ಸರಕಾರಿ ಅಭಿಯೋಜಕರತ್ತ ಶೂ ಎಸೆತ

ಉಡುಪಿ: ಉಡುಪಿ ಜಿಲ್ಲಾ ನ್ಯಾಯಾಲಯದ 2 ದಶಕಗಳ ಇತಿಹಾಸದಲ್ಲಿ ಎ. 12ರ ಸಂಜೆ ಆಘಾತಕಾರಿ ಬೆಳವಣಿಗೆಯೊಂದು ನಡೆದಿದೆ. ಅತ್ಯಾಚಾರ ಆರೋಪ ಸಾಬೀತಾಗಿ 20 ವರ್ಷ ಜೈಲು ಶಿಕ್ಷೆಗೆ ಒಳಪಟ್ಟ ಅಪರಾಧಿ ನ್ಯಾಯಾಧೀಶರ ಎದುರೇ ಪೋಕ್ಸೋ ಕೋರ್ಟ್‌ನ ವಿಶೇಷ ಸರಕಾರಿ ಅಭಿಯೋಜಕರತ್ತ ಶೂ ಎಸೆದಿದ್ದಾನೆ. ಉಡುಪಿ ಜಿಲ್ಲೆಯ ನ್ಯಾಯಾಲಯದಲ್ಲಿ ಅಪರಾಧಿಯಿಂದ ಇಂತಹ ದುರ್ವರ್ತನೆಯ ಪ್ರಪ್ರಥಮ ಪ್ರಕರಣ ಇದು.

ಗುರುವಾರ ಸಂಜೆ 4.30ರ ಸಮಯ. ಪೋಕ್ಸೋ ಪ್ರಕರಣವಾದ್ದರಿಂದ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರೇ ಮುನ್ನಡೆಸುವ ಪೋಕ್ಸೋ ವಿಶೇಷ ಕೋರ್ಟ್‌ನಲ್ಲಿ ಕುಂದಾಪುರದ 35/14ರ ಸ್ಪೆಶಲ್‌ ಕೇಸ್‌ನ ವಿಚಾರಣೆ ಮುಕ್ತಾಯದ ಹಂತದಲ್ಲಿತ್ತು. ಪ್ರಕರಣದ 15 ಸಾಕ್ಷಿಗಳ ವಿಚಾರಣೆ ನಡೆಸಿದ್ದ ನ್ಯಾಯಾಧೀಶರು ಆರೋಪಿಗೆ ಶಿಕ್ಷೆ ಪ್ರಕಟಿಸುತ್ತಿದ್ದಂತೆಯೇ ಅಪರಾಧಿ ಬ್ರಹ್ಮಾವರ ಆರೂರು ಗ್ರಾಮ ಕೀರ್ತಿನಗರದ ಪ್ರಶಾಂತ್‌ (25) ಬೈಯುತ್ತಾ ತನ್ನ ಎರಡೂ ಶೂ ತೆಗೆದು ವಿಶೇಷ ಸರಕಾರಿ ಅಭಿಯೋಜಕ (ಪೋಕ್ಸೋ) ವಿಜಯ ವಾಸು ಪೂಜಾರಿ ಅವರ ಮೇಲೆ ಎಸೆದಿದ್ದಾನೆ. ‘ನಿನ್ನನ್ನು ಜೀವ ಸಹಿತ ಬಿಡುವುದಿಲ್ಲ’ ಎಂದೂ ಹೇಳಿದ್ದಾನೆ.

20 ವರ್ಷ ಜೈಲು; 25 ಸಾವಿರ ದಂಡ

ಅಪರಾಧಿಗೆ 20 ವರ್ಷಗಳ ಜೈಲು ಶಿಕ್ಷೆ, 25 ಸಾವಿರ ದಂಡವನ್ನು ಪೋಕ್ಸೋ ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಟಿ. ವೆಂಕಟೇಶ್‌ ನಾಯ್ಕ ಪ್ರಕಟಿಸಿದ್ದರು. ವಿಶೇಷ ಅಭಿಯೋಜಕರು ಮಾಡಿದ ವಾದದ ಪರಿಣಾಮದಿಂದ ತನಗೆ ಇಷ್ಟು ಕಠಿನ ಶಿಕ್ಷೆಯಾಯಿತೆಂದು ಕೋಪಗೊಂಡ ಪ್ರಶಾಂತನು ವಕೀಲರು, ಪೊಲೀಸರ ಸಮ್ಮುಖದಲ್ಲಿಯೇ ತೆರೆದ ಕೋರ್ಟ್‌ನಲ್ಲಿ ಅಭಿಯೋಜಕರ ಮೇಲೆ ಶೂ ಎಸೆದು ಆಕ್ರೋಶ ವ್ಯಕ್ತಪಡಿಸಿದ್ದಾನೆ.

