ರ ವಾರಿ

ಈಗಾಗಲೇ ಹಲವು ಸಮಸ್ಯೆಗಳ ಕುರಿತು ಕಿರುಚಿತ್ರ, ಸಿನಿಮಾ ಮೂಡಿ ಬಂದಿವೆ. ಈಗ ಆ ಸಾಲಿಗೆ ಮೈಸೂರು ಹುಡುಗರೆಲ್ಲ ಸೇರಿ “ವಾರಿ’ ಎಂಬ ಕಿರುಚಿತ್ರವನ್ನು ಮಾಡಿದ್ದಾರೆ. ಪ್ರಮುಖ್‌ ಏಂಜೆಲೋ ಹೊಸಬರ ಯೋಚನೆ ಮೆಚ್ಚಿಕೊಂಡು ಕಿರುಚಿತ್ರ ನಿರ್ಮಾಣ ಮಾಡಿದ್ದಾರೆ.  ಈಗ ನೀರಿನ ಮಿತ ಬಳಕೆ ಕುರಿತಂತೆ ಜಾಗೃತಿ ಮೂಡಿಸಲು, “ವಾರಿ’ ಹೆಸರಿನ ಕಿರುಚಿತ್ರ ನಿರ್ಮಾಣ ಮಾಡಿದ್ದಾರೆ. ರಾಜು ವೈವಿಧ್ಯ ಈ ಕಿರುಚಿತ್ರದ ನಿರ್ದೇಶಕರು. 

ಪ್ರಸ್ತುತ ದಿನಗಳಲ್ಲಿ ನೀರು ಅತ್ಯಗತ್ಯವಾಗಿದ್ದು, ಯಥೇತ್ಛವಾಗಿ ನೀರು ಬಳಸಿದರೆ, ಮುಂದೊಂದು ದಿನ ನೀರಿಗಾಗಿ ಪರಿತಪಿಸಬೇಕಾಗುತ್ತೆ ಎಂಬ ವಿಷಯ ಇಟ್ಟುಕೊಂಡು ಒಂದು ಕಿರುಚಿತ್ರ ನಿರ್ದೇಶಿಸಿರುವ ರಾಜು ವೈವಿಧ್ಯ, ಆ ಕಿರುಚಿತ್ರದಲ್ಲಿ ನೀರನ್ನು ಮಿತವಾಗಿ ಬಳಸಿ, ಮುಂದಿನ ಪೀಳಿಗೆಗೆ ನೀರಿನ ಅವಶ್ಯಕತೆ ಬಗ್ಗೆ ತಿಳಿಸಬೇಕು ಎಂಬ ಸಣ್ಣ ಸಂದೇಶ ಸಾರಿದ್ದಾರೆ. ಅಂದಹಾಗೆ, ಈ “ವಾರಿ’ ಎಂಬ ಕಿರುಚಿತ್ರದಲ್ಲಿ ಪ್ರಧಾನ್‌ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.

ಉಳಿದಂತೆ ರಾಜು ವೈವಿಧ್ಯ, ಸ್ನೇಹಜೀವಿ ಪುಟ್ಟು ಇತರರು ಕಾಣಿಸಿಕೊಂಡಿದ್ದಾರೆ. ಹದಿನೈದು ನಿಮಿಷಗಳ ಈ ಕಿರುಚಿತ್ರ, ಮೈಸೂರಿನಲ್ಲಿ ಏಪ್ರಿಲ್‌ 14 ರಂದು ರಾಣಿ ಬಹದ್ದೂರ್‌ ಸಭಾಂಗಣದಲ್ಲಿ ಅಂಬೇಡ್ಕರ್‌ ದಿನಾಚರಣೆ ಅಂಗವಾಗಿ ನಡೆದ “ಭಾರತದ ಪ್ರಸ್ತುತ ಸಮಸ್ಯೆಗಳು’ ಎಂಬ ಚಿಂತನಾ ಸಭೆಯಲ್ಲಿ “ವಾರಿ’ ಪ್ರದರ್ಶನಗೊಂಡು ಎಲ್ಲರ ಮೆಚ್ಚುಗೆ ಪಡೆದಿದೆ. ನಿರಂಜನ್‌ ಕ್ಯಾಮೆರಾ ಹಿಡಿದರೆ, ಸಾಯಿಕಿರಣ್‌ ಸಂಗೀತ ನೀಡಿದ್ದಾರೆ.