‘ಇದು ನನ್ನ ಮೇಲೆ ಪೆಟ್ಟಲ್ಲ. ನ್ಯಾಯಾಂಗ ವ್ಯವಸ್ಥೆಯ ಮೇಲಿನ ಪೆಟ್ಟು. ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಬೇಕು’ ಎಂದು ವಿಶೇಷ ಸರಕಾರಿ ಅಭಿಯೋಜಕರು ನ್ಯಾಯಾಧೀಶರಲ್ಲಿ ಕೋರಿದ್ದಾರೆ. ನ್ಯಾಯಾಧೀಶರು ಕೂಡ ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿ ಸೂಕ್ತ ಕ್ರಮಕ್ಕೆ ಎಸ್‌ಪಿಗೆ ನಿರ್ದೇಶ ಕೊಟ್ಟಿದ್ದಾರೆ. ಪೊಲೀಸ್‌ ಅಧಿಕಾರಿಗಳು ಎ. 13ರ ಬೆಳಗ್ಗೆ ನ್ಯಾಯಾಧೀಶರ ಅನುಮತಿ ಪಡೆದು ಶೂ ಅನ್ನು ವಶಕ್ಕೆ ಪಡೆದು ಮಹಜರು ನಡೆಸಿದ್ದಾರೆ. ಪ್ರಶಾಂತ ಬ್ರಹ್ಮಾವರ ಠಾಣೆ ವ್ಯಾಪ್ತಿಯ ಕೊಲೆ ಪ್ರಕರಣದ ಆರೋಪಿ. ಮತ್ತೂ ಹಲವು ಪ್ರಕರಣ ಗಳು ಈತನ ಮೇಲಿದೆ. ಈ ಹಿನ್ನೆಲೆಯಲ್ಲಿ ಘಟನೆಯನ್ನು ಪೊಲೀಸ್‌ ಇಲಾಖೆಯೂ ಗಂಭೀರವಾಗಿ ಪರಿಗಣಿಸಿದೆ. ಆರೋಪಿಯನ್ನು ಕಾರವಾರ ಜೈಲಿಗೆ ಒಯ್ಯಲಾಗಿದೆ.

ಬಾಲಕಿಯ ಅತ್ಯಾಚಾರ ಪ್ರಕರಣ
2013ರ ಫೆ. 17ರಂದು ಕೋಟೇಶ್ವರದ 15ರ ಹರೆಯದ ಬಾಲಕಿಯನ್ನು ಪುಸಲಾಯಿಸಿ ಕರೆದೊಯ್ದಿದ್ದ ಆರೋಪಿ ಪ್ರಶಾಂತನು ಪೆರ್ಡೂರು ಪಾಡಿಗಾರದ ತನ್ನ ಸಂಬಂಧಿಕರ ಮನೆಗೊಯ್ದು ಫೆ. 18ರ ಬೆಳಗ್ಗೆ ಅತ್ಯಾಚಾರವೆಸಗಿದ್ದ. ಕುಂದಾಪುರ ಠಾಣೆಯಲ್ಲಿ ಪೋಕ್ಸೋ ಅಡಿ ಪ್ರಕರಣ ದಾಖಲಾಗಿ, ತನಿಖೆ ನಡೆಸಿ ಅಂದಿನ ಸರ್ಕಲ್‌ ಇನ್ಸ್‌ಪೆಕ್ಟರ್‌ ಪಿ.ಎಂ. ದಿವಾಕರ್‌ ಅವರು ಚಾರ್ಜ್‌ಶೀಟ್‌ ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು. ಈ ಪ್ರಕರಣ ಸಾಬೀತಾಗಿ ಇದೀಗ ಆರೋಪಿಗೆ 20 ವರ್ಷ ಜೈಲಾಗಿದೆ.

ಎದೆಗುಂದಿಲ್ಲ; ಕರ್ತವ್ಯ ಮುಂದುವರಿಸುವೆ 
ಇದೊಂದು ಆತಂಕಕಾರಿ ಘಟನೆ ಹೌದು. ನ್ಯಾಯದ ಪರ ತೀರ್ಪಾಗಿದೆ. ನೊಂದ ಬಾಲಕಿಗೆ ಇಲ್ಲಿ ನ್ಯಾಯ ಸಿಕ್ಕಿದೆ. ನನ್ನ ಮೇಲೆ ಶೂ ಎಸೆದು ಕೋರ್ಟಿನೊಳಗೆ ಅವಮಾನಿಸಿ ಜೀವಬೆದರಿಕೆಯನ್ನೂ ಅಪರಾಧಿ ಒಡ್ಡಿದ್ದಾನೆ. ಪೊಲೀಸ್‌ ದೂರು ಕೊಟ್ಟಿದ್ದೇನೆ. ನನ್ನ ಕರ್ತವ್ಯವನ್ನು ಸಮರ್ಪಕವಾಗಿ ನಿರ್ವಹಿಸಿರುವ ಹೆಮ್ಮೆ ನನಗಿದೆ. ನೊಂದವರಿಗೆ ನ್ಯಾಯಕ್ಕಾಗಿ ಮುಂದೆಯೂ ಕರ್ತವ್ಯವನ್ನು ಪ್ರಾಮಾಣಿಕವಾಗಿ ನಿರ್ವಹಿಸುತ್ತೇನೆ.
– ವಿಜಯ ವಾಸು ಪೂಜಾರಿ, ಸರಕಾರಿ ಅಭಿಯೋಜಕ (ಪೋಕ್ಸೋ). 

ಸಭೆ ನಡೆಸಿ ತೀರ್ಮಾನ 
ವಿಶೇಷ ಅಭಿಯೋಜಕರು ಲಿಖೀತವಾಗಿ ವಿಷಯ ತಿಳಿಸಿದ ಬಳಿಕ ವಕೀಲರ ಸಂಘವು ತುರ್ತು ಸಭೆ ನಡೆಸಿ ತೀರ್ಮಾನಕ್ಕೆ ಬರುತ್ತದೆ.ಈವರೆಗೆ ಇಂತಹ ಪ್ರಕರಣ ಆಗಿಲ್ಲ. ಮೊದಲ ಪ್ರಕರಣವಾಗಿರುವ ಕಾರಣ ಹೇಗೆ, ಯಾವ ರೀತಿಯಲ್ಲಿ ನಿರ್ಧಾರ ತೆಗೆದುಕೊಳ್ಳಬೇಕೆನ್ನುವ ಬಗ್ಗೆ ಚರ್ಚಿಸಲಾಗುವುದು.
– ಸಂತೋಷ್‌ ಹೆಬ್ಟಾರ್‌, ವಕೀಲರ ಸಂಘದ ಕಾರ್ಯದರ್ಶಿ. 

ತನಿಖೆ ನಡೆಯುತ್ತಿದೆ 
ಅಭಿಯೋಜಕರು ಉಡುಪಿ ನಗರ ಠಾಣೆಯಲ್ಲಿ ದೂರು ಕೊಟ್ಟಿದ್ದಾರೆ. ಮಹಜರು ನಡೆಸಲಾಗಿದೆ. ಇನ್ಸ್‌ಪೆಕ್ಟರ್‌ ನೇತೃತ್ವದಲ್ಲಿ ತನಿಖೆ ನಡೆಯುತ್ತಿದೆ. ಆಂತರಿಕ ಭದ್ರತೆ ಕೊಡುವ ಬಗ್ಗೆ ಪರಿಶೀಲನೆ ನಡೆಸಿ ತೀರ್ಮಾನಕ್ಕೆ ಬರಲಾಗುವುದು. 
– ಲಕ್ಷ್ಮಣ ಬ. ನಿಂಬರಗಿ, ಪೊಲೀಸ್‌ ವರಿಷ್ಠಾಧಿಕಾರಿ.